Read ngakarimojong Luk. 12 Bible Online

Luk. 12 - ngakarimojong bible

Luk. 12

¹Tocunakinos ŋituŋa ŋalipyo ŋuna alalak nooi neni a Yesu, kidiŋidiŋakinos, kicakacakas. Tolimok Yesu ŋikeekasyomak apaki ŋin tema, “Tocoito ŋakinyalet ŋuna a Ŋiparisayon, ŋuna erae ŋisoswae.

²Emam ibore ŋini erapitae ŋini nyisileereunio ka ŋini imunonitae ŋini nyeyenunio.

³Daadaŋ ŋuna ilimut iyes anakiryonut, iiraryo anakica; nabo ŋuna iŋaiŋaut iyes togwolito ŋikekya a ŋakais, ikeunio alokiŋa.

⁴“Ŋikaakonei, akalimokini ayoŋ iyes atemar, nyikerito ŋulu earete akuwan bon, nai tomam ibore ŋini aronon ice ŋini epedorete ikes akitiyakin ekaku.

⁵Eketoodikini ayoŋ iyes ŋini itemokino tokerito; tokerito Akuj ŋina epedori akiar, nabo eyakar iŋes apedor ŋina cakakinet tooma nakim ŋina nyeduŋe. Akalimokini ayoŋ iyes kire atemar, tokerito iŋes!

⁶“Nyegyelyo atasurui ŋikan a ŋikapun a ŋiarei a? Nai emam tari ipei alokidiŋ kec ŋini imuryakin aneni ka Akuj.

⁷Tari ŋitim ŋulu anakyes kus imaritae daadaŋ. Nai nyikuryanito, anerae epol etyae kus nooi akilo ŋolo atasurui.

⁸“Akalimokini ayoŋ iyes atemar, ŋinituŋanan akalimori ayoŋ alokiŋaren ŋituŋa, elimori Lokoku a Ituŋanan daŋ iŋes alokiŋaren ŋimalaikan ŋulu ka Akuj.

⁹Ŋini akaŋeri ayoŋ alokiŋaren ŋituŋa, eŋeryo iŋes daŋ alokiŋaren ŋimalaikan ŋulu ka Akuj.

¹⁰“Ituŋanan daadaŋ ŋini elimuni akirot itoroniyarit Lokoku a Ituŋanan, isyoniyo; nai ŋini iyanyi Etau ŋolo Asegan, nyisyoniyo jik.

¹¹“Ani ikiyaunete ikes iyes losinagogae kori kiŋaren ŋikepukak kec, nyitemokino iyes kiyaloloŋo ŋuna iboŋokinete kori ŋuna ilimunete;

¹²anerae Etau ŋolo Asegan iŋes ebuni akitatam iyes ŋuna itemokino tolimut apaki ŋin.”

¹³Abu ituŋanan anasepic a ŋituŋa, tolimok Yesu tema, “Eketataman, tolimok lokaato kaŋ okotyakak ayoŋ ebari ŋolo koloŋ ikiesikinia papa kosi isua.”

¹⁴Toboŋok Yesu iŋes tema, “Ekile, ŋae akainakini ayoŋ apedor ŋina tubet kori ŋina atyakatyakaa ebari kus?”

¹⁵Tolimok iŋes ŋituŋa daadaŋ tema, “Tocoikisi, kiyokito ŋawat kus anarorokanut a daadaŋ, anerae meere ebari itopoloe akiyar a ituŋanan.”

¹⁶Tolimok nai Yesu ikes akitadapet na tema, “Ayai ekabaran ŋolo ayakar emanikor ŋolo akoneene tobwaŋ akimuj ŋina alalan.

¹⁷Kisyak iŋes akitam tema, ‘Emam ayoŋ edula ŋolo apolon ŋolo ewuakini akaakimuj daadaŋ. Ekokini mono ai?’

¹⁸Totamu nai iŋes tema, ‘Aanyu ayoŋ ŋuna etiyakini: eelari ŋikaadulae, oyeu ŋulu apolok ŋulu itemokin ŋikaamomwa ka ŋiboro ŋuluce daadaŋ.

¹⁹Ani erikakini otema alotau kaŋ, ee roca ekaatau! Iyakar tokona iyoŋ ibore ŋini ajokan daadaŋ ŋini ikiteyari iyoŋ ŋikaru ŋulu alalak. Kiboikin jik kieŋa, kimuj, tomat ka kileile!’

