Read ngakarimojong Luk. 13 Bible Online

Luk. 13 - ngakarimojong bible

Luk. 13

¹Apaki ŋin, aya nen ŋituŋa ŋulu alimokinete Yesu epite ŋolo aarya Pilato ŋituŋa ŋulu a Galileya eriŋa emurosi neni ka Akuj.

²Tolimok Yesu ikes tema, “Itamete iyes atemar kesecaka nooi ŋituŋa ŋulu a Galileya ŋul akilo Ŋigalileyan ŋuluce aŋuna aryamuniata ikes ŋican ŋul a?

³Nyikote neni! Nai akalimokini ayoŋ iyes atemar, ani pa kikiwa iyes ŋasecisya kus, itwakete iyes daŋ ikwa ikes.

⁴Ani bo ŋituŋa ŋulutomon ka ŋikanikauni ŋulu aritakin arwatata toar alo Siloam? Itamete iyes itoodiunito ŋun atemar kesecaka ikes nooi akilo ŋituŋa daadaŋ alo Yerusalem a?

⁵Nyikote neni! Nai akalimokini ayoŋ iyes atemar, ani pa kikiwa iyes ŋasecisya kus, itwakete iyes daŋ ikwa ikes.”

⁶Tolimok nai Yesu ikes akitadapet tema, “Kedupit ekile ebobore lomanikor keŋ. Abu iŋes toroiya ŋaboboryo keraunito alobobore a ŋol, nai nyeryamu tari apei.

⁷Aŋun, tolimok iŋes eketen ŋolo ke ebobore tema, ‘Kiira tokona, adol ŋikaru ŋiuni abuneene ayoŋ nege aroiun ŋadiboboryo, nai nyeryamuna tari apei. Toyepa! Kaanukiro ewuar iŋes analup koŋin?’

⁸Toboŋok eketiyan ŋolo ke emanikor tema, ‘Ekapolon, kimyek mono ekaru lo bon, aboki ayoŋ akipany natorom keŋ, ido obukok ŋasike.

⁹Acepaki erauni ŋaraito ekaru ŋolo moi. Ani kemam, toyepa nai iyoŋ iŋes.’ ”

¹⁰Apeikoloŋit ŋina a Sabato kitatam Yesu ŋituŋa alosinagoga.

¹¹Ayai aberu ŋina ayakar ekipye ŋolo etoŋwalit iŋes ŋikaru ŋitomon ka ŋikanikauni. Akudokina iŋes pa apedori akitenar.

¹²Ani iŋolikini Yesu iŋes, bu tonyara iŋes tema, “Aberu, ikilacakin iyoŋ anadyak kon!”

¹³Kidokok Yesu ŋakan kidiama keŋ, torikin iŋes atipei tojokyar, kisyak akipuro Akuj.

¹⁴Nai abu ekapolon ŋolo ke esinagoga toŋo aŋuna etaŋaleunio Yesu aberu akoloŋit ŋina a Sabato, ido tolimok ŋituŋa tema, “Eya ŋirwa ŋikanikapei ŋulu itemokino kitiyaata etic; itemokino aponare akitaŋaleuno ŋirwa ŋul, meere akoloŋit ŋina a Sabato!”

¹⁵Tolimok Ekapolon iŋes tema, “Iyes ŋikaŋisoswae! Nyelacanakini idiotuŋanan alokidiŋ kus ekeemoŋ kori ekeesigirya ananok, ido tomia nakipi akoloŋit ŋina a Sabato a?

¹⁶Eyai tokona ne aberu ŋina erae akanateker a ŋina ka Aburaam, ŋina aenit Satan ŋikaru ŋitomon ka ŋikanikauni, emam nai nyitemokino alacakin iŋes akoloŋit ŋina a Sabato a?”

¹⁷Ani elimuni Yesu ŋun, kiruma ŋikeemoi daadaŋ ŋileec. Nai alakara asepic daadaŋ, anerae ajokak ŋakiro ŋuna etiyae Yesu.

¹⁸Kiŋit Yesu ikes tema, “Ikoni Apukan ka Akuj ai? Nyo isikwaanere iŋes?

