Read ngakarimojong Mar. 11 Bible Online

Mar. 11 - ngakarimojong bible

Mar. 11

¹Toapiyasi Yesu ka ŋikeekasyomak Yerusalem, toriŋa eya diyete ŋitaunio ŋulu a Betepage ka Betania, lomoru a ŋikito a ŋulu enyaritae Olipa. Kiyakiya Yesu ŋikasyomak keŋ ŋiarei,

²tolimok ikes tema, “Toloto tolomasi lore ŋolo eyai kiŋaren kus. Ani kilomasi, iryamunete isigirya ŋini eenitae, ŋini emam icetuŋanan adok, tolacut iyaut laalo.

³Ani kikiŋit idiotuŋanan iyes atemar, ‘Kaanukiro ilacata iyes isigirya?’ temasi iyes, ‘Ekapolon iitanit iŋes, inyakunio atipei.’ ”

⁴Toloto ikes, toryamut isigirya eenitae kiŋa epuke diye erot, tolacut iŋes.

⁵Kiŋita ŋituŋa ŋulu awuasi a nen ikes temasi, “Kaanukiro ilacata iyes isigirya?”

⁶Tolimokis nai ŋikasyomak ŋituŋa ŋuna alimokinit Yesu ikes; kimyekis nai ŋituŋa ikes torikosi isigirya.

⁷Torikut nai isigirya neni a Yesu, kidokokis ŋikecelowi kidiama keŋ, kiboikin Yesu kaku keŋ.

⁸Topetanakis ŋituŋa ŋulu alalak ŋikecelowi lorot ka ŋice ŋaten ŋuna etelunete ikes anariet, ŋuna aya ŋakwii.

⁹Ŋituŋa daadaŋ ŋulu alosete alokiŋaren ka alokaku a Yesu, acelasi ebasi, “Osanna! Erereŋ ŋolo ebunit alokiro ke Ekapolon!

¹⁰Erereŋ apukan ŋina a Papa yok a Daudi ŋina ebunit! Osanna toyai kidiama nooi!”

¹¹Toloma nai Yesu Yerusalem tooma Akai ka Akuj kiŋolyanak ŋiboro daadaŋ. Kedau akiŋolyanakin, toloto ka ŋulutomon ka ŋiarei lotaun ŋolo a Betania, aŋuna abunio akwap towaria.

¹²Ani iwalari, toboŋut ikes alo Betania, tonyam Yesu akoro.

¹³Toanyuwa iŋes ebobore aneni alwanan elibit, tolot nai aanyun kepedori aryamun ŋadiboboryo. Ani eapiyari iŋes diye, toryamu erae ŋakwii make; anerae ariŋa apaki ŋina eraeta ŋiboboryo.

¹⁴Kicen Yesu ebobore tema, “Nyenyami nabo ituŋanan ŋaraito kon jik ameun tokona!” Kiirasi tari ŋikasyomak keŋ ŋakiro ŋun.

¹⁵Todolo Yesu ka ŋikeekasyomak Yerusalem. Toloma Yesu Kai ka Akuj, tosurok ŋituŋa daadaŋ ŋulu agyelanarete ka agyelete ŋiboro alo Kai ka Akuj. Kibelukwaana ŋimesae a ŋulu esyecete ŋisiliŋa ka kimasana ŋikicoloŋo a ŋulu agyelanarete ŋakuryo.

¹⁶Nyecamak iŋes idiotuŋanan elomarya idiobore kiŋa Akai ka Akuj.

¹⁷Kisyak Yesu akitatam ebala, “Elimunitoe alotooma Ŋakigireta ebe, ‘Enyarao Akai kaŋ Akai ŋina ilipyata ŋituŋa ŋulu a ŋibukui a daadaŋ,’ nai tokona, ituruwosi iyes iŋes Akai ŋina eŋopitotor ŋikokolak!”

¹⁸Ani iirarete ŋisacaradotin ŋulu apolok ka ŋiketatamak a Ŋikisila ŋakiro ŋun, totamatamata epite ŋoloaret iŋes. Nai akerito ikes Yesu, anerae aumokinit asepic daadaŋ aŋuna ka akitatam keŋ.

¹⁹Ani ewari, torotokis Yesu ka ŋikasyomak keŋ alotaun a ŋol.

²⁰Ani taparacu itorete ikes diye ebobore, toanyuwasi keono deu, ameun anataagor.

²¹Totamu Petero ŋakiro a Yesu neni ke ekitoe, tema, “Eketataman, toanyuwa, keono ebobore ŋolo iceni iyoŋ.”

²²Toboŋok Yesu ikes tema, “Toyakatar anupit neni ka Akuj.

²³Anerae akalimokini ayoŋ iyes kire atemar, ŋinituŋanan etemari emoru lo ‘Kiyoto a ne, kimasar nanam;’ ani pa keŋayaŋayat alotau keŋ, nai tonupite atemar itiyakin ŋuna daadaŋ irworo iŋes kire, itiyakinio neni keŋ.

²⁴Aŋun, akalimokini ayoŋ iyes atemar, ŋinibore iŋitasi iyes ilipete ka tonupito atemar idaut aryamun, iryamunete iyes.

²⁵Apaki daadaŋ ŋina ilipyata iyes, kisyonioto ŋini daadaŋ itiyat aronis neni kus, ikotere Papa kus daŋ ŋolo eyai nakuj ikisyoni iyes. [

²⁶Ani pa kisyonioto iyes ŋuluce, Papa kus daŋ ŋolo eyai nakuj nyikisyoni iyes.]”

²⁷Toboŋut ikes nabo Yerusalem. Ani elosi Yesu alo Kai ka Akuj, potu ŋisacaradotin ŋulu apolok ka ŋiketatamak a Ŋikisila ta ŋikatukok neni keŋ

²⁸temasi, “Anipedor iyakar iyoŋ, ŋina itiyaa ŋakiro nu? Ŋae ikiinakinit iyoŋ apedor ŋinakitiyaet ikes?”

²⁹Toboŋok Yesu ikes tema, “Ekeŋisi ayoŋ iyes akiŋiset apei bon; ani kiboŋokis iyes, akalimokini ayoŋ iyes neni ebunitor apedor ŋina etiyaa ayoŋ ŋakiro nu.

³⁰Ai abunitor akibatis a Yoana, nakuj kori lotuŋa? Toboŋokinoe ayoŋ!”

³¹Kiŋitanaros ikes make ebasi, “Ani kikitema abunit anakuj, etemari iŋes, ‘Nyo bo pa inupitotor iyes iŋes?’

³²Ikitemari mono abunit alotuŋa a?” (Akerito ikes ŋituŋa, anerae anupito ŋulu alalak atemar arae Yoana ekadwaran ŋolo a kire.)

³³Aŋakiro a ŋun, toboŋokis ikes Yesu temasi, “Nyikiyeni isua.” Tolimok Yesu ikes tema, “Ayoŋ daŋ nyakalimokini iyes neni ebunitor apedor ŋina etiyaa ayoŋ ŋakiro nu.”