Read ngakarimojong Mar. 10 Bible Online

Mar. 10 - ngakarimojong bible

Mar. 10

¹Abu Yesu torotok aina, tolot nakwap ŋina a Yudeya, todoka ekekwaye aŋolol Yorodan, totukokinos ŋasepico neni keŋ. Kitatam iŋes ikes ikwa araakar epite keŋ.

²Potu Ŋiparisayon ŋice ecamito akitem Yesu, kiŋita iŋes temasi, “Ecamakinito mono Ŋikisila yok ekile akilak akeeberu a?”

³Toboŋok iŋes tema, “Alital koloŋ ikicikakinit iyes Moses?”

⁴Temasi ikes, “Abu koloŋ Moses itocamak isua tema ebe epedori ekile akigir abaruwa ŋina ke elakit, tosodi nai totyakas ka aberu keŋ.”

⁵Nai tema Yesu ikes, “Ikigirakinit Moses iyes ŋakiciketa ŋun aŋuna ka aniniku a ŋakusitameta.

⁶Nai anakisyakinet akisub akwap, abu Akuj tosub ikes, ekile ka aberu.

⁷Aŋun, eesikini ekile papa keŋ ka toto keŋ, kimorikinos ka akeeberu.

⁸Toruworos ikes apeikuwan. Aŋun, nyeriŋa ikes erae ŋiarei, nai aruworosi apeikuwan.

⁹Aŋun, ŋulu emorik Akuj, nyitemokino idiotuŋanan etyaki.”

¹⁰Ani elomarete Yesu ka ŋikasyomak kai, kiŋita ŋikasyomak iŋes akirot ŋinapei ŋin.

¹¹Tolimok Yesu ikes tema, “Ŋolokile daadaŋ elaki aberu keŋ, tosodi kiit aberu ace, alom iŋes ka asec alokiŋaren aberu keŋ;

¹²ka ani keŋer aberu ekile keŋ tocamu ekile ece, alom iŋes ka asec alokiŋaren ekile keŋ.”

¹³Torikut ŋituŋa ŋice ŋidwe ŋulu cicik neni a Yesu ecamito iŋes kidokok ŋakeekan neni kec; nai kiŋenyakis ŋikasyomak ŋituŋa.

¹⁴Ani iŋolikini Yesu ŋikasyomak keŋ itiyaete ŋun, toŋo nooi tolimok ikes tema, “Kimyekisi ŋidwe potu neni kaŋ! Nyiretakis ikes, anerae erae Apukan ka Akuj ŋina a ŋulu ikote lu.

¹⁵Akalimokini ayoŋ iyes kire atemar, ŋinituŋanan nyijauni Apukan ka Akuj ikwa ikoku ŋini cici, nyelomari jik Napukan ŋin.”

¹⁶Totun iŋes ŋidwe, kidokok ŋakeekan neni kec, kiterereŋ.

¹⁷Ani erotokini Yesu iwace, tomotun epeikile neni keŋ, toryedik alokiŋaren keŋ, kiŋit iŋes tema, “Eketataman ŋolo ajokan, nyo itemokino ayoŋ etiya oryamunia akiyar ŋina nyedaun?”

¹⁸Kiŋit Yesu iŋes tema, “Kaanukiro ikinyaritor iyoŋ ayoŋ ŋolo ajokan? Emam ituŋanan ŋini ajokan, mati Akuj bon.

¹⁹Iyeni iyoŋ Ŋakiciketa: ‘Nyiar, nyilom, nyikoko, nyisudi ŋakiro, nyitunae ka tokerite papa kon ka toto kon.’”

²⁰Tema ekile ŋol, “Eketataman, ŋinapei koloŋ alokiditeu kaŋ, ericit ayoŋ Ŋakiciketa ŋun daadaŋ.”

²¹Kitek Yesu iŋes, tominak iŋes tema, “Ipeibore bon ikibucit iyoŋ; ape togyela ibore daadaŋ ŋini iyakar iyoŋ, tokorak ŋikulyak, iryamuni iyoŋ ebari kon anakuj.”

²²Ani iirari ekile ŋol ŋakiro ŋun, torotok esiliyorit, anerae abarit iŋes nooi.

²³Toŋoleŋolek Yesu, tolimok ŋikasyomak keŋ tema, “Kitotyon ŋikabarak alomar Napukan ka Akuj!”

²⁴Toumokis ŋikasyomak keŋ aŋuna a ŋakiro a ŋun. Nai tema nabo Yesu neni kec, “Ŋidwe, kitotyon nooi ŋikabarak alomar Napukan ka Akuj.

²⁵Epatana ekaal alomar anapedot a ŋina ke esindan, akilo ekabaran alomar Napukan ka Akuj.”

²⁶Tobul ikes nooi, kiŋita iŋes temasi, “Ŋae bo nai eiun?”

²⁷Kitek Yesu ikes tema, “Nyepedorosi ŋiboro ŋul alotuŋa, nai aneni ka Akuj epedorosi ŋiboro daadaŋ.”

²⁸Kirwor Petero neni a Yesu tema, “Ikiesik isua ŋiboro daadaŋ ikiwuapak iyoŋ.”

