Read ngakarimojong Mar. 15 Bible Online

Mar. 15 - ngakarimojong bible

Mar. 15

¹Taparacu sek, totukokinos ŋisacaradotin ŋulu apolok ka ŋikatukok ka ŋiketatamak ŋulu a Ŋikisila ta Atukot daadaŋ. Toena ikes Yesu torikosi inakis Pilato.

²Kiŋit Pilato Yesu tema, “Irae iyoŋ erwosit a Ŋiyudayan a?” Toboŋok Yesu iŋes, “Ilimu iyoŋ.”

³Kisitakis ŋisacaradotin ŋulu apolok Yesu a ŋakiro a ŋuna alalak.

⁴Kiŋit nabo Pilato Yesu tema, “Emam ŋuna iboŋokini iyoŋ a? Kiira iyoŋ ŋakiro ŋuna ikisitakinitotor ikes iyoŋ, elalak!”

⁵Nai nyeboŋok Yesu adiokirot daŋ. Toumok nai Pilato nooi.

⁶Anasuban a daadaŋ a ŋuna a Paska, amina Pilato alacanakin emabus daadaŋ ŋolo iŋisete ŋituŋa iŋes alacakin.

⁷Ayai epei ŋolo anyaritae Baraba, ŋolo aŋerit apukan, ŋolo aenitae alomabus kaapei ka ŋulu aŋerito apukan, ŋulu kepotu toara icetuŋanan alojiye.

⁸Tocelut ŋituŋa, kisyakis akilip Pilato alacakin emabus ikwaŋinapei sek elacanakinia.

⁹Toboŋok Pilato ikes tema, “Icamito iyes olacak ayoŋ erwosit a Ŋiyudayan a?”

¹⁰Totamu Pilato atemar, “Ekepotokis ŋisacaradotin ŋulu apolok ayoŋ Yesu aŋuna ka arakao.”

¹¹Kicocoa nai ŋisacaradotin ŋulu apolok ŋituŋa temasi, “Tolimokisi Pilato tolacak Baraba.”

¹²Kiŋit nabo Pilato ŋituŋa tema, “Ekokini ayoŋ ekile lo ŋolo ibasi iyes erwosit a Ŋiyudayan ai?”

¹³Tocelut nabo ikes temasi, “Kibubuk iŋes lomusalaba!”

¹⁴Kiŋit Pilato ikes tema, “Nyo esecit iŋes?” Tocelut nabo nooi temasi, “Kibubuk iŋes!”

¹⁵Aŋuna acamitor Pilato akitalakar aruruma ŋin, abu tolacak Baraba. Kisibuŋa ŋisigarya Yesu, ani irikakinete, yaasi ikes iŋes kibubukis lomusalaba.

¹⁶Torikosi ŋisigarya Yesu tooma kai ŋina ke ekawuoikiniton ekepukan a Roma anakwap a ŋin, tonyaraut ŋisigarya ŋuluce daadaŋ.

¹⁷Kitanapa Yesu elou ŋolo kipurat areŋan, toyeut aikit ŋina a ŋikukwa, kiwuakis nakou keŋ.

¹⁸Kisyakis akyenar iŋes imalaete ebasi, “Toyai jik erwosit a Ŋiyudayan!”

¹⁹Kikoŋikoŋo akeekou a ebela, kimwaanakis iŋes ka toryediko alokiŋaren keŋ.

²⁰Kedaut akisol iŋes, tolacasi elou ŋolo kipurat areŋan aneni keŋ, kitanapikis nai ŋilowi keŋ. Yaa ikes iŋes akibubukin lomusalaba.

²¹Kiryamas ikes lorot ka ecekaloton ŋolo anyaritae Simoni, papa ka Alekisanda ka Rupus. Arae iŋes ŋolo alo Kurene, alosi lotaun. Toreikis ikes iŋes akiryoŋ emusalaba a Yesu.

²²Torikosi ikes Yesu tari Gologota, akeepolou iŋes atemar, “Akwap ŋina ka Akuulu.”

²³Inakis ikes iŋes epiini ŋolo enyalitae ka apid, towou Yesu akimat.

²⁴Kibubukis ikes Yesu, tokora ŋikeelowi, kilamilama ikotere totedoryata ŋini elemari elou ŋolo alacunete ikes aneni a Yesu, kiwuakis kiŋaren kec.

²⁵Ebubukinio Yesu lomusalaba ŋisaae ŋiuni ŋulu ka ataparacu.

