Read ngakarimojong Mat. 3 Bible Online

Mat. 3 - ngakarimojong bible

Mat. 3

¹Alorwa a ŋul, bu Yoana Ekebatisan tolimonok analoŋisat a ŋina a Yudaya

²ebala, “Kibelekinos anasecisya kus, anerae aapuu Apukan ŋina anakuj!”

³Anerae iŋes erworitor ekadwaran Isaya ebala, “Iworoe etoil a ituŋanan a ice analoŋisat ebala, ‘Kitemonokisi erot ŋolo ke Ekapolon; kisidiiryata ŋirotin keŋ!’”

⁴Anapit Yoana elou ŋolo etiyaunitae a ŋajul a ŋuna ke ekaal, tonapite arokoba anacir keŋ, kimuji emaase ka ao analoŋisat.

⁵Toloto ŋituŋa ŋulu alo Yerusalem, Yudaya, ŋulu ka akwap a ŋina a Yorodan neni keŋ,

⁶ido kibatisa Yoana ikes anaŋolol alo Yorodan kedaut alimonor ŋasecisya kec.

⁷Ani iŋolikini Yoana Ŋiparisayon ka Ŋisadukayon ŋulu alalak eponito neni keŋ akibatisao, tolimok ikes tema, “Iyes ŋulu iroko ŋulu ikote ŋapomia, ŋae ikilimokini iyes atemar ipedorete abucar ananyunyura a ŋina ebunit a ŋina ka Akuj?

⁸Kitiyata ŋiticisyo ŋulu itoodiunete atemar ikiwa iyes kire ŋasecisya kus.

⁹Nyitamete alotai kus atemar, ‘Erae Aburaam papa kosi.’ Akalimokini ayoŋ iyes atemar, epedori Akuj akilocokin ŋamoru nu toruworos ŋidwe ŋulu ka Aburaam!

¹⁰Edikino aep iteli ŋikito anataagor; ekitoe daadaŋ ŋolo nyeraii ŋaraito ŋuna ajokak, itelunio tocakakinae nakim.

¹¹“Kire ekebatisae ayoŋ iyes a ŋakipi a ŋuna ka akiki, nai ŋolo ebunit alokaku kaŋ, epol iŋes akilo ayoŋ, nyitemokino ayoŋ akikod tari ŋamuk keŋ. Iŋes ikibatisae iyes a Etau a ŋolo Asegan ka akim.

¹²Eyakar iŋes nakan keŋ erite ikotere epyetarya ŋikeemomwa ejok analos, tocunak lodulae keŋ, kicunyak nai ŋatunyeny anakim a ŋina nyeduŋe.”

¹³Bu Yesu alo Galileya tari Yorodan akibatisao aneni a Yoana.

¹⁴Adikino Yoana ewouni aŋuna abaakar, “Arae ayoŋ etemokino kibatisa iyoŋ, nai ibu iyoŋ neni kaŋ!”

¹⁵Nai toboŋok Yesu iŋes tema, “Kimyek kitiyakin ikona tokona. Anerae erae epite lo iŋes ikisiyookinio iwon ŋuna ecamit Akuj daadaŋ.” Kimyek nai iŋes kitiyakin.

¹⁶Ani kedaun Yesu akibatis, todoku iŋes anakipi tosodi toŋaari nakuj, kiŋolik iŋes Etau ŋolo ka Akuj ebuni alokidiama ikoni akuri, todo neni keŋ.

¹⁷Kiirarae etoil anakuj ebala, “Erae lo Lokoku kaŋ ŋolo minat, alelyani ayoŋ nooi aŋuna keŋ.”