Read ngakarimojong Mar. 7 Bible Online

Mar. 7 - ngakarimojong bible

Mar. 7

¹Ani ketukokinosi Ŋiparisayon kaapei ka ŋiketatamak a Ŋikisila ŋice ŋulu aponito alo Yerusalem neni ayai Yesu,

²apotu toanyuwasi ŋikasyomak a Yesu ŋice imujete a ŋakan a ŋuna pa elotot lopite ŋolo elosyata Ŋiparisayon.

³(Anerae pa emujete Ŋiparisayon ka Ŋiyudayan ŋuluce daadaŋ, mati ilotarito ŋakecekan, a ŋina ewuapitotor ikes ŋitalyo ŋulu atapapaa kec.

⁴Tari ŋina eboŋunioto ikes alomaket daŋ, pa emujete, mati mono kitesegut ŋakecewat. Aya nabo ŋicetalyo ŋulu alalak ŋulu ericito ikes, ikwa akilot ŋikopoi, ŋamoti ka ŋiboro ŋulu alalak ŋulukimujet daadaŋ, ŋulu etiyaunitae a ŋasuwa a ŋuna areŋak ka elosete ikes ŋikitaadae daŋ.)

⁵Kiŋita Ŋiparisayon ka ŋiketatamak a Ŋikisila Yesu temasi, “Kaanukiro nyiwuapitotor ŋikonikasyomak ŋitalyo ŋulu atapapaa, anerae imujete ikes eŋoryaka ŋakan?”

⁶Toboŋok Yesu ikes tema, “Abu Isaya todwar ŋuna a ŋisoswae kus, ikwa igiritere Nakigireta atemar, ebala Akuj, ‘Eketopoloorito ayoŋ ŋituŋa lu alorwor kec, nai elwaka ŋikecetai aneni kaŋ;

⁷nabo ilipete ikes neni kaŋ koŋin, anerae itatamete ikes ŋitalyo a ŋituŋa esibit ŋulu ka Akuj!’

⁸Iesikis iyes Ŋakiciketa ŋuna ka Akuj, aŋuna ka akiricit ŋitalyo a ŋituŋa.”

⁹Tolimok nabo Yesu ikes tema, “Iyenete iyes kire epite ŋolo ŋeryet ŋakiciketa ŋuna ka Akuj, ikotere iricakiniata ŋitalyo kus.

¹⁰Anerae abu Moses tema, ‘Kitopoloorite papa kon ka toto kon; abu nabo iŋes tema, iŋes ŋini iceni papa keŋ kori toto keŋ, itemokino totwan jik.’

¹¹Nai ibasi iyes, ‘Ani ketema ituŋanan papa keŋ, kori toto keŋ ebe, ŋini adikino iyoŋ iryamuni aneni kaŋ, erae Koroban (iŋes atemar, ibore ŋini einakinitae Akuj)’.

¹²Aŋun, nyeriŋa iyes icamakinete iŋes itiyae idiobore aŋuna a papa keŋ kori a toto keŋ.

¹³Ituruwosi iyes ŋakiro ŋuna ka Akuj ŋakoŋinae aŋuna a ŋitalyo kus a ŋulu iricito iyes ka ŋice daŋ ŋulu itatamete iyes ŋulucetuŋa.”

¹⁴Tonyarau nabo Yesu ŋituŋa neni keŋ, tolimok ikes tema, “Topupokinae ayoŋ, iyes daadaŋ, ido kiirasi.

¹⁵Emam ibore ŋini alokiŋa ituŋanan ŋini elomari tooma keŋ, kitoroniya iŋes. Nai ibore ŋini elomuni anituŋanan, iŋes itoroniyari iŋes. [

¹⁶Iŋes ŋini eya ŋaki ŋuna kiiraret, kiira.]”

¹⁷Torotok iŋes anasepic, toloma kai. Kiŋita ŋikeekasyomak iŋes apolou ŋina ka akitadapet a ŋin.

¹⁸Tolimok Yesu ikes tema, “Ikwa iyes daŋ emam aosou ikwa ŋuluce a? Nyiyenete iyes atemar emam ibore ŋini alokiŋa ituŋanan ŋini ani keloma tooma keŋ kitoron iŋes a?

¹⁹Anerae nyelomari ibore ŋin lotau keŋ, nai nakook keŋ, tosodi tolomu kiŋa.” (Alimuni Yesu ŋun akisileereunio atemar, esegak ŋamuja daadaŋ.)

²⁰Tema nabo Yesu, “Ŋinibore elomuni anituŋanan, iŋes itoroniyari ituŋanan.

²¹Anerae alotooma ŋitai a ŋituŋa elomunete ŋatameta ŋuna aronok, adoteu, akoko, akiar,

²²elomi, akiŋobel, aronis, amodiyo, ekibure ŋolo aronon, arakao, akiyany, akisupa, abaŋao;

²³ŋun daadaŋ ikes ŋuna aronok ŋuna elomunete alotooma ituŋanan, kitoroniyasi iŋes.”

²⁴Torotok Yesu a nen, tolot nakwap ŋina a Tiro. Toloma iŋes kai, aŋuna pa acamitor toyenu idiotuŋanan atemar eyai iŋes nen, nai nyepedo iŋes akiŋop.

²⁵Ani iirari aberu ace ŋina ekamunit ekipye nakoku keŋ ŋakiro ŋuna alimitere Yesu, bu iŋes neni a Yesu atipei, toramakin nakejen keŋ.

²⁶Pa arae aberu ŋin Ayudayat, edounitoe iŋes alokitela a ŋolo anyaritae Siroponike. Kimaima iŋes Yesu akiritar ekipye aneni anakoku keŋ.

²⁷Nai tema Yesu neni keŋ, “Kimyek ŋidwe kimwoko mono, anerae nyejok alemar akimuj a ŋidwe, kimasakinae loŋokwo.”

²⁸Tolimok aberu iŋes tema, “Kire, Ekapolon, nai idepete ŋiŋokwo daŋ ŋarare ka ŋapiyanunet a ŋidwe alokwap emesa.”

²⁹Tolimok Yesu iŋes tema, “Aŋuna ka akirot a ŋin, ape tolot, alot ekipye aneni a nakoku kon.”

³⁰Tolot iŋes kai keŋ, toryamu nakoku keŋ eperi alokitaada, kelot ekipye.

³¹Torotok Yesu nabo alokukoru a Tiro, kitor Sidon tari nanam ŋina a Galileya ka nakwap ŋina a ŋitaunio a ŋitomon, ŋina anyaritae Dekapoli.

³²Yaut ŋituŋa neni keŋ ekiŋim ŋolo pa apedori erwor ejok, kimaimaa ikes Yesu akidokokin akeekan kidiama keŋ.

³³Toriko nai Yesu ekiŋim nawae alotuŋa a ŋuluce, kiwuak ŋikeemoyo tooma naki keŋ, kimwaak ŋakimul, totap aŋajep keŋ.

³⁴Kireo kidiama, kiyeŋak nooi, tema, “Epata!” iŋes atemar, “Toŋaar!”

³⁵Toŋaar ŋaki keŋ, tolacakin aŋajep, kirworik iŋes ejok.

³⁶Kicik Yesu ikes nyelimokis idiotuŋanan, nai ani tari kicik iŋes ikes nooi, kielasi ikes ŋakiro ŋuna ecikit iŋes ikes atemar nyilimosi.

³⁷Toumokis ikes nooi temasi, “Etiya iŋes ŋiboro daadaŋ ejok, esiira ŋikiŋimanotin ka esirworik ŋulu sek nyirworosi.”