²⁶Kigira lomusalaba ŋakiro ŋuna esitakinitere ebe, “ERWOSIT A ŊIYUDAYAN”.

²⁷Kibubukis ikes ŋikademanarak ŋiarei kaapei ka iŋes, epei teten ka ŋoloce kedyany keŋ. [

²⁸Kiyookinotor Ŋakigireta ŋuna igiritae ebe, “Aponi kimarakinae iŋes kaapei ka ŋikasecak.”]

²⁹Ŋituŋa daadaŋ ŋulu kepotu kitorut nen, kiyanya yesu, kimuŋimuŋete ŋakyes ebasi, “Okoe! Iyoŋ ŋoon ibala ebe ituwori Akai ka Akuj, ido todukok nabo alotooma ŋirwa ŋiuni!

³⁰Toiun iyoŋ bon, todoku alomusalaba!”

³¹Ŋisacaradotin daŋ ŋulu apolok kaapei ka ŋiketatamak a Ŋikisila kisoloto iŋes ebasi, “Aiununui iŋes paaran ŋulucetuŋa, nai tokona nyeiun iŋes bon.

³²Eteutu cenite Kristo, erwosit a Isirael, edokuni alomusalaba; ikotere ikiyanyuni ka ikinupi daŋ.” Tari ŋulu ebubukinitoe kaapei ka iŋes, apotu tojamuwasi iŋes.

³³Ameun ŋisaae ŋikanikapei tari ŋikanikaomwon ŋulu ka apaaran, kiryoniar akwap daadaŋ cuc.

³⁴Ani edoli ŋisaae ŋikanikaomwon, kiworou Yesu a etoil a ŋolo apolon tema, “Eloi, Eloi, lama sabakasani?” Akeepolou iŋes atemar, “Akuj kaŋ, Akuj kaŋ, kaanukiro ikiesikinia iyoŋ ayoŋ?”

³⁵Ani iirarete ŋituŋa ŋulu edunyito iŋes ŋakiro ŋun, temasi, “Kiirasi, enyarit iŋes Eliya.”

³⁶Tomotun epei alokidiŋ kec, kilumok ibore ŋini yabuk lopiini ŋolo adadaŋan, toenik lobela, inak Yesu tomat. Tema iŋes ebe, “Edareutu mono! Eteutu cenite kebuni Eliya alacun iŋes alomusalaba.”

³⁷Kiworou Yesu a etoil a ŋolo apolon, kiridak nai.

³⁸Tocila anaŋga ŋina eneno alo Kai ka Akuj beret ageun alokidiama tari kwap.

³⁹Ŋolopite aanyuwarya ekapolokiniton ŋisigarya amiat ŋolo awuoi a nen atemar eridak Yesu tema, “Kire, kerae ekile lo Lokoku ka Akuj.”

⁴⁰Toyakas ŋaberu ŋace ŋuna eteete iŋes aneni alwanan, arae Maria Magadalena, Maria toto a Yakobo ka Yose ta Salome.

⁴¹Ani apaki ŋina ayakar iŋes Galileya, apotu ikes tonupa ŋakiro keŋ ka kiŋaranakinete iŋes. Aya nabo daŋ ŋaberu ŋuna alalak ŋuna apote kaapei ka Yesu tari Yerusalem.

⁴²Ani eboŋ akoloŋit ŋina a ŋakan ŋina etemonokinere aŋuna a Sabato,

⁴³bu Yosepu ŋolo ka Arimatea. Arae iŋes ekile ŋolo apolon a Natukot a Ŋiyudayan ka edarit Apukan ka Akuj bu. Tolot iŋes neni a Pilato, kiŋitak akuwan a Yesu.

⁴⁴Toumok Pilato iirari atemar keris Yesu atwana. Tonyara iŋes ekarikon a ŋisigarya amiat, kiŋit iŋes erae kire ketwanit Yesu.

⁴⁵Kedau Pilato akiirar aneni ke ekarikon a ŋisigarya, abu tocamak Yosepu alemar akuwan a Yesu.

⁴⁶Togyelu Yosepu anaŋga, ani kelemu akuwan kwap, kilogilogak anaŋga. Tosodi ya akuwan a Yesu nalyal ŋina abokakinitae nataaba. Kikokorik amoru ŋina apolon lokek ka alyal.

⁴⁷Kiteete Maria Magadalena ka Maria toto a Yose, neni eperikinio akuwan a Yesu.