²⁰Nai tolimok Akuj iŋes tema, ‘Iyoŋ ebaŋaanot! Lolo nakwaare iitanio akiyar kon; ŋae irumi ŋiboro daadaŋ ŋulu icunit iyoŋ aŋuna ka akonikiyar?’ ”

²¹Toŋetak Yesu erwor keŋ tema, “Ikote nen ŋulu etukete ebari kec kituruwosi ŋolo a ŋawat kec make, nai tomam nyebarito alokiŋaren Akuj.”

²²Tolimok Yesu ŋikeekasyomak tema, “Aŋun, akalimokini ayoŋ iyes atemar, nyiyaloloŋete aŋuna ka akimuj a ŋina iitanito iyes ayarya, kori aŋuna a ŋilowi a ŋulu iitanito a ŋulu napan.

²³Anerae iloit akiyar tari akimuj, nabo iloit akuwan tari ŋilowi.

²⁴Kiŋolikisi iyes ŋikurukwa: nyeete ikes ŋikinyom kori nyelemete; emam ikes ŋidulae kori ŋatukito; nai Akuj alope itani ikes! Epol etyae kus nooi akilo ŋolo a ŋikyeny!

²⁵Ŋae alokidiŋ kus alotooma akiyaloloŋ epedori akitedepakin akeekiyar ŋirwa ŋulu sek etubunitoe?

²⁶Ani pa kipedorete iyes asubakin ŋakiro ŋuna epataka ŋun, nyo iŋuruŋuratar iyes kan ŋuluceboro?

²⁷Kiŋolikisi epite ŋolo erupyata ŋatur ka epolooto anariet: emam nyedonyete ikes kori nyesonyete ŋilowi. Nai akalimokini ayoŋ iyes atemar, tari erwosit Solomon ŋolo asirit nooi, amamukar ŋilowi ŋulu ebusak ŋulu ikote ŋatur ŋun.

²⁸Akuj iŋes itanapi ŋinya--ŋinya ŋulu elibito tokona, nai ani moi kicunyae. Etya nai ekitanape ŋolo ikitanapya iŋes iyes ai? Okoe iyes ŋituŋa ŋulu edit anupit!

²⁹“Nyiyaloloŋete tokona ibasi, ‘Okoe, nyo ikinyami kori nyo ikimasi?’

³⁰(Anerae ŋibukui ŋulu nyerae ŋulu a Ŋiyudayan ikes nyelakakinete akiwarit ŋiboro lugu daadaŋ.) Eyeni Papa kus atemar iitanito iyes ŋiboro lu daadaŋ.

³¹Nai kiwara mono Apukan keŋ, ikiinakini iŋes iyes ŋiboro ŋul daadaŋ ilapara.

³²“Nyikuryaketa iyes erae kikudyoko daŋ! Anerae iwarit Papa kus ainakin iyes Apukan keŋ.

³³Togyelasi ŋikusiboro daadaŋ, inakis ŋisiliŋa lokulyak. Kitiyautu ŋicweei ŋulu emam nyenyamunosi. Kiwuaa ekusibari anakuj, aneni nyediteunia tari iwadio cici, anerae emam ekokolan eapiyari nen, nabo emam esipiran ŋolo inyasuni iŋes.

³⁴Anerae neni eyai ebari kon, iŋes eyai etau kon daŋ.

³⁵“Tonyikito ŋikusilowi ejok, tonokete ŋikusitaae.

³⁶Kikote ŋiketiyak ŋulu idarito ekecekapolon eboŋuni alokiitanu. Ani eboŋuni iŋes, ikoŋikoŋokini ekek, toŋaasi ikes atipei.

³⁷Erereŋ nooi ŋiketiyak ŋulu erukauni ekapolon kec ekienyete apaki ŋina eboŋunio iŋes. Akalimokini ayoŋ iyes kire atemar, enyiki iŋes ŋilowi keŋ, kisiboik ikes tokorak akimuj.

³⁸Erereŋ ikes nooi ŋina erukaunere ekienyete, tari kedolu iŋes kidiŋ akuwar kori iwali akwap!

³⁹Toyenete nabo atemar kerae toyeni elope ere esaa ŋolo edolunio ekokolan, kekienyit iŋes, ikotere nyebwaŋi akai keŋ.

⁴⁰Iyes daŋ totenito, anerae ebuni Lokoku a Ituŋanan apaki ŋina nyiyenete iyes.”

