Read ngakarimojong Mar. 13 Bible Online

Mar. 13 - ngakarimojong bible

Mar. 13

¹Ani elomuni Yesu alo Kai ka Akuj, tema epei alokasyomak keŋ, “Eketataman, kiŋolik! Okoe kibusyata ŋamoru nu ka ŋaduketa!”

²Tema Yesu iŋes, “Ite iyoŋ ŋaduketa ŋuna apolok nu a? Emam amoru apei daŋ ŋina idoŋi kidiama ŋinace nyeukoro.”

³Ŋolopite eboiyo Yesu alomoru a ŋikito a ŋulu enyaritae Olipa, a ŋolo eteosi ka Akai ka Akuj, kiŋita Petero, Yakobo, Yoana ka Anderia iŋes aneni kec bon temasi,

⁴“Tolimokinae isua apaki ŋina etakanuniata ŋakiro ŋun, nyo itoodiuni atemar adol akoloŋit ŋina a ŋakiro a ŋun?”

⁵Tolimok Yesu ikes tema, “Tocoikinito nyikimodik idiotuŋanan iyes.

⁶Anerae epote ŋikalalak irworosi alokiro kaŋ ebasi, ‘Arae ayoŋ Kristo!’ Emodikinete ka itooliyorete ŋikalalak.

⁷Ani iirarete iyes ŋijiyesyo ka ŋiemuto ŋulu a ŋijiyesyo, nyikibul, anerae itemokino ŋul totakanut, nai nyitoodiunito ikes asalunet.

⁸Ejikinosi ŋituŋa ŋulu ka akwap kaapei ka ŋulu ka akwap a ŋinace, ejikin apukan ka apukan, emaranikini akwap anakiboisyo a ŋuna egelegelya ka eyakaun ŋironia. Erae ŋin akisyakinet a ŋican, ikwaŋina egeunia aberu aryeba edoli akidoun.

⁹“Tocoito iyes, anerae epote ikes arikor iyes loikiikoe ka ikibuŋaete alosinagogae. Ikitowuoyo iyes alokiŋaren ŋikepukak ka ŋikapolok ŋice daŋ aŋuna kaŋ. Apaki ŋin, iŋes iruworotor iyes ŋisuudae kaŋ.

¹⁰Nai itemokino mono kitatamae Ŋakiro ŋuna Ajokak nakwapin daadaŋ.

¹¹Ani ikirikorete ikes iyes loikiiko, nyiberakinosi akiyaloloŋ ikotere ŋuna ilosete iyes alimokin ikes. Nai kirworo ŋuna ikiinakinio iyes akirwor apaki ŋina ikiinere iyes akirworikin, anerae meere iyes irworosi, nai Etau ŋolo Asegan.

¹²Ebuni lokaato akipotor lokaato keŋ toarae, papa daŋ ipotori ikeekoku; isyakinete ŋidwe akisubura ŋikecekauruunak ka ipotorete ikes toarae.

¹³Ikiŋerete iyes ŋituŋa daadaŋ aŋuna ke ekaakiro; nai ŋini etitinyikini tari nasalunet, eiunio.”

¹⁴“Iŋolikinete iyes asiilyo etakanuni neni nyitemokino etakanunia. (Itemokino ŋini esyomi toyenu apolou a ŋakiro a ŋun!) Apaki ŋin, itemokino ŋulu eyakasi Yudeya, toema lomoru.

¹⁵Ituŋanan ŋini eyai kidiama akai, nyedoku kwap, kori nyeloma alemun idiobore alokai keŋ.

¹⁶Ituŋanan ŋini eyai lomanikor, itemokino nyeboŋu lore alemun elou keŋ.

¹⁷Erokyarosi ŋakiro aneni a ŋaberu a ŋuna epotiyete kori itanakete alorwa a ŋul.

¹⁸Kilipa nyetakanut ŋun ŋirwa ŋulu ka alilimu.

¹⁹Anerae alorwa a ŋul, eyakaunosi ŋakisicaneta ŋuna nyetakanuna ŋinapei koloŋ kesubia Akuj ŋiboro daadaŋ anakwap tari tokona; kori nyepote nabo jik ŋican ŋulu ikote ŋul.

²⁰Kerae nyituuruwuanit Akuj ŋirwa ŋul, kemam ituŋanan epuun. Nai aŋuna aminar Akuj ŋulu aseunit iŋes, abu kituuruwuan ŋirwa ŋul.

²¹“Ani kikilimok iyes ituŋanan tema, ‘Kiŋolikisi, Kristo iŋes lo,’ kori ‘Kiŋolikisi, iŋes ye’, nyinupa ŋakiro keŋ.

²²Anerae epote ŋikamodyanakinak ka ŋikadwarak ŋulu amodiyanak ebasi ebe ikirae ikes atakristo. Epote ikes akitiya ŋakitoodyanakineta ŋuna ailiilok ŋuna isuparete ŋituŋa ŋulu seuna erae kepedorete.

²³Tocoikinito! Adau ayoŋ alimokin iyes ŋakiro daadaŋ eriŋa ŋirwa ŋul nyedoluno.”

²⁴“Nai alorwa a ŋul, kelunyar ŋican, isiryonio akoloŋ ka nyecauni elap.

²⁵Ecakunosi ŋikacer anakuj, emaranikinete ŋisubuna daadaŋ ŋulu eya kidiama.

²⁶Apaki ŋin, iŋolikinete ŋituŋa Lokoku a Ituŋanan ebunit alodowuon ka apedor a ŋina apolon ka akica keŋ.

²⁷Ebuni iŋes akiyakiyar ŋimalaikan acunakin ŋituŋa daadaŋ ŋulu seuna alowaetin ka akwap a daadaŋ, ameun anakisyakinet tari nasalunet.”

²⁸“Toyenutu akitatamet ŋina ke ebobore. Ŋolopite ipuriteunioto ka elibuniata ŋakwii ŋuna a ŋaten keŋ, iyenunete iyes atemar aapuu akamu.

²⁹Ikwaŋinapei, iyes daŋ ŋina iŋolikiniata ŋakiro ŋun etakanunete, toyenutu atemar aapuu Lokoku a Ituŋanan, adolu lokekia kus.

³⁰Akalimokini ayoŋ iyes kire atemar, nyelunyar anyamet na eriŋa nyetakanuna ŋakiro ŋun daadaŋ.

³¹Edaunosi nakuj ka akwap, nai nyedaunosi ŋakaakiro jik.”

³²“Nai, ŋuna ka Akoloŋit a ŋin, kori ke esaa a ŋol, emam ituŋanan eyeni, nyeyenete tari ŋimalaikan ŋulu ka Akuj, kori Lokoku daŋ, nai mati Papa bon.

³³Tocoito, tokienyete, anerae nyiyenete apaki ŋina edolunio esaa ŋol.

³⁴Ikoni apaki ŋin ituŋanan ŋini anyouni alore keŋ, tolot iwace, kimyek ekeere, inak ŋiketiyak keŋ apedor, ŋoloketiyan ekeetic. Kicikak eketen ekidor akikieny apaki daadaŋ.

³⁵Tokienyete nai, anerae nyiyenete iyes apaki ŋina eboŋunio elope ŋolo ke ere; kerae eboŋ, kori kidiŋ akuwar, kori ebai, kori taparacu.

³⁶Ikotere ani kebu iŋes atipei, nyikiryamu iyes ijotoete.

³⁷Ŋuna akalimok ayoŋ iyes, alimok ŋituŋa daadaŋ. Tokienyete!”