¹⁹Ikoni neta: elemuni ituŋanan icokit ŋini ikoni ŋini ke ebobore, min todupak lomanikor keŋ. Ani erupuni, topoloor nooi toruwor ekitoe, potu ŋikyeny toduko ŋakais kec naten keŋ.”

²⁰Kiŋit nabo Yesu ikes tema, “Nyo tokona esikwaania ayoŋ Apukan ka Akuj?

²¹Ikoni neta: ikoni ŋakinyalet ŋadi ŋuna elemuni aberu kinyalak ka ŋakirya ŋuna edolito ŋidepei ŋiarei, tomurak akitodol ŋina abuunioto daadaŋ.”

²²Ani elosi Yesu Yerusalem, kitor kidiŋ ŋitaunio ka ŋirerya kitatami ŋituŋa.

²³Kiŋit icetuŋanan iŋes tema, “Ekapolon, ŋituŋa ŋidikudyo bon eiunosi a?” Toboŋok Yesu iŋes tema,

²⁴“Toŋirikisi ka agogoŋu alomar alokek a ŋolo adidiŋan. Anerae akalimokini ayoŋ iyes atemar, eŋirikinete ŋikalalak alomar tooma, nai nyepedorete.

²⁵Kedau elope ŋolo ke ekal anyoun togol ekek, iwuoyete iyes alokiŋa, kisyakis akikoŋikoŋ ekek ibasi, ‘Ekapolon, toŋaarae isua olomutu!’ Eboŋokini iŋes tema, ‘Nyayeni ayoŋ neni iponitotor iyes!’

²⁶A nen ilimokinete iyes iŋes itemasi, ‘Abe bo ikimuji ka ikimasi isua ka iyoŋ kaapei; itatami bo iyoŋ alorerya kosi.’

²⁷Eboŋokini nabo iŋes tema, ‘Nyayeni ayoŋ neni iponitotor iyes, katosi aneni kaŋ, iyes ŋulu itiyaete ŋakiro ŋuna aronok!’

²⁸Ikalounete iyes nooi, ikonyanakinete ŋikusikyal apaki ŋina iŋolikiniata Aburaam ka Isaka ka Yakobo ta ŋikadwarak daadaŋ eyakasi Napukan ka Akuj, nai ani eruwor iyes itogolor kiŋa!

²⁹Epote ŋituŋa alo Kide, alo To, alo Kuju ka alo Kwap kiboikinos nasuban a Napukan ka Akuj.

³⁰A nen ŋice ŋulu isidiyete tokona, iŋarenete; ŋice ŋulu iŋarenete tokona, eruworosi ŋulu isidiyete.”

³¹Apaki ŋin, potu Ŋiparisayon ŋice neni a Yesu, tolimokis iŋes temasi, “Itemokino iyoŋ torotok a ne tolot iwace, anerae ecamit erwosit Erode akiar iyoŋ.”

³²Tolimok Yesu ikes tema, “Apesi tokona tolimokisi ekwee ŋol ebe, ‘Eritanari ayoŋ atasatan, nabo etaŋaleuni ŋikadyakak daŋ akoloŋit naga ka moi taparacu, ani akoloŋit ŋina kiuniyet, erikak etic kaŋ.’

³³Nai itemokino akoloŋit naga ka moi taparacu ta ŋinace olot kiŋaren; anerae nyemaikina ekadwaran earyo aiwace, mati erae Yerusalem.

³⁴“Okoe ŋituŋa a Yerusalem ŋulu iarete ŋikadwarak, nabo tocaka a ŋamoru ŋulu iyakuunitae neni kus! Ŋarwa ŋayai acamitor ayoŋ acunakin ŋidwe kon, ikwaŋina ecunia akokoroit ŋimiyoi nabebenuk keŋ, nai nyikicamakis iyes ayoŋ.

³⁵Topupokisi tokona, imyekinio Akai kus ŋina ka Akuj. Akalimokini ayoŋ iyes kire atemar, nyikiŋolikinete iyes ayoŋ nabo akitodol akoloŋit ŋina itemaryata, ‘Erereŋ ŋolo ebunit alokiro a ŋolo ke Ekapolon!’ ”