Read ngakarimojong Mat. 27 Bible Online

Mat. 27 - ngakarimojong bible

Mat. 27

¹Ani taparacu eriŋa akwap elilim, apotu ŋisacaradotin ŋulu apolok daadaŋ ka ŋikatukok totukut epite ŋoloaret Yesu.

²Toena ikes iŋes torikosi inakis Pilato ŋolo awuoikinit apukan ŋina a Roma alo Yudaya.

³Ani eanyuni Yuda ŋolo alukinon atemar atubokin Yesu atwanare, toronikis ŋuna kebu iŋes kitiya, tosodi kinyaka ŋisilipae ŋulutomoniuni neni a ŋisacaradotin a ŋulu apolok ka ŋikatukok

⁴ebala, “Asec ayoŋ aŋuna apwakakinia ekile ŋolo nyesecit atwanare.” Toboŋokis ikes temasi, “Erae ŋun ŋuna kon. Emam ŋuna ikikamunito isua a nen!”

⁵Kimasak Yuda ŋisilipae Kai ka Akuj, toloma kiŋa; tolot nariet tomyedakin.

⁶Kideput ŋisacaradotin ŋulu apolok ŋisilipae ŋul temasi, “Italeo a lokisila yok akiwuakin ŋisilipae lu neni iŋadao ŋulu ka Akai ka Akuj, anerae erae ŋisilipae lu ŋulu a ŋaokot.”

⁷Tocamut ikes atemar togyelere ŋisilipae ŋul emanikor ŋolo ke ekayan ŋamoti, tonukanakinetei ŋalyalin ŋuna a ŋituŋa a ŋulu nyerae Ŋiyudayan.

⁸Aŋun, iŋes eriŋa enyaritere emanikor ŋol, “Emanikor a Ŋaokot” tari tokona.

⁹Kiyookin nai ŋakiro ŋuna koloŋ adwarit ekadwaran Yeremiya ebala, “Tolemut ikes ŋisilipae ŋatomoniuni, ebei keŋ ŋolo atubokinito ŋituŋa a Isirael

¹⁰ka inakinae ikes togyeluniata emanikor ŋolo ke ekayan ŋamoti, ikwapei ekecikakinitor Ekapolon ayoŋ.”

¹¹Towo Yesu alokiŋaren Pilato, a ŋolo abu kiŋit iŋes tema, “Irae iyoŋ erwosit a Ŋiyudayan a?” Toboŋok Yesu tema, “Ilimu iyoŋ.”

¹²Nai nyeboŋok ŋakiro ŋuna esitakinitotor ŋisacaradotin ŋulu apolok ka ŋikatukok iŋes.

¹³Tolimok nai Pilato iŋes tema, “Nyipupi iyoŋ ŋakiro ŋuna ikisitakinitere iyoŋ a?”

¹⁴Nai nyeboŋok iŋes tari apeikirot. Aŋun, toumok Pilato nooi.

¹⁵Anasuban a daadaŋ a ŋuna a Paska, alacanakini Pilato emabus epei ŋolo acamito ŋituŋa.

¹⁶Ayai nai nen ekeworon ŋolo ayai mabus ŋolo anyaritae Baraba.

¹⁷Ani kedaut ŋituŋa acunakin, kiŋit Pilato ikes tema, “Ŋae icamito iyes olacak ayoŋ aŋuna kus, Baraba kori Yesu ŋolo enyaritae Kristo?”

¹⁸Anerae ayeni iŋes atemar arikunito ikes Yesu neni keŋ aŋuna ka arakaanut kec.

¹⁹Ani eriŋa Pilato iboi alokicoloŋ a ŋolo etubonokinere, kiyaku aberu keŋ ŋakiro nu neni keŋ: “Nyiloma nakiro ŋuna ke ekile a ŋol, a ŋolo iyookino! Anerae ekecanito ayoŋ ŋakiro ŋuna bien nakwaare erujat ayoŋ aŋuna keŋ.”

²⁰Apotu ŋisacaradotin ŋulu apolok ka ŋikatukok kitutuko ŋituŋa, tolimokis Pilato tolacak Baraba, ido toarae Yesu.

²¹Kiŋit nabo Pilato ikes tema, “Ŋae alokidiŋ ŋuluarei lugu icamito iyes ayoŋ olacak aŋuna kus?” Toboŋokis ikes temasi, “Baraba!”

