Read ngakarimojong Mat. 8 Bible Online

Mat. 8 - ngakarimojong bible

Mat. 8

¹Ani edokuni Yesu alomukura, kiwuapakis ŋasepico ŋuna alalak iŋes.

²Bu ekile ŋolo ka atapon, toryedik alokiŋaren keŋ tema, “Ekapolon, ani kicamit iyoŋ, ipedori akitaŋaleun.”

³Torwaa Yesu akan keŋ, totap iŋes tema, “Acamit; toŋaleu!” Atipei toŋaleu ekile ŋol.

⁴Kicik Yesu iŋes tema, “Nyilimok idiotuŋanan, nai tolot kitoodiyar neni ka esacaradoti, ikisyem iŋes iyoŋ, ido tolemu ainakinet ikwaŋina icikakinitor Moses, ikotere toanyunia ŋinituŋanan atemar isegu iyoŋ.”

⁵Ani elomari Yesu Kaperenaum, bu ekapolokiniton ŋasigarya amiat kisiryam iŋes, todyek tema,

⁶“Ekapolon, eperi eketiyan kaŋ alore ka eryeba nooi.”

⁷Tolimok Yesu iŋes tema, “Abuni ayoŋ akitaŋaleun iŋes.”

⁸Nai toboŋok ekapolokiniton ŋasigarya tema, “Ekapolon, eketimit ayoŋ abunore iyoŋ kai kaŋ, nai tolimu iyoŋ akirot, eŋaleuni eketiyan kaŋ.

⁹Ayoŋ daŋ ekepukatae, nabo apolokinit ayoŋ daŋ ŋasigarya; ani katema ayoŋ epei, ‘Ape!’ elosi. Ani katema ece, ‘Bua!’ ebuni. Tari epito kaŋ katema ayoŋ, ‘Kitiya nu!’ itiyae.”

¹⁰Ŋolopite eirarya Yesu ŋakiro keŋ, toumok. Tolimok ŋituŋa ŋulu ewuapito iŋes tema, “Akalimokini ayoŋ iyes kire atemar, nyeryamuna ayoŋ anupit ŋina epol ikwa naga tari alo Isirael.

¹¹Akalimokini ayoŋ iyes atemar, epote ŋituŋa ŋulu alalak alo Kide ka ŋice alo To, kiboikinos kimuja ka Aburaam, Isaka ka Yakobo kaapei a Napukan a ŋina anakuj.

¹²Nai ŋituŋa ŋulu emaikina toya Napukan, ecakakinio ikes nakiryonut, kigworo toryeba ŋikyal a nen.”

¹³Tolimok Yesu ekapolokiniton ŋasigarya tema, “Ape lore, itiyakin ŋuna inupit iyoŋ neni kon.” Toŋaleu eketiyan ŋolo ke ekapolon a ŋol ŋinapeipaki.

¹⁴Ani elomari Yesu kai a Petero, toanyua nakamuran a Petero eperi ikamunit elekes nooi.

¹⁵Totap Yesu akan keŋ, toesik elekes iŋes; tosodi aberu tonyou, kisyak akisimuj iŋes.

¹⁶Ani eboŋ, yaut ŋituŋa neni a Yesu ŋituŋa ŋulu alalak ŋulu ekamunito ŋipyan, ido kirita Yesu ŋipyan ŋul ka akirot a ŋina alimuni iŋes, nabo kitaŋaleu ŋulu adyakasi daadaŋ.

¹⁷Etiyae iŋes ŋun, ikotere kiyookinotor ŋuna koloŋ erworo ekadwaran Isaya ebala, “Abu iŋes ya apalagu yok ka kiwok ŋidekesyo yok.”

¹⁸Ani iŋolikini Yesu ŋasepico a ŋituŋa ŋuna alalak irimokinito iŋes kidiŋ, tolimok ŋikeekasyomak alosit ekekwaye anam.

¹⁹Bu eketataman a Ŋikisila neni a Yesu tema, “Eketataman, ekewuapi ayoŋ iyoŋ neni ilosi daadaŋ.”

²⁰Toboŋok Yesu iŋes tema, “Eyakatar ŋikweei ŋaduyon ka eyakatar ŋikyeny ŋakais; nai emam Lokoku a Ituŋanan neni kieŋunet.”

²¹Tema ekile ece ŋolo arae ekasyoman keŋ ebe, “Ekapolon, kimyekinae mono olot akinuk papa kaŋ.”

²²Toboŋok Yesu iŋes tema, “Kiwuapakinae ayoŋ, kimyek ŋikatwak tonuka ŋikatwak kec.”

²³Ani edokari Yesu nataker, kiwuapakis ŋikasyomak keŋ iŋes.

²⁴Ŋinapeipaki, tokut ekuwuam ŋolo apolon ananam, todikino ŋakipi ŋuna emorokokoete erapuwarete ataker. Nai ajotoe Yesu.

²⁵Kiyotosi ŋikasyomak neni keŋ, kitekienyut iŋes temasi, “Ekapolon! Toiunae, edikino ikitwaki.”

²⁶Toboŋok Yesu ikes tema, “Nyo ikibulitor iyes ikona? Abe edit anupit kus!” Tonyou nai Yesu, kikilyak ekuwuam ka ŋakipi, kililiŋ akwap cek.

²⁷Toumokis ŋituŋa daadaŋ temasi, “Anituŋanan ŋini ikoni ne, ŋini epupete tari ekuwuam ka ŋakipi en?”

²⁸Ani edokari Yesu ekekwaye anam, nakwap ŋina a Ŋigadara, kiryamunos iŋes ka ŋikilyok ŋiarei ŋulu apote analyalin ŋulu ekamunito ŋipyan. Etededeŋito ŋipyan ikes nooi. Aŋun, amam ituŋanan etorenene lorot ŋol.

²⁹Kiworout ŋikilyok ŋul temasi, “Anukiro eya iyoŋ ka isua, Lokoku ka Akuj? Ibunit iyoŋ amunyar isua eriŋa apaki nyedolo a?”

³⁰Aapi a nen esipan ŋolo a ŋipegei ŋolo adaka.

³¹Kimaimaa ŋipyan Yesu temasi, “Ani kicamit iyoŋ akiritar isua, kiritarae losipan ye ŋolo a ŋipegei.”

³²Tolimok Yesu ikes tema, “Apesi!” Tolomut ŋipyan alokilyok a ŋul, tolomasi lopegei. Tosuro esipan a ŋipegei daadaŋ anakope toloma nanam, kitamat, totwaka.

³³Toema ŋikeyokok ŋulu a ŋipegei nariet, toloto lotaun tolimosi ŋakiro daadaŋ ŋuna apotu totakanikis lopegei ka lokilyok ŋulu ekamunito ŋipyan.

³⁴Tolot nai etaun daadaŋ akisiryam Yesu. Ani eanyuwarete ikes iŋes, todyeka iŋes arotokin anakwap kec.