⁴¹Kiŋit Petero Yesu tema, “Ekapolon, isua make ilimunitor iyoŋ akitadapet na kori ŋituŋa daadaŋ?”

⁴²Toboŋok Yesu tema, “Ŋae bo erae eketiyan ŋolo aoson ŋolo kikinyoma, ŋolo iwuakini ekapolon toruwor ekapolokiniton ŋolo a ŋiketiyak keŋ, tokoranakini ikes akimuj apaki ŋina ecamitere?

⁴³Erereŋ eketiyan ŋolo ŋina ebunio ekeekapolon, toryamu iŋes itiyae ikoŋina!

⁴⁴Akalimokini ayoŋ iyes kire atemar, iwuakini ekapolon iŋes topolok ebari keŋ daadaŋ.

⁴⁵Nai ani ketema eketiyan ŋol alotau keŋ, ‘Adid ekapolon kaŋ abunore,’ elomakini akibuŋa ŋiketiyak ŋuluce, ŋaberu ka ŋikilyok, nabo imuji, tomat tomerakin;

⁴⁶eboŋuni ekapolon ke eketiyan a ŋol akoloŋit ŋina nyetamunitor iŋes ka esaa ŋolo nyeyeni iŋes. Isicani ekapolon ŋol iŋes nooi, kikwaanikinos ka ŋulu nyerae ŋikanupak.

⁴⁷“Aŋun, eketiyan ŋolo eyeni ŋuna ecamit ekapolon keŋ, nai kiboikin pa etenit kitiya ŋun, ibuŋao nooi.

⁴⁸Nai ŋolo itiyae ŋuna aronok pa eyeni ŋuna ecamit ekapolon keŋ, ibuŋae ekapolon keŋ iŋes iwadio. Ituŋanan daadaŋ ŋini einakinitae ibore ŋini alalan, iitanio ŋini alalan aneni keŋ ka ŋini icikakinito ŋituŋa ŋiboro ŋulu alalak, iitanio aneni keŋ ŋulu alalak adepar.

⁴⁹“Abunit ayoŋ ayaun akim nakwap, okoe kerae toris tokona kerirau!

⁵⁰Eyai akibatisao ŋina itemokino ayoŋ oryamu, nai akaryebete ayoŋ ŋakiro ŋun etau tari neni irikakinotor!

⁵¹Itamete iyes atemar abunit ayoŋ ayaun ekisil nakwap a? Mam. Akalimokini ayoŋ iyes atemar, ayaunit ayoŋ atyakatyaka.

⁵²Ameun tokona, ani keyakasi ŋituŋa ŋikan ŋulu ke epeikal, eremokin ŋiuni ŋiarei, nabo eremokin ŋiarei ŋiuni.

⁵³Eyakaun atyakatyaka eremokin papa ka lokoku keŋ ka eremokin lokoku daŋ ka papa keŋ; eremokin nabo toto ka nakoku keŋ, nakoku daŋ eremokin ka toto keŋ, nabo eremokin tata ka ateran keŋ ka eremokin ateran daŋ ka tata keŋ.”

⁵⁴Tolimok nabo Yesu asepic a ŋituŋa tema, “Ani iŋolikinete iyes edou ebuni alo To, itemasi atipei aapuu akiru akilim, ido kilim kire.

⁵⁵Ani ekutuni ekuwuam anakan a ŋina alo Kwap, itemasi iyes emwanuni akoloŋ nooi, ido tomwanu kire.

⁵⁶Iyes ŋikaŋisoswae! Iŋolikinete iyes epite ŋolo eyakatar akwap ka adis, ido toyenut apolou kec; nyo bo pa iyenuniata iyes apolou ŋina a ŋirwa a lu?

⁵⁷“Inyoni pa itubunioto iyes ŋilopeyek ŋuna iyookino iyes kitiyata?

⁵⁸Ani ikisitakini iyoŋ ituŋanan itoriko neni etubere ŋakiro, kirworiutu kisila eriŋa nyedolo neni ikitubokinere. Ani pa kitiya iyoŋ ŋun, ikirikori iŋes iyoŋ lokatubon, ido itorikok ekatubon ŋasigarya ŋuna ikiwuakinete iyoŋ mabus.

⁵⁹Akalimokini ayoŋ iyoŋ atemar, nyilomuni iyoŋ a nen jik, mati kitac amica kon daadaŋ tari nikaput.”