Read ngakarimojong Mat. 25 Bible Online

Mat. 25 - ngakarimojong bible

Mat. 25

¹“Ikoni Apukan ŋina anakuj ŋapesur ŋunatomon, ŋuna alemunete ŋitaae kec toloto akisiryam ekeitan.

²Alokidiŋ kec, abaŋaaka ŋakan ka aosok ŋunacekan.

³Apotu ŋuna abaŋaaka yaa ŋitaae kec, nai nyetiŋa akimyet ace.

⁴Nai apotu ŋuna aosok yaa ŋidooli ŋulu eleleba akimyet ka ŋitaae.

⁵Todidi ekeitan, tosodi togeut ŋapesur akilura tojotooros.

⁶“Nai ani enaŋi kidiŋ akuwar, kiirarae ecelet ŋolo abala, ‘Topupokisi, ekeitan lo! Potu kisiryama!’

⁷Tokyenyut nai ŋapesur ŋunatomon daadaŋ kitemokis ŋitaae kec.

⁸Tolimokis ŋapesur ŋuna abaŋaaka ŋuna aosok temasi, ‘Inakinae isua akimyet adio, anerae edikino ŋikositaae eduŋeete.’

⁹Toboŋokis ŋapesur ŋuna aosok temasi, ‘Mam jik! Emam ŋina ikitemokin iyes ka isua. Toloto togyelutu alodukanin.’

¹⁰Ani elosito ikes akigyel akimyet, todolu ekeitan. Tolomasi iŋes ka ŋapesur ŋuna atenito kai ŋina eitare, tosodi togolokinoe ekek.

¹¹“Ani ekaku, todolut ŋapesur ŋunace daŋ temasi, ‘Ekapolon! Ekapolon! Toŋaarae isua daŋ!’

¹²Toboŋok ekeitan tema, ‘Emam kire jik nyakayeni ayoŋ iyes.’ ”

¹³Kirikak Yesu ŋakiro ŋun ebala, “Totenito, anerae nyiyenete akoloŋit kori esaa.”

¹⁴“Ikote ŋakiro nu ekile epei ŋolo ani eriŋa nyerotokino neni alwanan, abu tonyara ŋiketiyak keŋ daadaŋ kicikak ikes akiuryar ebari keŋ.

¹⁵Inak iŋes epei ŋicweei ŋikan ŋulu ke egolid, inak ŋoloce ŋicweei ŋiarei ka inak ŋoloce epei bon. Akorakinitae ŋinituŋanan ikwaŋina itiyaa iŋes. Ani kedau akorakin, torotok.

¹⁶Abu eketiyan ŋolo akorakinitae ŋicweei ŋikan tolot atipei kicurutak, toryamu ŋicweei ŋice ŋikan.

¹⁷Ikwaŋinapei, eketiyan daŋ ŋolo akorakinitae ŋicweei ŋiarei, abu toryamu ŋicweei ŋice ŋiarei.

¹⁸Nai ŋolo akorakinitae ecwee epei, abu tolot tobok akipany kwap, kiwua ecwee ŋolo ainakinit ekapolon keŋ iŋes.

¹⁹“Kelunyar apaki ŋina aoyan, toboŋu ekapolon a ŋiketiyak a ŋul aanyun ŋamicae kec.

²⁰Bu eketiyan ŋolo akorakinitae ŋicweei ŋikan, yau ŋicweei ŋice ŋikan tolimu tema, ‘Ekapolon, ikicikakinit iyoŋ ayoŋ ŋicweei ŋikan; epoidau ayoŋ ŋicweei ŋice ŋikan.’

²¹Tolimok ekapolon iŋes tema, ‘Ikoŋina! Irae iyoŋ eketiyan ŋolo ajokan ka ŋolo ikinyoma. Ikwaŋina ibunio iyoŋ tojokyaror anakicuruta a ŋina edit, ekewuakini iyoŋ nakicuruta ŋina apolon. Bua olakaros kaapei ka ayoŋ.’

²²“Bu nai ŋolo akorakinitae ŋicweei ŋiarei tolimok ekapolon tema, ‘Ekapolon, ikicikakinit iyoŋ ayoŋ ŋicweei ŋiarei; epoidau ayoŋ ŋicweei ŋice ŋiarei.’

²³Tolimok ekapolon iŋes tema, ‘Ikoŋina! Irae iyoŋ eketiyan ŋolo ajokan ka ŋolo ikinyoma. Ikwaŋina ibunio iyoŋ tojokyar anakicuruta a ŋina edit, ekewuakini iyoŋ nakicuruta ŋina apolon. Bua olakaros kaapei ka ayoŋ.’

²⁴“Ani ekaku, bu ŋolo akorakinitae ecwee epei, tolimok ekapolon tema, ‘Ekapolon, akayeni ayoŋ iyoŋ atemar irae ekile ŋolo atyonon. Ilemi iyoŋ aneni nyitakinit ka icuni aneni nyiekinit.

