Read ngakarimojong Mar. 16 Bible Online

Mar. 16 - ngakarimojong bible

Mar. 16

¹Ani kelunyar akoloŋit ŋina a Sabato, togyelut Maria Magadalena ka Maria toto a Yakobo, ta Salome akimyet ŋina akukunyon, ikotere kiwosyata akuwan a Yesu.

²Ani taparacu Esabit ipiripiriuni akoloŋ, toloto ikes nalyal.

³Kirworos alorot make ebasi, “Ŋae ikiŋarakini iwon akikokoriyor amoru alokek ka alyal?”

⁴Ani nai ireorete ikes kidiama, toanyuwasi amoru kikokoriyor nawae, torae bo amoru ŋina apol nooi.

⁵Toloto jik, ani elomarete ikes nalyal, toanyuwasi ekile ŋolo sorokit iboi alowae a ŋolo aloteten, enapit elou ŋolo akwaŋan kya. Tobul ikes nooi.

⁶Tolimok iŋes ikes tema, “Nyikibul! Ayeni ayoŋ atemar, iwarito iyes Yesu ŋolo a Nasaret, ŋolo ebubukinitoe lomusalaba. Ayaru iŋes, emam a ne. Kiŋolikisi neni eperikinitoe iŋes.

⁷Nai toloto, tolimokisi ŋikeekasyomak ka Petero atemar, ‘Elosi iŋes Galileya, ikiŋarenikini iyes! Iryamunete iŋes aina, ikwapei ikilimokinitor iŋes iyes.’ ”

⁸Kelomasi ikes kiŋa, toema analyal, anerae amaranete ka tobulite daŋ. Nyelimokis ikes idiotuŋanan ŋakiro ŋun, anerae abulit ikes nooi. [

⁹Ani keyaru Yesu taparacu akoloŋit ŋina ke Esabit, totakanu iŋes neni a Maria Magadalena ŋina eritari iŋes ŋipyan ŋikanikaarei aneni keŋ.

¹⁰Tolot iŋes, tolimok ŋirukitos keŋ ŋulu egworosi ka kiyaloloŋete daŋ.

¹¹Ani iirarete ikes Maria Magadalena ebala, “Ayaru Yesu, eŋolik ayoŋ”, nyenupa ikes ŋakiro keŋ.

¹²Ekaku, totakanu Yesu egelaana neni a ŋuluarei, apaki ŋina alosyoto ikes alorot.

¹³Toloto ikes tolimokis ŋuluce, nai nyenupa ikes daŋ.

¹⁴Ekaku, abu Yesu totakanu neni a ŋikasyomak keŋ a ŋulutomon ka epei apaki ŋina emujata. Kisibura iŋes ikes aŋuna pa anupitotor ka aŋuna ka aniniku a ŋatameta kec, anerae nyenupa ikes ŋakiro a ŋulu kepotu toanyut iŋes eyaruni.

¹⁵Tolimok Yesu ikes tema, “Apesi nakwapin daadaŋ, kitatama ŋituŋa daadaŋ Ŋakiro ŋuna Ajokak ŋuna ka Akuj.

¹⁶Ituŋanan ŋini enupi kibatisae, eiunio, nai ŋini nyenupi, etubokinio.

¹⁷Ŋakujuwuanisya ŋuna einakinio ŋikanupak akitiya ikes nu: iritanarete ikes ŋipyan alokiro kaŋ, epedorete erwor ŋaŋajepa ŋuna kitet;

¹⁸ikamunete ikes ŋimuno a ŋakecekan, kemata ikes tari ibore ŋini aaran, nyewani ikes jik; idokokinete ŋakecekan lokadyakak, kitaŋaleut.”

¹⁹Kedau Ekapolon Yesu erwori neni kec, aponi yae iŋes nakuj, kiboikin nakan ŋina aloteten Akuj.

²⁰Toloto ŋikasyomak alimonokin Ŋakiro ŋuna Ajokak lobukui daadaŋ, kitiyata ikes ka Ekapolon kaapei, kitoodiun daŋ akitatam kec erae ŋina iyookino aŋuna a ŋakujuwuanisya a ŋuna etiyaete ikes.]