Read ngakarimojong Mar. 5 Bible Online

Mar. 5 - ngakarimojong bible

Mar. 5

¹Ani edolete Yesu ka ŋikeekasyomak ekekwaye anam ŋina a Galileya, nakwap ŋina a Ŋigadara,

²todoku iŋes anataker. Kisiryam ekile ŋolo abuni analyalin, ŋolo ekamunito ŋipyan.

³Eboiyenene ekile ŋol analyalin, amam ituŋanan apedori akien iŋes tari a ŋiriko.

⁴Ŋirwa ŋulu alalak, aeneeneo ŋakejen ka ŋakan keŋ a ŋasuwa ka ŋiriko, nai aŋedeŋede ŋiriko ka tobilibiliye ŋasuwa. Amam ituŋanan ŋini apedori akitapatanun iŋes.

⁵Erimit iŋes ŋalyalin ka ŋimoru akuwar ka apaaran, kiworoe, toduŋuduŋo bon a ŋamoru.

⁶Ani iŋolikini ekile ŋol Yesu eriŋa elwana, toŋed, toryedik alokiŋaren keŋ,

⁷kiworou nooi tema, “Anukiro eya iyoŋ ka ayoŋ, Yesu Lokoku ka Akuj, a ŋina alokidiama nooi? Ekemaimai kare ca ayoŋ iyoŋ aŋuna ka Akuj ebe, nyikisican kare ca!”

⁸(Alimuni iŋes ŋun, anerae abala Yesu, “Tolomutu ŋipyan alokile a lo!”)

⁹Kiŋit Yesu iŋes tema, “Ŋae ekonikiro?” Toboŋok iŋes tema, “Erae ekaakiro Ajore, anerae ikilalak isua.”

¹⁰Torubak iŋes imaimai Yesu nyirita ikes anakwap a ŋin.

¹¹Toyai nen esipan a ŋipegei ŋolo adaka diye emukura.

¹²Todyeka ŋipyan Yesu acamakin ikes tolomasi lopegei.

¹³Tocamak nai Yesu ikes, tolomut, tolomasi lopegei. Tosuros ŋipegei, kimasaros anakope, tolomasi nanam kitamat ikes daadaŋ totwaka. Aapiyarit ekecekimar ŋalipyo ŋaarei.

¹⁴Toema ŋikeyokok ŋulu a ŋipegei lorerya ka lomanikorin alimokin ŋituŋa ŋuna atakanikis lopegei. Potu nai ŋituŋa aanyun ŋuna kitiyakinosi.

¹⁵Ani edolete ikes neni a Yesu, toanyuwasi ekile ŋolo sek ekamunit ajore a ŋipyan iboi alodiye Yesu, enapit ŋilowi keŋaleu. Toumokis nai ikes nooi ka tokuryanito.

¹⁶Apotu ŋituŋa ŋulu keanyunito itaŋaleunio ekile ŋol, tolimokis ŋituŋa ŋuna apotu totakanikis lokile ŋolo a ŋipyan ka lopegei.

¹⁷Tosodo kimaimaa ikes Yesu alosit anakwap kec.

¹⁸Ani eriŋa Yesu edoki nataker, kimaima ŋolo sek ekamunito ŋipyan iŋes tema, “Kimyekinae kare ca ayoŋ orukosi ka iyoŋ!”

¹⁹Nai towou Yesu tolimok iŋes tema, “Toboŋo lore neni a ŋikonikonei, tolimok ikes ŋakiro daadaŋ ŋuna etiya Ekapolon neni kon, ikisyoniyo iyoŋ.”

²⁰Toboŋo nai iŋes, togeu alimonokin ŋituŋa anakwap a ŋina a ŋitaunio a ŋitomon a ŋina anyaritae Dekapoli ŋakiro ŋuna abu Yesu kitiya neni keŋ, toumokis ŋituŋa daadaŋ.

²¹Ani kedoka Yesu ekekwaye anam, abu asepic ŋina alalan totukokin neni ayai iŋes.