²²Kiŋit Pilato ikes tema, “Ekokini nai ayoŋ Yesu ŋolo enyaritae Kristo ai?” Toboŋokis ikes daadaŋ temasi, “Kibubuk iŋes lomusalaba!”

²³Kiŋit Pilato ikes tema, “Anironis itiyat iŋes?” Tocelut ikes nooi ebasi, “Kibubukinoe iŋes!”

²⁴Ani eanyuni Pilato atemar, agogoŋioto ŋakiro nooi, aŋuna ageunia aruruma, tolemu ŋakipi kilota ŋakan keŋ alokiŋaren ŋituŋa tema, “Nyekekamunito ayoŋ ŋuna ka atwanare ke ekile a lo! Erae ŋun ŋuna kus!”

²⁵Toboŋokis ikes daadaŋ temasi, “Kimyekisi ŋaokot keŋ pena nakyes kosi ka ŋuna a ŋikosidwe.”

²⁶Tolacak nai Pilato Baraba aŋuna kec, kimyek iŋes Yesu kibuŋae, kipoto nai kibubukinoe lomusalaba.

²⁷Yaasi ŋisigarya ŋulu a Pilato Yesu tooma kai ŋina ke ekawuoikiniton ekepukan a Roma anakwap a ŋin, tocunun ŋisigarya daadaŋ kirimokis Yesu kidiŋ.

²⁸Tolaca iŋes, kitanapa elou ŋolo kipurat areŋan.

²⁹Toyeut nai aikit ŋina a ŋikukwa kiwuakis nakou keŋ, kiwuakis akasirimaete daŋ nakan keŋ ŋina aloteten; toryediko nai alokiŋaren keŋ tokyenatar iŋes ebasi, “Maata erwosit a Ŋiyudayan!”

³⁰Kimwaanakis ikes iŋes, tolemasi akasirimaete toramiata iŋes nakou.

³¹Ani kedaut ikes akyenar iŋes, tolacasi elou ŋolo kipurat areŋan kitanapa ŋilowi keŋ, yaasi iŋes akibubukin lomusalaba.

³²Ani elomarete ikes kiŋa etaun, toryamut ecekile ŋolo abunit alo Kurene, ŋolo anyaritae Simoni, kitiŋakis iŋes akiryoŋ emusalaba a Yesu.

³³Ani edolete ikes nakwap ŋina anyaritae Gologota, (akeepolou iŋes atemar akwap ŋina ka akuulu,)

³⁴inakis ikes Yesu epiini ŋolo emorikinitae ka apid; ani iiri iŋes, towou akimat.

³⁵Kibubukis ikes iŋes lomusalaba, tokora ŋikeelowi ilamilamete atedor ŋini eai.

³⁶Kidoŋo ikes neni iboiyete iteete iŋes.

³⁷Egiritae kidiama akeekou ŋakiro ŋuna esitakinere iŋes ikona, “ERAE LOGO YESU ERWOSIT A ŊIYUDAYAN.”

³⁸Ekaku kibubukinoe ŋikokolak ŋice ŋiarei daŋ, epei teten keŋ ka ŋoloce kedyany.

³⁹Kimuŋumuŋa ŋulu etorunete nen ŋakyes kec iyanyete iŋes

⁴⁰ebasi, “Okoe! Iyoŋ ŋoon ibala ituwori Akai ka Akuj, ido todukok nabo alotooma ŋirwa ŋiuni! Toiun cenite kirae iyoŋ Lokoku ka Akuj! Todoku alomusalaba!”

⁴¹Ŋisacaradotin daŋ ŋulu apolok ka ŋiketatamak a Ŋikisila ta ŋikatukok tokyenatar iŋes ebasi,

⁴²“Aiununui iŋes paaran ŋituŋa ŋuluce, nai tokona nyeiun iŋes bon! Nyerae mono iŋes erwosit a Ŋisirael a? Ani kedoku iŋes alomusalaba, ikinupi iwon iŋes.

⁴³Ikinyomit iŋes Akuj, toesikisi toiu Akuj iŋes tokona erae kemina iŋes, anerae ebala, ‘Arae ayoŋ Lokoku ka Akuj.’ ”

⁴⁴Ŋikokolak daŋ ŋulu ebubukinitoe ka iŋes, kiyanya iŋes alopite a ŋolopei.

