Read ngakarimojong Mat. 4 Bible Online

Mat. 4 - ngakarimojong bible

Mat. 4

¹Ya nai Etau ŋolo ka Akuj Yesu nalongisat, ikotere itemi Satan iŋes.

²Kiriya Yesu eronit ŋapaarasya ka ŋakuwarisya ŋatomoniomwon, ani ekaku tonyam akoro.

³Bu eketemon neni keŋ tema, “Ani kirae iyoŋ Lokoku ka Akuj, kituluwo ŋamoru nu toruworos akimuj.”

⁴Toboŋok Yesu iŋes tema, “Igiritae Nakigireta ebe, ‘Nyeyari ituŋanan ka akimuj bon, nai ka akirot a daadaŋ a ŋina elomunit anakituk ka Akuj.’ ”

⁵Ya Satan Yesu Yerusalem, lotaun ŋolo ka Akuj, kitowuo iŋes alobibiru a ŋolo ka Akai ka Akuj,

⁶tolimok iŋes tema, “Ani kirae iyoŋ Lokoku ka Akuj, kimasar kwap, anerae igiritae Nakigireta ebe, ‘Icikakini Akuj ŋimalaikan keŋ akiyok iyoŋ; igiritae nabo daŋ atemar, ikigagaunete iyoŋ a ŋakan kec, ikotere nyewan amoru tari ŋakejen kon.’ ”

⁷Toboŋok Yesu iŋes tema, “Igiritae nabo ebe, ‘Nyitem Ekapolon Akuj kon.’ ”

⁸Ya nabo Satan Yesu lomoru ŋoloti aoyan, kitoodik iŋes ŋibukui daadaŋ ŋulu ka akwap ka ekecebari daadaŋ,

⁹ido tolimok Satan iŋes tema, “Ani kiryedik iyoŋ alokiŋaren kaŋ ikitopoloo ayoŋ, akajalakini ayoŋ iyoŋ ŋiboro ki daadaŋ.”

¹⁰Tosodi toboŋok Yesu iŋes tema, “Satan tolot! Anerae igiritae Nakigireta ebe, ‘Iryediki iyoŋ kitopoloo Ekapolon Akuj kon, kitiyanak iŋes bon!’ ”

¹¹Torotok nai Satan aneni a Yesu, tosodi potu ŋimalaikan ŋulu ka Akuj kiŋarakis iŋes.

¹²Ani iirari Yesu atemar kikamar Yoana mabus, tori, tolot Galileya.

¹³Toesik iŋes Nasaret, tolot akiboi alotaun a ŋolo a Kaperenaum a ŋolo alodiyete anam Galileya, nakwap ŋina a Sebulon ka Naputali.

¹⁴Atakanunete ŋun ikotere kiyookinotor ŋuna erworit ekadwaran Isaya ebala,

¹⁵“Akwap ŋina a Sebulon ka akwap ŋina a Naputali, ŋuna iyakasi lorot ŋolo eteni nanam ekekwaye Yorodan, Galileya, akwap a ŋituŋa a ŋulu nyerae Ŋiyudayan!

¹⁶Aanyuwasi ŋituŋa ŋulu eboiyete anakiryonut akica ŋina apolon, tari ŋulu eboiyete alotorube a ŋolo ka atwanare, enuaku akica ikes.”

¹⁷Ŋinapei ŋina, kisyak Yesu alimonokin ebala, “Kibelekinos anasecisya kus, anerae aapuu Apukan ŋina anakuj.”

¹⁸Ani itori Yesu diye anam ŋina a Galileya, kiŋolik ŋikaitotoi ŋiarei, Simoni (ŋolo anyaritae Petero) ka lokaato keŋ Anderia, ecakakinete ŋatibae nanam, anerae arae ikes ŋikekamak ŋikolya.

¹⁹Tolimok Yesu ikes tema, “Kiwuapakinae ayoŋ, eketuruwori ayoŋ iyes ŋikekamak ŋituŋa.”

²⁰Kimyekis ikes ŋatibae kec atipei, kiwuapakis iŋes.

²¹Ani erotokini a nen, kiŋolik ŋikaitotoi ŋice ŋiarei, Yakobo ka Yoana, ŋidwe a Sebedeo; arukito ikes ka papa kec anatuba erucete ŋatibae kec. Tonyara Yesu ikes.

²²Kimyekis ikes atipei atuba ka papa kec, kiwuapakis Yesu.

²³Tolot Yesu kirimo Galileya daadaŋ itatami alosinagogae kec ka tolimonokini Ŋakiro ŋuna Ajokak ŋuna ka Apukan ka Akuj, kitaŋaleununuye ŋituŋa alodekesyo a daadaŋ.

²⁴Tokeikin ŋakiro keŋ nakwap a Siria daadaŋ. Yaut ŋituŋa neni keŋ ŋikadyakak daadaŋ ŋulu adyakasi ŋidekesyo ŋulu agelegelya: ŋulu ekamunito ŋipyan, ŋulu erakanarosi ka ŋulu aŋwalak, kitaŋaleu Yesu ikes daadaŋ.

²⁵Kiwuapakis ŋasepico a ŋituŋa ŋuna alalak Yesu, ŋuna aponito alo Galileya, alo Dekapoli, alo Yerusalem, alo Yudaya ka alokekwaye aŋolol Yorodan.