²⁹Tolimok Yesu ikes tema, “Akalimokini ayoŋ iyes kire atemar, emam ipei daŋ ŋini aesiki ere keŋ, ŋikaitotoi, ŋakaitotoi, toto keŋ, papa keŋ, ŋidwe kori ŋamanat aŋuna kaŋ ka aŋuna a Ŋakiro a ŋuna Ajokak,

³⁰ŋini nyeryamuni ŋarwa amiat anakwap a na, ŋakais, ŋikaitotoi, ŋakaitotoi, atatoto, ŋidwe ka ŋamanat, nai ka ŋican daŋ. Eryamuni daŋ iŋes rwanu akiyar ŋina nyedaun.

³¹Nai, ŋikalalak ŋulu iŋarenete tokona, isidiyoryo; nabo ŋulu isidiyoro tokona, isiŋarenio.”

³²Ani itipeete Yesu ka ŋikeekasyomak kidiama Yerusalem, kiŋarenikinite iŋes ikes. Toumokinito ikes ka tobulite daŋ ŋulu ewuapito iŋes. Tonyaraiya nai Yesu ŋulutomon ka ŋiarei nawae, tolimok ikes ŋuna epote akitiyakin neni keŋ tema,

³³“Kiirasi! Ikidokari iwon tokona Yerusalem, neni ipotokinere Lokoku a Ituŋanan losacaradotin ŋulu apolok ka loketatamak a Ŋikisila. Etubokinete ikes iŋes atwanare ka ipotokinete daŋ neni a ŋituŋa a ŋulu nyerae Ŋiyudayan.

³⁴Epote ikes akisol iŋes, kimwaanakis, kibuŋata ka toara daŋ; nai kelunyar ŋirwa ŋiuni, eyaruni iŋes.”

³⁵Potu Yakobo ka Yoana, ŋidwe a Sebedeo neni a Yesu temasi, “Eketataman, ikicamit isua iyoŋ ikitiyak isua ŋuna daadaŋ ikiŋisi iyoŋ.”

³⁶Kiŋit Yesu ikes tema, “Nyo icamito iyes ayoŋ eketiyak iyes?”

³⁷Toboŋokis ikes temasi, “Kimyekinae isua eboikinos ipei teten kon ka ipei kedyany kon apaki ŋina iboikinor iyoŋ napolou kon.”

³⁸Tolimok Yesu ikes tema, “Nyiyenete iyes ŋuna ilipasi. Ipedorete iyes akimat ekopo ŋolo a ŋican lo ŋolo alosi ayoŋ akimat a? Kori ipedorete iyes akibatisao ikwaŋina ekebatisatere ayoŋ a?”

³⁹Toboŋokis ikes temasi, “Ikipedori.” Tolimok Yesu ikes tema, “Ekopo ŋolo a ŋican lo ŋolo amasi ayoŋ, imasete iyes daŋ; ebatisimu ŋolo ekebatisatere ayoŋ, ikibatisaere iyes daŋ.

⁴⁰Nai akiboikin teten kori kedyany kaŋ, meere ayoŋ aseuni, anerae erae ŋiwaetin ŋul ŋulu a ŋulu eseunit Akuj.”

⁴¹Ani iirarete ŋikasyomak a Yesu ŋulutomon ŋakiro ŋun, toŋoikis ikes Yoana ka Yakobo.

⁴²Tonyarau Yesu ikes tolimok tema, “Iyenete iyes atemar ŋikepukak a ŋakwapin ipukato ŋakwapin ka adedeŋu, ka ŋulu epolokinito ikes daŋ, ipukato ka apedor.

⁴³Nai nyitemokino ŋun totakanut aneni kus; ani ŋini ecamit apolou alokidiŋ kus, itemokino toruwor eketiyan kus.

⁴⁴Nabo ŋini ecamit akiŋarenikin ŋuluce alokidiŋ kus, itemokino iŋes toruwor epito a ŋuluce a daadaŋ.

⁴⁵Anerae pa abunit Lokoku a Ituŋanan akitiyanakino, nai abunit akitiyanakin ka akijal akeekiyar, toiunere ŋituŋa ŋulu alalak.”

⁴⁶Todolut Yesu ka ŋikeekasyomak Yeriko; ani erotokinete ikes a nen erukito ka asepic ŋina alalan, bu lokoku a Timayo ŋolo anyaritae Batimayo, ŋolo amudukana, kiboikin nawae erot ilipanar.

⁴⁷Ani iirari iŋes atemar erae Yesu ŋolo a Nasaret itorunit nen, kisyak akiwor ebala, “Yesu Lokoku a Daudi, kisyoni ayoŋ!”

⁴⁸Kiyayakis iŋes ŋituŋa ŋulu alalak temasi, “Kililiŋ!” Nai torebor iŋes nooi tema, “Lokoku a Daudi, kisyoni ayoŋ!”

⁴⁹Towo Yesu tema, “Tonyarautu iŋes bu.” Tonyaraut nai ikes emuduk, temasi neni keŋ, “Toen etau, tonyou, ikinyaritae iyoŋ.”

⁵⁰Kimasa iŋes elou keŋ, tokuraun, tolot neni a Yesu.

⁵¹Kiŋit Yesu iŋes tema, “Icamit iyoŋ ekekoki ayoŋ iyoŋ ai?” Toboŋok emuduk tema, “Eketataman, kitekienyunae.”

⁵²Tolimok Yesu iŋes tema, “Ape, ikitaŋaleu iyoŋ akoninupit.” Tokienyu iŋes atipei, kiwuapak Yesu alorot a ŋolo ewuapit Yesu.