²²Bu ekapolon ŋolo ke esinagoga daŋ epei ŋolo anyaritae Yairo. Ani iŋolikini iŋes Yesu, toramakin nakejen keŋ,

²³todyek iŋes nooi tema, “Eapikinit nakoku kaŋ ŋina cici atwanare. Bua kare ca kidokok ŋakonikan kidiama keŋ, ikotere toŋaleu iŋes.”

²⁴Tonyou Yesu, torukosi ka iŋes, kiwuapakis iŋes ŋituŋa eroorito alowaetin a daadaŋ.

²⁵Ayai nen aberu ŋina aleleete ŋaokot ŋikaru ŋitomon ka ŋiarei.

²⁶Abu toryamu ŋican alomurok a ŋulu alalak, kisunyak ŋikeeboro lomurok; nai nyeŋaleu jik.

²⁷Kiirarit sek iŋes ŋakiro ŋuna a Yesu, bu alokaku anasepic, totap elou a Yesu.

²⁸Aŋuna sek atamya iŋes atemar, “Ani ca katap ŋikeelowi daŋ bon, aŋaleuni.”

²⁹Totap iŋes elou a Yesu, totubos ŋaokot atipei, toanyu iŋes alope atemar kaŋaleu anadyak keŋ.

³⁰Toyenu Yesu daŋ alotau keŋ atemar alot agogoŋu aneni keŋ, toboboŋ iŋes nasepic tema, “Ŋae atap elou kaŋ?”

³¹Temasi ŋikeekasyomak neni keŋ, “Ite robo ca iyoŋ daŋ asepic ikirookinit iyoŋ, tobali iyoŋ ebe, ‘Ŋae atap elou kaŋ?’”

³²Toŋoleŋolek Yesu ecamit aanyuwar ituŋanan ŋini atapi elou keŋ.

³³Nai ikwaŋina ayenia aberu ŋuna apotu kitiyakin neni keŋ, bu iŋes emarani ka ebulit, toryedik alokiŋaren Yesu, tolimok iŋes ŋuna a kire daadaŋ.

³⁴Tolimok Yesu iŋes tema, “Nakoku, ikitaŋaleu iyoŋ anupit kon. Toŋaleu, tolot a ekisil.”

³⁵Ani eriŋa Yesu irworo ŋun, potu ŋice alokai a Yairo, tolimokis Yairo temasi, “Atwana nakoku kon. Nyo eriŋa iyoŋ icanitor Eketataman?”

³⁶Nyemitak Yesu ŋakiro ŋuna erworosi ikes, tolimok Yairo tema, “Nyiyaloloŋ, nai tonupae ayoŋ.”

³⁷Nyecamak Yesu idiotuŋanan arukor ka iŋes, mati Petero ka Yakobo ta Yoana lokaato a Yakobo.

³⁸Potu ikes kai a Yairo neni eŋolikinia Yesu ŋituŋa iworoete, igworosi nooi.

³⁹Toloma Yesu tooma kai, kiŋit ikes tema, “Ekainyo ecelet lo? Nyo igworosi iyes? Nyetwanit ikoku, nai ejotoe.”

⁴⁰Tojamuwasi ikes daadaŋ ŋakiro a Yesu. Kitoloma nai Yesu ikes daadaŋ kiŋa, mati papa ka toto a ikoku, ta ŋulu sek arukitotor iŋes. Tolomasi neni aperyo ikoku.

⁴¹Kikamu Yesu akan a ikoku tema, “Talita kumi,” akeepolou iŋes atemar, “Apese, akalimokini ayoŋ iyoŋ, tonyou!”

⁴²Tonyou apese atipei, torotok (arae ŋikeekaru ŋitomon ka ŋiarei). Apotu ŋakiro ŋun kitubulo ŋituŋa daadaŋ.

⁴³Kicikak Yesu ikes ka agogoŋu tema, “Nyeyenu idiotuŋanan ŋakiro ŋun.” Tolimok ikes ainakin iŋes adiokimuj.