Read ngakarimojong Mat. 7 Bible Online

Mat. 7 - ngakarimojong bible

Mat. 7

¹“Nyitubonokis ŋuluce, ikotere nyikitubokin iyes;

²anerae ikitubonokinio iyes ikwaŋinapei itubonokiniata iyes ŋuluce ka etyae ŋolo iinakinete iyes, iŋes ikiinakinio iyes.

³Kaanukiro iteo iyoŋ imilot anakoŋu a lokaato kon, nai nyite akitoe ŋina eyai nakoŋu kon a ilope?

⁴Nabo ikokini iyoŋ ilimokini lokaato kon atemar, ‘Kimyek olema imilot anakoŋu kon,’ toyai bo akitoe nakoŋu kon ai?

⁵Iyoŋ ekaŋisoswae! Tolema mono akitoe anakoŋu kon, topedo nai akiŋolikin ejok epite ŋolo lemaret imilot anakoŋu a lokaato kon.

⁶“Nyiinakis ŋiŋokwo ibore ŋini einakinitae Akuj ka nyimasakis ŋamoru ŋuna elal egyelit lopegei, anerae ipudaarete ikes a ŋakejen, tosodo kibelekinos akitiji iyes.

⁷“Kiŋita, ikiinakinio; kiwara, iryamunete; kikoŋikoŋo, ikiŋaaryo;

⁸anerae ŋinituŋanan iŋita, einakinio; ŋini iwarit, eryamuni ka ŋini ikoŋikoŋi, eŋaaryo.

⁹Ŋae alokidiŋ kus ŋini ani kiŋit ikoku keŋ iŋes amugati, tosodi inak amoru?

¹⁰Kori ani iŋita ikoku ekolya inak emun?

¹¹Ani kipedorete nai iyes ŋulu iroko ainakin ŋidwe kus ŋiboro ŋulu ajokak, nyepedori nai Papa kus ŋolo anakuj ŋolo ejok ainakin ŋiboro ŋulu ajokak neni a ŋulu iŋitasi a?

¹²Kitiyata neni a ŋuluce ŋuna icamito iyes ikes kitiyata neni kus; ŋun ikes erae apolou a Ŋikisila a Moses ka ŋakitatameta ŋuna a ŋikadwarak.

¹³“Tolomasi alokek a ŋolo adidiŋan, anerae elolom ekek ka epatana erot ŋolo elosi natwanare, elalak ŋulu itorete nen.

¹⁴Nai edidiŋ ekek ŋolo elosi nakiyar ka etyono erot ka ekudyoko ŋituŋa eryamunete.

¹⁵“Tocoito ŋikadwarak ŋulu alyokonok; epote ikes neni kus epataka ikwa ŋamesekin, nai alotai kec ikote ŋipeei.

¹⁶Iyenunete iyes ikes anaraito kec. Egyeryo mono epiini alotiira, kori ŋaboboryo alokodwokodwo a?

¹⁷Aŋun, ekitoe ŋolo ajokan eraii ŋaraito ŋuna ajokak, nai ekitoe ŋolo aronon eraii ŋaraito ŋuna aronok.

¹⁸Nyepedori ekitoe ŋolo ajokan akira ŋaraito ŋuna aronok ka nyepedori ekitoe ŋolo aronon akira ŋaraito ŋuna ajokak.

¹⁹Ŋolokitoe nyeraii ŋaraito ŋuna ajokak eyeparyo tocakakinae nakim.

²⁰Aŋun, iyenunete iyes ŋikadwarak ŋulu alyokonok aloticisyo kec.

²¹“Meere ŋinituŋanan ebala ayoŋ ‘Ekapolon, Ekapolon,’ elomari Napukan ŋina anakuj, nai ŋini itiyae ŋuna ecamit Papa kaŋ ŋolo anakuj iŋes kitiya.

²²Akoloŋit ŋin, etemarete ŋikalalak neni kaŋ, ‘Ekapolon, Ekapolon! Pa aponi isua todwarae alokiro kon ka eritanasi ŋipyan alokiro kon; nabo etiyata ŋakujuwuanisya alokiro kon a?’

²³Alimokini nai ayoŋ ikes otema, ‘Pa akayeni ayoŋ iyes. Toloto aneni kaŋ iyes ŋulu itiyaete aronis!’

²⁴“Aŋun, ituŋanan daadaŋ ŋini iirari ŋakaakiro kitiya, ikwaanikin ka ituŋanan ŋini aoson ŋini adukokini akai keŋ nataaba.

²⁵Kilim akiru, bu akalele ka tokut ekuwuam kai ŋin, nai abu nyeukor, anerae adukokinitae nataaba.

²⁶Ituŋanan daadaŋ ŋini iirari ŋakaakiro nu nyitiya, ikwaanikin ka ituŋanan ŋini abaŋaanan ŋini adukokini akai keŋ nasinyon.

²⁷Kilim akiru, bu akalele ka tokut ekuwuam kai ŋin, toukor eukore ŋolo aronon.”

²⁸Ani edauni Yesu erwor ŋakiro ŋun, toumokis ŋasepico a ŋituŋa aŋuna ka akitatam keŋ,

²⁹anerae etatami iŋes ka apedor, meere ikwa ŋiketatamak a Ŋikisila.