Read ngakarimojong Luk. 15 Bible Online

Luk. 15 - ngakarimojong bible

Luk. 15

¹Tocunun ŋikerirak ocur ka ŋikasecak akiirar ŋakiro a Yesu.

²Tolomakis Ŋiparisayon ka ŋiketatamak a Ŋikisila akiŋuruŋura ebasi, “Okoe! Abe erukito bo ituŋanan en ka ŋikasecak, nabo imujete ka ikes!”

³Tolimok Yesu ikes akitadapet na tema,

⁴“Ani alokidiŋ kus keyakar ituŋanan ŋamesekin amiat, tooli apei, ikokini iŋes ai? Nyimyekini iŋes ŋuna tomonikanikaomwon ka ŋakanikaomwon anadakar, tolot kiwara ŋina eolit tari neni eryamunia a?

⁵Ani eryamuni, elelyani iŋes nooi, toryoŋak amesek ŋin loseket keŋ.

⁶Apaki ŋina edolyo iŋes lore keŋ, enyarauni ŋikeekonei kaapei ka ŋikidunyet tema, ‘Olelyana kaapei, anerae aryamu ayoŋ amesek kaŋ ŋina aolit.’

⁷Ikwaŋinapei, akalimokini ayoŋ iyes atemar, eyakaun alelyan nakuj aŋuna ke ekasecan a epei a ŋolo ekii ŋasecisya keŋ, akilo ŋuluce ŋulu tomonikanikaomwon ka ŋikanikaomwon ŋulu ajokak, ŋulu nyiitanito akiki ŋasecisya kec.

⁸“Kori ikokini ai aberu ŋina eyakar ŋisilipae ŋitomon, ido tocakar epei? Emam mono nyinokakini iŋes etaa, topyeu akai, kiwar ŋiwaetin ka akai daadaŋ tari ŋina eryamunia a?

⁹Ani eryamuni, enyarauni ŋakeekonei ka ŋikidunyet iwapei tema, ‘Olelyana kaapei ka ayoŋ, anerae aryamu ayoŋ esilipa kaŋ ŋolo acakara!’

¹⁰Ikwaŋinapei, akalimokini ayoŋ iyes atemar, elelyanete ŋimalaikan ŋulu ka Akuj ikotere epeikasecan ŋolo ekii ŋasecisya keŋ.”

¹¹Tolimu Yesu tema, “Ayai ekile ŋolo aya ŋidwe ŋulusapa ŋiarei.

¹²Abu ŋolo cici tolimok iŋes tema, ‘Papa, totyakakinae ayoŋ ŋiboro ŋulu ebeunito neni kaŋ anabaru kon.’ Totyakaki nai papa keŋ edya ŋol ŋiboro keŋ.

¹³Ani eriŋa nyelunyara ŋirwa ŋulu alalak, abu edya ŋol tocunak ŋiboro ŋulu ayakar daadaŋ, towot lobuku ece ŋolo alwanan; kirika iŋes aina ŋiboro keŋ alopite a ŋolo aronon.

¹⁴Kedau iŋes akielielaar ikes daadaŋ, bu eron nakwap ŋin, toŋopik iŋes ibore imuji.

¹⁵Tolot nai iŋes toruwor epito aneni a icetuŋanan anakwap a ŋin, a ŋini abu kiwuak iŋes akiyok ŋipegei.

¹⁶Emuit iŋes akimor ka ŋipegei ŋapoco, nai amam ipei daŋ ŋini apedori ainakin iŋes tari ŋadi.

¹⁷Ani ekaku, kiito iŋes ekecere tema, ‘Imujete ŋiketiyak a papa kaŋ akimuj kimwoko topiyanut, nai okaarite ayoŋ akoro a ne!

¹⁸Anyouni ayoŋ oboŋo neni a papa kaŋ, olimok iŋes otema, “Papa, asec ayoŋ alokiŋaren Akuj ka alokiŋaren kon;

¹⁹nyitemokino nabo ayoŋ okanyarae lokoku kon, kitusubunae ayoŋ eketiyan kon.” ’

²⁰Tonyou nai iŋes, tolot neni a papa keŋ. “Ani eriŋa iŋes elwana, towuat papa keŋ iŋes ebunit kisyoni iŋes, kikomak kisiryamia, totunakin, tonu iŋes.

²¹Tolimok edya ŋol papa keŋ tema, ‘Papa, asec ayoŋ alokiŋaren Akuj ka alokiŋaren kon; nyitemokino nabo ayoŋ okanyarae lokoku kon.’

²²Nai tolimok papa keŋ ŋiketiyak keŋ tema, ‘Apesi atipei yautu elou ŋolo ajokan kitanapa. Kiwuakisi ekaboboot lokimoin keŋ ka kitanapa ŋamuk.

²³Toramutu itaok ŋini atuman toarakis, onyama olakaros!

²⁴Anerae lokoku kaŋ lo, atwanit, nai tokona ayaru; aolit, nai tokona atakanu.’ Ido kisyakis ikes akimuj ka akimomwor.

²⁵“Apaki ŋin ayai lokoku keŋ ŋolo apolon lomanikor. Ani eboŋuni iŋes eapuuni lore, kiira ŋituŋa ikareyete ka idoŋaete.

²⁶Tonyara iŋes eketiyan epei, kiŋit iŋes tema, ‘Anukiro nu?’

²⁷Toboŋok eketiyan ŋol iŋes tema, ‘Lokaato kon aboŋu lore, ido abu papa kon tema toara itaok ŋini atuman, anerae aboŋu iŋes neni ajokan emam ŋace.’

²⁸“Toŋo edya ŋolo apolon nooi, towou alomar tooma lore; tosodi tolomu papa keŋ kiŋa, kimaima iŋes tema, ‘Tolomu tooma.’

²⁹Toboŋok iŋes papa keŋ tema, ‘Kiŋolik, etiya ayoŋ ekonitic ŋikaru ŋulu alalak emam nyeŋero ŋakonikiro; nai emam tari idiokale daŋ ŋini ibu iyoŋ ikiinak ayoŋ olakarotor ka ŋikonei kaŋ.

³⁰Nai abu lokoku kon logo kisunyak ŋiboro kon daadaŋ namalaae, ani tokona eboŋuni iŋes lore, iarak iyoŋ iŋes itaok ŋini atuman!’

³¹Toboŋok papa keŋ iŋes tema, ‘Lokoku, ikirukit iwon ŋirwa daadaŋ, nabo ibore daadaŋ ŋini ikiyakar ayoŋ erae ŋini kon.

³²Nai itemokino iwon olakaros; anerae lokaato kon lo, atwanit, nai tokona ayaru; aolit, nai tokona atakanu!’ ”