Read ngakarimojong Luk. 16 Bible Online

Luk. 16 - ngakarimojong bible

Luk. 16

¹Tolimok Yesu ŋikeekasyomak tema, “Ayai ekile ŋolo abarit, ŋolo ayakar ekawoikiniton etic ŋiboro keŋ. Tolimokinae nai ekabaran atemar ebolyar ekawoikiniton etic ŋiboro keŋ.

²Tosodi ekapolon tonyarau iŋes kiŋit tema, ‘Anukiro nu ŋuna apupi ayoŋ atemar itiyae iyoŋ? Kitoodikinae cenite ekimar a ŋiboro kaŋ daadaŋ, anerae acepaki nyirubakini iyoŋ irae eketiyan kaŋ.’

³Totamatama eketiyan alotau keŋ tema, ‘Akalema tokona ayoŋ ekapolon alotic, ekokini ayoŋ ai? Meere ayoŋ ituŋanan ŋini agogoŋon, ŋini apedori akitare, nabo ekerumito ŋileec alosit akilipanar.

⁴Nai ayeni ayoŋ ŋuna etiyakini; ikotere ani kekerita ayoŋ ekapolon alotic keŋ, ekejaut ŋituŋa alorerya kec.’

⁵“Tonyarau iŋes ŋituŋa daadaŋ ŋulu ayakatar ŋamicae ŋuna ke ekapolon keŋ. Tonyaraununu ikes a ŋipeipei, kiŋit ŋolo ke ekiŋaren tema, ‘Nyo etyae a ibore a ŋini ikimicae iyoŋ ekapolon kaŋ?’

⁶Toboŋok iŋes tema, ‘Akimyet ŋina ilelebun ŋamoti ŋuna apolok amiat.’ Tolimok ekawuoikiniton etic iŋes tema, ‘Ekimar kon logo, kiboikin kigirak ŋatomonikan make.’

⁷Tosodi kiŋit iŋes ŋoloce tema, ‘Etya ai ibore ikimicao iyoŋ?’ Toboŋok iŋes tema, ‘Ŋicweei ŋulu a ŋimomwa amiat.’ Tolimok ekawuoikiniton etic iŋes tema, ‘Ekimar kon logo, kiboikin atipei, kigirak ŋatomonikanikauni.’

⁸“Abu ekapolon kipur ekawuoikiniton etic ŋolo aronon ŋol, aŋuna etiyaa iŋes ŋuna ka apiiryanut, anerae ŋituŋa ŋulu ka akwap a na, epiiryaka nooi aloticisyo akilo ŋituŋa ŋulu ka akica.”

⁹Tolimu nai Yesu tema, “Akalimokini ayoŋ iyes daŋ atemar kikoneutu ŋikonei ke ebari kus a ŋolo ka akwap a na. Ani edaun ebari kus anakwap a na, ikijaunete ikes iyes lore ŋolo eyai akiyar ŋina nyedaun.

¹⁰Ŋinituŋanan ikinyomitae anibore a ŋini edit, ikinyomitae iŋes tari a ŋini alalan; ŋinituŋanan nyikinyomitae anibore a ŋini edit, nyikinyomitae iŋes tari a ŋini alalan.

¹¹Ani pa kikikinyomitae iyoŋ alobari a ŋolo ka akwap a na, ŋae ikijokokini iyoŋ ebari ŋolo a kire?

¹²Ani pa kikikinyomitae iyoŋ a ibore a ituŋanan a ŋinice, ŋae ikiinakini iyoŋ ŋini itemokino toruwor ŋini kon?

¹³“Emam eketiyan epedori akitiya ŋiticisyo ŋulu a ŋikapolok a ŋiarei; eŋeri epei, tosodi tominak ŋoloce, kori imiidikin neni ke epei, tosodi tojamuwa ŋoloce. Nyipedorete iyes akikicarikin akitiyanakin Akuj ka ebari.”

¹⁴Ani iirarete Ŋiparisayon ŋulu aminasi ŋisiliŋa ŋakiro ŋun daadaŋ, tojamuwasi iŋes.

