Read ngakarimojong Mar. 3 Bible Online

Mar. 3 - ngakarimojong bible

Mar. 3

¹Toloma nabo Yesu losinagoga, ayai nen ekile ŋolo amitarit akan.

²Tolokut ŋituŋa iŋes kepedori akitaŋaleun ekile ŋol akoloŋit ŋina a Sabato, ikotere isitakiniata iŋes.

³Tonyara Yesu ekile ŋolo amitarit akan tema, “Bua kiŋaren nege.”

⁴Kiŋit ŋituŋa tema, “Nyo ecamakinitae kitiyae akoloŋit ŋina a Sabato, ŋuna ajokak kori ŋuna aronok, akiteyar kori akiar?” Kililiŋa ikes cek.

⁵Kitek Yesu ikes daadaŋ eŋoit, kitiilito daŋ aŋuna ka aniniku a ŋakecetameta. Tolimok nai ekaŋwalan tema, “Toriyo akonikan.” Toriyo iŋes, toŋaleu akeekan.

⁶Tolomasi Ŋiparisayon kiŋa, totukut kaapei ka ŋituŋa ŋulu ka atukot a ŋina ke Erode epite ŋoloaret Yesu.

⁷Toloto Yesu ka ŋikeekasyomak nanam, kiwuapakis ŋasepico ŋuna aponito alo Galileya, alo Yudaya,

⁸Yerusalem, Idumea; ka anakwap a ŋina alokekwaye Yorodan ka ŋice daŋ alokidiŋ Tiro ka Sidon. Tocunun ŋituŋa ŋulu alalak neni keŋ, aŋuna sek kiiraritotor ŋuna ajokak ŋuna etiyae Yesu.

⁹Tolimok Yesu ŋikeekasyomak akitaapuun ataker neni keŋ, ikotere nyeridyata ŋituŋa iŋes,

¹⁰anerae abu iŋes kitaŋaleu ŋituŋa ŋulu alalak. Todiŋuna ŋulu adyakasi daŋ ecamito akitap iŋes.

¹¹Ŋinapaki daadaŋ iŋolikiniata ŋituŋa ŋulu a ŋipyan Yesu, aramanakin ikes kiŋaren keŋ, kiworoete ebasi, “Irae iyoŋ Lokoku ka Akuj!”

¹²Tolimok Yesu ikes tema, “Nyikiteyan ayoŋ ŋituŋa!”

¹³Todoka Yesu lomukura, tonyarau ŋituŋa ŋulu acamit iŋes, potu nai ŋul neni keŋ.

¹⁴Toseu iŋes ŋikilyok ŋitomon ka ŋiarei, tolimok ikes tema, “Akaseu ayoŋ iyes oruko ka ayoŋ toloseneneete akitatam

¹⁵ka toryamut apedor ŋina kiritanaret ŋipyan.”

¹⁶Ŋirorwa a ŋikilyok a ŋulutomon ka ŋiarei ikes luta: Simoni (ŋolo abu Yesu tolimok ecekiro Petero),

¹⁷Yakobo ka lokaato keŋ Yoana, ŋidwe a Sebedeo, ŋulu abu Yesu tolimok ekecekiro Boanerige, (iŋes atemar ŋidwe ŋulu adedeŋ ikwa agirokinet),

¹⁸Anderia, Pilipo, Batolomayo, Matayo, Tomas ka Yakobo lokoku ka Alipayo, Tadeo, Simoni ŋolo arae Eseletoit

¹⁹ka Yuda Isikariot ŋolo alukini Yesu.

²⁰Tolot nai Yesu lore, tocunun nabo asepic neni keŋ, todaun iŋes ka ŋikeekasyomak apaki ŋinakimujet.

²¹Ŋina eiraryata ŋituŋa keŋ ŋakiro ŋun, toloto arikun iŋes, anerae abasi ŋituŋa ebe ekerepik iŋes.

²²Tari ŋiketatamak a Ŋikisila ŋulu apote alo Yerusalem temasi, “Eyai iŋes Belesebul ŋolo isiritanari iŋes ŋipyan, ŋolo erae daŋ ekapolon a ŋipyan.”

²³Tonyarau nai Yesu ŋituŋa neni keŋ, kisirwor ikes a ŋakitadapeta tema, “Ikokini Satan iritari Satan ai?

²⁴Akwap ŋina etyakatyakatar ŋituŋa bon, nyepedori akicat.

²⁵Ani ketyakatyakasi ŋituŋa ŋulu ke epeikal, nyepedorete akiboi kaapei.

²⁶Ani kelosikin Satan bon, nyepedori akicat, nai esaluni.

²⁷“Emam ituŋanan ŋini epedori alomar kai a ituŋanan a ŋini agogoŋon ademar ŋikeeboro, mati mono keen elope a ŋiboro a ŋul; tosodi nai tolema ŋiboro alokai keŋ.

²⁸“Akalimokini ayoŋ iyes kire atemar, isyoniyo ŋasecisya a ŋituŋa daadaŋ ka ŋiyany kec.

²⁹Nai iŋes ŋini iyanyi Etau ŋolo Asegan, nyisyoniyo jik, anerae asec iŋes asecit ŋina nyisyoniyeneneo.”

³⁰Alimuni Yesu ŋun, anerae abasi ŋituŋa ŋice, “Ikamunit ekipye iŋes.”

³¹Potu Maria ka ŋikaitotoi a Yesu, towua alokiŋa akai, kiyakiyasi nai ituŋanan anyarare Yesu.

³²Kiboiyete ŋituŋa ŋulu alalak anawae Yesu. Tolimokis ikes iŋes temasi, “Eyakasi toto kon ka ŋikaitotoi kon kiŋa ikinyarito iyoŋ.”

³³Toboŋok Yesu ikes tema, “Ŋae toto kaŋ ka ataŋae ŋikaitotoi kaŋ?”

³⁴Kitek iŋes daadaŋ ŋulu aya nawae keŋ, tolimok tema, “Kiŋolikisi, lugu ikes erae toto kaŋ ka ŋikaitotoi kaŋ!

³⁵Aŋun, ŋini itiyae ŋuna ecamit Akuj, iŋes erae lokaato kaŋ, nakaato kaŋ ka toto kaŋ.”