Read ngakarimojong Mar. 4 Bible Online

Mar. 4 - ngakarimojong bible

Mar. 4

¹Togeu nabo Yesu akitatam alodiye anam ŋina a Galileya. Potu ŋituŋa ŋulu alalak nooi neni keŋ, todoka nai iŋes nataker, kiboikin. Ayai ataker nanam, toya ŋituŋa lokipetot.

²Kitatam iŋes ŋakiro ŋuna alalak a ŋakitadapeta, tema anakitatam keŋ,

³“Kiirasi! Abu eketan tolot aere ŋikinyom lomanikor.

⁴Ani eekini iŋes, todoto ŋikinyom ŋice lorot, potu ŋikyeny kidepasi.

⁵Todoto ŋice loŋaro neni amam ŋalup ŋuna alalak, toruput atipei, anerae akudyoko ŋalup.

⁶Ani enomokini akoloŋ ikes, torinyiyosi tooko.

⁷Todoto ŋice kidiŋ ŋikukwa, toruput, nai ani epolounete ŋikukwa, toridakis ikes.

⁸Todoto ŋice nalup ŋuna ajokak, topolout toraa, ece ŋatomoniuni, ece ŋatomonikanikapei ka ece amiat.”

⁹Tolimok nai Yesu ikes tema, “Iŋes ŋini eya ŋaki ŋuna kiiraret, kiira.”

¹⁰Ani iboi Yesu aneni keŋ bon, potu ŋikasyomak keŋ ŋulutomon ka ŋiarei ta ŋituŋa ŋulu aris keyenut iŋes, kiŋita apolou ŋina a ŋakitadapeta.

¹¹Toboŋok Yesu ikes tema, “Ikiinakinitae iyes ayenun ŋuna imunono ŋuna ka Apukan ka Akuj. Nai ŋituŋa ŋuluce itatamio a ŋakitadapeta,

¹²ikotere ‘Ani kiŋolikis daŋ, nyeanyuwasi; ani kepuput daŋ, nyiirasi. Anerae kerae toanyuwarito ka kiirarito, keboŋorito neni ka Akuj akisyonio.’ ”

¹³Kiŋit Yesu ikes tema, “Nyiirara iyes apolou ŋina ka akitadapet a ŋin a? Ikokinete nai iyes iirarete apolou ŋina a ŋakitadapeta a ŋunace a daadaŋ ai?

¹⁴Eekini eketan ŋakiro ŋuna ka Akuj.

¹⁵Ikote ŋicetuŋa ŋikinyom ŋulu apotu todoto lorot, ŋinapei iiraryata ikes ŋakiro ŋuna ka Akuj, bu Satan atipei, tolema ŋakiro ŋuna aris keekin neni kec.

¹⁶Ikote ŋicetuŋa ŋikinyom ŋulu adoete loŋaro neni akudyoko ŋalup. Ŋinapei iiraryata ikes ŋakiro ŋuna ka Akuj, kijaut atipei ka alakara.

¹⁷Nai emamukatar ikes ŋataagor alotooma kec ka nyeroparete; ani epote ŋican ka ŋatyokisyo aŋuna a ŋakiro a ŋun, toesikis ikes.

¹⁸Ikote ŋicetuŋa ŋikinyom ŋulu apotu todoto tooma lokukwa; ikes ŋulu iirarete ŋakiro ŋuna ka Akuj,

¹⁹nai amitakinit ŋuna ka akwap, ekibure ŋolo ke ebari, ka ekibure ŋolo a ŋiboro a daadaŋ, elomunete tooma toridakis ŋakiro ŋuna ka Akuj, nyera.

²⁰Nai ŋulu adoete nalup ŋuna ajokak, ikes ŋituŋa ŋulu ani kiirasi ŋakiro tocamut, toraa; ice ŋatomoniuni, ice ŋatomonikanikapei ka ice amiat.”

²¹Tolimok nabo Yesu ikes tema, “Eyai mono ituŋanan ŋini inokakini etaa, ido tobuburik atuba kidiama keŋ, kori kiwuak kwap ekitaada a? Nyepedori ŋun, nai ani kinokakin, iwuakinio neni ikeuna.

²²Anerae emam idiobore ŋini imunonitae ŋini nyisileereunio, nabo emam ŋini iwuaitae ŋini nyitatakanunio.

²³Iŋes ŋini eya ŋaki ŋuna kiiraret, kiira!”

²⁴Tolimok nabo tema, “Tocoikisi ŋuna iiranarete iyes. Etyae daadaŋ ŋolo iinakiniata iyes ŋuluce, ikiinakinio iyes daŋ etya nenipei ka iyatakinio.

²⁵Ituŋanan daadaŋ ŋini eyakar idiobore, iyatakinio tolalaar, nai ŋini emamukar, edemaryo tari ŋini eyakar iŋes.”

²⁶Tema nai Yesu, “Ikoni Apukan ka Akuj ituŋanan ŋini eekini ŋikinyom lomanikor.

²⁷Ejotoe iŋes nakwaare, tokienyu iwalari; ŋirwa daadaŋ ŋulu ikonia iŋes nen, erupete ŋikinyom topoloete pa eyeni iŋes epoloe kec.

²⁸Erupunete ŋikinyom analup, kisyaut ŋakwii, tosodi ekaku tosurosi, toraa.

²⁹Ani ekokete, elemuni elope atipei ekileŋ tolemia; anerae adol ŋirwa ŋulu elemere.”

³⁰Kiŋit Yesu ikes tema, “Nyo isikwaanere Apukan ka Akuj? Isikwaanio kan akitadapet ani?

³¹Ikoni iŋes icokit ŋini ikoni ŋini ke ebobore ŋini edit nooi akilo ŋicok daadaŋ anakwap, nai ani kedupakin nalup,

³²epoloor ekeekitoe akilo ŋikito daadaŋ. Epetari ŋaten ŋuna apolok, toduko ŋikyeny.”

³³Tolimonok Yesu ikes ŋakiro a ŋakitadapeta a ŋuna alalak, a ŋuna ekwaan ka ŋin, ikwaŋina apedoryata ikes akiirar.

³⁴Nyitatama iŋes ŋituŋa emam akitadapet, nai ani erae iŋes bon ka ŋikeekasyomak, kirwor ŋakiro ileerete.

³⁵Akoloŋit ŋin, kedoiyo akoloŋ, tolimok Yesu ŋikeekasyomak tema, “Apena, odokasi ekekwaye anam.”

³⁶Toesikis ŋikasyomak asepic a nen, tolomasi nataker neni ayai Yesu, yaasi ikes iŋes. Ayakasi ŋatakerin ŋace daŋ ŋuna arukitotor ikes.

³⁷Tokut ekuwuam ŋolo apolon ananam, tokuut ŋakipi, togeut akilapanakin nataker, kiburiburi akilelebun.

³⁸Apaki ŋin, ajotoe Yesu alokaku ataker anakicoloŋiet. Kitekienyut ŋikasyomak iŋes temasi, “Eketataman, nyimisit iyoŋ ikitwaki iwon a?”

³⁹Tokienyu iŋes, kiretak ekuwuam, tolimok anam tema, “Todipakin! Kinapakin!” Todipakin ekuwuam, kililiŋ akwap cek.

⁴⁰Kiŋit nai Yesu ikes tema, “Nyo ikuryakyata iyes? Emam iyes anupit a?”

⁴¹Tobul ikes nooi, kiŋitanaros make ebasi, “Ŋae mono ekile lo, ŋolo epupete tari ekuwuam ka anam ŋakiro keŋ lo?”