⁴⁵Ameun alosaa a ŋolo a ŋikanikapei tari losaa ŋolo a ŋikanikaomwon ŋulu ka apaaran, kiryoniar akwap daadaŋ cuc.

⁴⁶Ani edoli ŋisaae ŋikanikaomwon, kikalou Yesu nooi tema, “Eli, Eli, lema sabakasani?” Apolou keŋ atemar, “Akuj kaŋ, Akuj kaŋ, kaanukiro ikiesikinia iyoŋ ayoŋ?”

⁴⁷Ani iirarete ŋituŋa ŋice ŋulu awuasi a nen temasi, “Enyarit iŋes Eliya.”

⁴⁸Toem atipei epei alokidiŋ kec tolemu ibore ŋini ekwaan ka acaago, kilumok lopiini ŋolo adadaŋ, toenik nakasirimaete inak iŋes kijuju.

⁴⁹Nai temasi ŋuluce, “Kidareu mono eteutu erae kebuni Eliya aiun iŋes!”

⁵⁰Kiworou nabo Yesu ke etoil a ŋolo apolon, kiridak nai.

⁵¹Tocila anaŋga ŋina eneno alo Kai ka Akuj beret ageun alokidiama tari kwap. Tomaranik akwap tobwaŋabwaŋas ŋamoru.

⁵²Toŋaaros ŋalyalin toyarut ŋawat a ŋikanupak a ŋulu atwakito.

⁵³Torotokis ikes analyalin keyaru Yesu alokatwak, toloto Yerusalem toanyuwasi ŋituŋa ŋulu alalak ikes a nen.

⁵⁴Ani eanyuni ekapolokiniton a ŋisigarya kaapei ka ŋisigarya keŋ epite ŋolo amaranikinia akwap ka ŋakiro daadaŋ ŋuna etiyasi, tobul ikes nooi temasi, “Kire, kerae iŋes Lokoku ka Akuj!”

⁵⁵Ayakasi nen ŋaberu ŋuna alalak ŋuna eteete aneni alwanan ŋuna etiyasi. Atupunete ikes iŋes alo Galileya kiŋaranakinete.

⁵⁶Arae ikes Maria Magadalena ka Maria toto a Yakobo ka Yosepu ta toto a ŋidwe a Sebedeo.

⁵⁷Ani edoli eboŋ, bu ekile ŋolo abarit ŋolo anyaritae Yosepu ŋolo anakwap a ŋina ka Arimatea. Arae iŋes daŋ ekasyoman a Yesu.

⁵⁸Tolot iŋes neni a Pilato, kiŋitak ainakino akuwan a Yesu. Tocamak Pilato atemar inakinae iŋes akuwan a Yesu.

⁵⁹Tolemu Yosepu akuwan, kilogilogak anaŋga ŋina kitete;

⁶⁰kiperik nalyal ŋina kitete, ŋina sek abokit iŋes nataaba aŋuna keŋ ke elope. Kikokorik amoru ŋina apolon lopuke ka alyal, torotok nai iŋes.

⁶¹Eboiyete Maria Magadalena ka Maria ŋinace a epeiwae alyal.

⁶²Ani edoli akoloŋit ŋina a Sabato, totukokin ŋisacaradotin ŋulu apolok ka Ŋiparisayon kiŋaren Pilato

⁶³temasi, “Ekapolon, ikitamunit isua ŋuna abu ekalyokonon ŋol kirwor eriŋa eyari abala, ‘Kelunyar ŋirwa ŋiuni, ayaruni.’

⁶⁴Aŋun, tolimok ŋiketeok alyal kidara ejok todol ŋirwa ŋiuni, ikotere nyelot ŋikasyomak keŋ akokoiyar akuwan keŋ, ido ekaku tolimokis ŋituŋa atemar eteyarun iŋes alokatwak. Eroniar alyokonu ŋina ke ekaku akilo ŋina sek ke ekiŋaren.”

⁶⁵Tolimok Pilato ikes tema, “Iyakatar iyes ŋisigarya ŋulu eteok, kiyakiyasi ikes kiteto alyal ejok lopite ŋolo ipedoryata.”

⁶⁶Toloto nai ikes togolo alyal ejok kimuleleiyasi, kiwuakis ŋisigarya kiteto.