²⁵Aŋun, abu ayoŋ okuryaniar, ewua ecwee kon ŋolo ke egolid analup, iŋes lo, kijaa erae ŋolo kon.’

²⁶“Nai toboŋok ekapolon keŋ tema, ‘Irae iyoŋ eketiyan ŋolo aronon ŋolo ikalanyana! Iyeni iyoŋ atemar alemi ayoŋ aneni nyetakinit ka acuni aneni nyaekinit.

²⁷Ani kikote neni, nyo pa iwuakinia iyoŋ egolid kaŋ nabeŋki ani aboŋuni ayoŋ, oryamu kiatakin.

²⁸Tolemasi ecwee aneni keŋ, inakisi ŋolo eyakar ŋicweei ŋitomon.

²⁹Anerae ituŋanan ŋini eyakar ibore, iyatakinio tolalaar akilo ŋini sek eyakar, ituŋanan ŋini emam ibore eyakar, elemaryo tari ŋini edit ŋini sek eyakar.

³⁰Nai eketiyan ŋolo erae ekoŋinait lo, tocakasi iŋes kiŋa nakiryonut. Kigwor aina tokonyanak ŋikyal.’

³¹“Ŋina ebunio Lokoku a Ituŋanan erae Erwosit erukito ka ŋimalaikan, iboikin lokicoloŋ keŋ ŋolo ka apedor.

³²Ecunakinosi ŋituŋa a ŋakwapin a daadaŋ kiŋaren keŋ. Totyak iŋes ikes ŋatyaket ŋaarei ikwaŋina etyakia ekeyokon ŋamesekin ka ŋamee.

³³Isibakiyari iŋes ŋamesekin teten keŋ ka ŋamee kedyany keŋ.

³⁴Etemari Erwosit isirwori ŋituŋa ŋulu aloteten keŋ, ‘Potu iyes ŋulu ikiterereŋit Papa kaŋ! Toryamut ajakaanut ŋina itemokinitoe aŋuna kus ameun anasubunet akwap.

³⁵Anerae akanyamit ayoŋ akoro, ipotu iyes ikiinakis ayoŋ akimuj. Akanyamit ayoŋ akure, ipotu iyes ikitamat ayoŋ. Agelaana ayoŋ, ipotu iyes ikijaut ayoŋ.

³⁶Aleri ayoŋ, ipotu iyes ikitanap ayoŋ; adyaka ayoŋ, ipotu iyes ikimukeut ayoŋ, akaenitae ayoŋ alomabus, ipotu ikiŋoliut ayoŋ.’

³⁷“Egeunete ŋulu iyookino aboŋokin iŋes temasi, ‘Ekapolon, ori ikianyunitor isua iyoŋ ikinyamit akoro ikisimuji, kori ikinyamit akure ikitamasi?

³⁸Ori iraakar iyoŋ egela, ikijaun, kori ileryo, ikitanapi?

³⁹Ori idyakar iyoŋ, kori ikienitere alomabus ikiŋoliun isua iyoŋ?’

⁴⁰Eboŋokini nai Erwosit ikes tema, ‘Akalimokini ayoŋ iyes kire atemar, ŋinapaki daadaŋ iponiata iyes kitiyata nugu neni a ipei a ŋikaitotoi kaŋ a ŋulu caryo, ipotu iyes kitiyata neni kaŋ.’

⁴¹“Elimokini nai iŋes ŋituŋa ŋulu alokedyany keŋ tema, ‘Toloto aneni kaŋ iyes ŋulu ilamam! Toloto nakim ŋina nyeduŋe ŋina itemokinitoe aŋuna a Satan ka ŋimalaikan keŋ!

⁴²Anerae akanyamit ayoŋ akoro, nai nyikisimuja iyes ayoŋ; akanyamit akure, nai nyikitamat iyes ayoŋ.

⁴³Arae ayoŋ egela, nai ipotu iyes nyikijaut ayoŋ; aleri, nai nyikitanap iyes ayoŋ. Adyaka ka akaenitae alomabus, nai ipotu iyes nyikiŋoliut ayoŋ.’

⁴⁴“Eboŋokinete nai ikes daŋ temasi, ‘Ekapolon, ori ikianyunitor isua iyoŋ ikinyamit akoro kori akure, irae egela kori ileri, idyaka kori ikienitae alomabus, ido nyikiŋarakin isua iyoŋ?’

⁴⁵Akalimokini ayoŋ iyes kire atemar, ŋinapaki daadaŋ iponiata iyes nyiŋarakis ipei a ŋikaitotoi a ŋulu caryo, ipotu iyes nyikiŋarakis ayoŋ.

⁴⁶Ŋul ikes ecakakinio nakim ŋina nyeduŋe, nai ŋulu iyookino elomarete nakiyar ŋina nyedaun.”