Read ngakarimojong Luk. 17 Bible Online

Luk. 17 - ngakarimojong bible

Luk. 17

¹Tolimok Yesu ŋikasyomak keŋ tema, “Kire epote ŋakitemyeta ŋuna epedorete akitesec ŋituŋa, nai ekaŋ iŋes ŋini eyauni ŋakiro ŋun!

²Kitemokino iŋes toenikinae amoru ŋinakiryeet lomosiriŋ, tocakakinae nanam, akilo iŋes akitesec ipei a ŋulu cicik a lu.

³Tocoikinito! Ani kesec lokaato kon, kiyayak iŋes; ani keki, kisyoni.

⁴Ani kesec iŋes aneni kon ŋarwa ŋakanikaarei apeipaaran, ido toboŋu ŋarwa ŋakanikaarei tolimu tema, ‘Aki, kisyoni,’ itemokino nai kisyoni iŋes.”

⁵Tolimokis Ŋikiyakia Yesu temasi, “Ekapolon, kiyatak anupit kosi.”

⁶Toboŋok Yesu ikes tema, “Kerae tari todit anupit kus totya icokit ŋini ikoni ŋini ke ebobore, kipedosi alimokin ekitoe lo atemar, ‘Torutun anataagor, min torup ananam!’ Iirari iŋes.

⁷“Ani keyai ipei alokidiŋ kus ŋini eyakar eketiyan ŋolo itae kori iyoki ŋamesekin, ŋina ebunio iŋes alomanikor, itemari iyoŋ iŋes kiboikin kimuj a?

⁸Mam jik! Ilimokini iyoŋ iŋes itema, ‘Tonap arapet, kidoroki akaakimuj atipei. Kidareu daŋ emuj ka omat ayoŋ mono, ani ekaku, kimuj nai iyoŋ.’

⁹Nyejok alimokin eketiyan atemar alakara aŋuna ke etic keŋ, kori ai?

¹⁰Ikote neni tari aneni kus. Ani kitiyata iyes ŋuna ikicikakinitae daadaŋ, temasi, ‘Ikirae isua ca ŋiketiyak, ikitiya isua ŋuna make ikicamakinitae akitiya!’ ”

¹¹Ani elosi Yesu Yerusalem, kitor kidiŋ Samaria ka Galileya.

¹²Ani eapiyari lore ŋolo alosi, kiryamun ka ŋikilyok ŋitomon ŋulu erumit atapon ŋulu apotu towua anawae.

¹³Kiworout ikes ebasi, “Yesu Eketataman, kisyoni isua!”

¹⁴Kiŋolik Yesu ikes tolimok tema, “Toloto neni a ŋisacaradotin ikisyemeto ikes iyes.” Ani elosete ikes alorot, toŋaleut ikes tosegut.

¹⁵Nai ani eanyuni epei alokidiŋ kec atemar aŋaleu, toboŋo elakara ipuro Akuj ka iworoe ke etoil a ŋolo apolon.

¹⁶Tolot toramakin kwap nakejen a Yesu kijuuru, tolakar neni keŋ. Arae iŋes Esamaritanoit.

¹⁷Kiŋit Yesu iŋes tema, “Pa takae arae ŋikilyok ŋitomon etaŋaleunio a? Nyaalu bo ŋikanikaomwon?

¹⁸Inyoni eraakar ituŋanan ŋini ka acekwap eboŋuni akipuro Akuj?”

¹⁹Tolimok Yesu iŋes tema, “Tonyou tolot, ikitaŋaleu iyoŋ anupit kon.”

²⁰Kiŋita Ŋiparisayon ŋice Yesu temasi, “Ori ebunio Apukan ka Akuj?” Toboŋok Yesu ikes tema, “Nyebuni Apukan ka Akuj etakanete ŋakitoodiuneta keŋ.

²¹Emam ituŋanan ŋini etemari, ‘Kiŋolik, eyai ne!’ kori ‘Eyai ama!’ Anerae eyai Apukan ka Akuj neni kus.”

²²Tolimok nai Yesu ŋikasyomak keŋ tema, “Epote ŋirwa ŋulu iitaniata iyes akiŋolikin tari apeikoloŋit ŋina a Lokoku a Ituŋanan, nai nyiŋolikinete jik.

²³Epote ŋice ŋulu ikilimokinete iyes temasi, ‘Kiŋoliyasi ama!’ kori ‘Kiŋoliutu nege!’ Nai nyilot kori nyiwuapakis ikes.

²⁴Anerae ikoni abunore a Lokoku a Ituŋanan akimilyaunet ŋina ebuni ke epeiwae akwap tari lowae ŋoloce, kinuak akwap daadaŋ.

²⁵Nai itemokino mono iŋes kisicanae nooi, nabo toŋero ŋituŋa ŋulu a ŋirwa a lu.

²⁶Ikwaanikinosi ŋakiro ŋuna a ŋirwa a Lokoku a Ituŋanan ka ŋuna koloŋ a ŋirwa a ŋulu a Noa.

²⁷Emujete ŋituŋa daadaŋ ka tomasete, eitanarete ŋikilyok, nabo epotonoryo ŋapesur kiitae tari akitodol akoloŋit ŋina alomarya Noa nataker; nai tomunyasi ŋakipi ŋituŋa ŋuluce daadaŋ.

²⁸Ikwaanikinosi ŋirwa ŋul ka ŋirwa ŋulu a Lot, emujete ŋituŋa daadaŋ ka tomasete, agyelete, nabo togyelanarete, etaete ka todukete.

²⁹Nai akoloŋit ŋina arotokinio Lot alo Sodoma, totiyaun akim ka Sulpa alokidiama ikwa akiru, tomunya ŋituŋa ŋuluce daadaŋ.

³⁰Ikokinete ŋakiro neni Akoloŋit ŋina etakanunia Lokoku a Ituŋanan.

³¹“Akoloŋit ŋin, nyitemokino ituŋanan ŋini eyai kidiama akai, edokuni alemun ŋiboro keŋ ŋulu eya tooma akai. Ituŋanan ŋini eyai lomanikor daŋ, nyitemokino iŋes eboŋuni kai.

³²Totamunito aberu a Lot!

³³Ŋinituŋanan iwarit aiun akiyar keŋ, ecakari; ŋini ejali akiyar keŋ, eiuni.

³⁴Akalimokini ayoŋ iyes atemar, Akoloŋit ŋin nakwaare, eryamunio ŋituŋa ŋiarei alokitaada; elemaryo ipei, toesikinae ŋinice.

³⁵Eryamunio ŋaberu ŋaarei iryeete; elemaryo apei, toesikinae ŋinace. [

³⁶Eryamunio ŋikilyok ŋiarei itiyaete etic alomanikor; elemaryo epei, toesikinae ŋoloce.]”

³⁷Kiŋita ŋikasyomak keŋ iŋes temasi, “Ai Ekapolon?” Toboŋok iŋes tema, “Neni eyai ibore ŋini atwan, iŋes iudakin ŋataruk.”