¹⁵Tolimok nai Yesu ikes tema, “Iraakasi iyes ŋituŋa ŋulu itojokasi anakonyen a ŋituŋa, nai eyeni Akuj ŋuna alotai kus. Anerae ibore ŋini itopoloorito ŋituŋa, erae asiilyo aneni ka Akuj.

¹⁶“Etatamyo koloŋ Ŋikisila a Moses ka ŋakigireta ŋuna a ŋikadwarak tari lorwa ŋulu a Yoana ke Ekebatisan. Ŋinapei alorwa a ŋul, aponi kisyakinae alimonokin Ŋakiro ŋuna Ajokak ŋuna ka Apukan ka Akuj. Nabo ecamit ŋinituŋanan alomar Napukan ka agogoŋu.

¹⁷Nai epatana nakuj ka akwap aŋopiyar, akilo tari enyukuta epei a Lokisila aruwor koŋin.

¹⁸“Ŋinituŋanan elaki akeeberu kiit ace, aruwor ekaloman; ŋini daŋ iitari aberu ŋina elakitae, aruwor ekaloman.”

¹⁹“Ayai ekile ŋolo abarit, tonapite ŋilowi ŋulu apol egyelit nooi, kiramirami akimuj ŋisaae daadaŋ.

²⁰Ayai nabo nen ekulyakit ŋolo anyaritae Lasaro, ŋolo erikarito ŋajemei akuwan daadaŋ. Arikununuyo iŋes lokek ke ekile a ŋolo abaran a ŋol,

²¹iitanit akimuj ŋina acakunun alomesa keŋ. Aponeneete ŋiŋokwo daŋ akime ŋajemei keŋ.

²²“Totwan ekulyakit ŋol, yaasi ŋimalaikan iŋes kisiboikis diyete Aburaam anakuj. Totwan ekabaran daŋ, tonukae.

²³Aryeba ekabaran nooi aneni aya ŋikatwak. Ani ireori iŋes kidiama, toanyuwa Aburaam elwana nooi ka Lasaro iboi alodiye keŋ.

²⁴Tosodi iŋes togeu anyaraiyanar ke etoil a ŋolo apolon ebala, ‘Papa Aburaam, kisyoni kare ayoŋ! Kiyaku Lasaro kilumok ekimoin keŋ nakipi ŋadi, ido kitililimik naŋajep kaŋ, anerae akapipilikinit ayoŋ akim na nooi!’

²⁵“Nai abu Aburaam tolimok iŋes tema, ‘Lokoku, toyeni atemar anakiyar kon, iboi iyoŋ neni ajokan, kiboiye Lasaro neni aronon; nai tokona eyai iŋes nege nalakara ka iyai iyoŋ napipilu.

²⁶Akilo ŋun daadaŋ, eyai auwuat ŋinati aoyan ŋina iriwokina kidiŋ yok, ido ani ŋulu ebasi oloto a ne opotu neni kus, nyepedosi, kori ŋulu ecamito aponare aina neni kosi, nyepedosi.’

²⁷Toboŋok ekabaran ŋol iŋes tema, ‘Nai ekemaimai ca ayoŋ iyoŋ papa atemar kiyakiya Lasaro lore ŋolo a papa kaŋ,

²⁸neni eya atalokaato kaŋ ŋulukan. Kicik iŋes ikes toyenut, ikotere nyepotu nakim ŋina apipilan nooi na.’

²⁹“Tolimok Aburaam iŋes tema, ‘Eyakatar atalokaato kon Moses ka ŋikadwarak, itemokino kiirasi ikes.’

³⁰Toboŋok ekabaran ŋol tema, ‘Papa Aburaam, nyitemokino ŋuna; nai ani kelot ituŋanan idio ŋini ayaru alokatwak neni kec, kire ekiyete ikes asecenen.’

³¹Toboŋok Aburaam iŋes tema, ‘Ani pa kiirasi ikes Moses ka ŋikadwarak, nyepedorete akinup tari keyaru ituŋanan alokatwak.’ ”