Read ngakarimojong Luk. 19 Bible Online

Luk. 19 - ngakarimojong bible

Luk. 19

²Ayai nen ekile ŋolo anyaritae Sakayo ŋolo apolokinit ŋikatubok ocur, torae daŋ ekabaran.

³Acamit iŋes aanyun atemar ikoni ituŋanan ebe Yesu ai, nai ikwaŋina auruwuania iŋes, toŋop epite ŋolo iŋolikinia iŋes Yesu, anerae alalak ŋituŋa.

⁴Tosodi nai iŋes toem kiŋaren ŋituŋa, todoka kidiama ekitoe, ikotere eanyuwari Yesu ŋolo etorunit lorot ŋol.

⁵Ani edoli Yesu lokitoe ŋol, kireo kidiama tolimok Sakayo tema, “Sakayo, todoku atipei, acamit ayoŋ aruwor epeyonon nakoloŋit na alokai kon.”

⁶Todoku Sakayo atipei, kijau iŋes Yesu ka alelyan.

⁷Togeut ŋituŋa daadaŋ ŋulu eteete iŋes akiŋuruŋura ebasi, “Alot ituŋanan en aruwor epeyonon ŋolo ke ekasecan!”

⁸Tonyou nai Sakayo tolimok Yesu tema, “Topupok Ekapolon! Alosi ayoŋ ainakin atyaket ŋina ke ekaabari lokulyak, nabo ani keyai ituŋanan ŋini sek amodiyarit ikeebore, atacakini ŋatacakinet ŋaomwon.”

⁹Tolimok Yesu iŋes tema, “Abu aiuno kai na nakoloŋit na; anerae erae ekile lo daŋ ekanateker ka Aburaam.

¹⁰Anerae abuni Lokoku a Ituŋanan akiwarit ka aiun ŋulu eoliyorito.”

¹¹Ani eriŋa ŋituŋa epupete ŋuna erworo Yesu, tolimok iŋes ŋituŋa akitadapet, anerae aapiyarito ikes Yerusalem, nabo totamakinito ŋituŋa atemar kori eapi atipei Apukan ka Akuj atakanun.

¹²Kirworik Yesu tema, “Ayai ekabaran ŋolo anyouni tolot nakwap ŋina alwanan ecamit akituruworo erwosit, ani ekaku, toboŋu lore keŋ.

¹³Tosodi iŋes tonyarau ŋiketiyak keŋ ŋitomon eriŋa iŋes nyerotokino, tokorak ikes ŋisiliŋa ŋitomon ŋulu etiyaunitae ke egolid itiriyanit tolimok tema, ‘Kicurutaata ikes tari ŋina aboŋunio ayoŋ.’

¹⁴Nai aremokino ŋituŋa ŋulu ka akwap keŋ iŋes, kiyakiyasi ŋituŋa neni alosi iŋes temasi, ‘Nyikicamit isua ituŋanan ŋin eruwor erwosit kosi.’

¹⁵“Toboŋu iŋes lore kedaun akituruwor erwosit. Tonyarau iŋes ŋikeeketiyak ŋulu ainakinit iŋes ŋisiliŋa ecamit aanyun etyae ŋolo kepotu ikes kipoidaut.

¹⁶Bu ŋolo ke ekiŋaren tolimok iŋes tema, ‘Ekapolon, aryamu ayoŋ alosiliŋ kon ŋice ŋitomon.’

¹⁷Tolimok ekapolon iŋes tema, ‘Ejok nooi, irae iyoŋ eketiyan ŋolo ikikinyomitae! Ikwaŋina ikikinyomitere iyoŋ anibore a ŋini cici, ipolokini iyoŋ ŋitaunio ŋitomon.’

¹⁸Tosodi bu ŋolo a ŋiarei tema, ‘Ekapolon, aryamu ayoŋ alosiliŋa kon ŋice ŋikan.’

¹⁹Tolimok ekapolon ŋolo daŋ tema, ‘Ipolokini iyoŋ ŋitaunio ŋikan.’

²⁰“Bu eketiyan ŋoloce tema, ‘Ekapolon, ekonisiliŋ lo; ewuait ayoŋ alidakinit narac.

²¹Akakerit ayoŋ iyoŋ, anerae irae iyoŋ ekile ŋolo atyonon. Ilemanari iyoŋ ŋini nyerae ikon, nabo ilemi iyoŋ ŋini pa itakinit.’

²²Tolimok ekapolon eketiyan ŋol tema, ‘Irae iyoŋ eketiyan ŋolo aronon! Akatubokini ayoŋ iyoŋ a ŋakiro a ŋuna ilimu iyoŋ elope! Iyeni iyoŋ atemar arae ayoŋ ekile ŋolo atyonon ŋolo alemanari ibore ŋini nyerae ikaŋ, nabo alemi ŋini nyitakina ayoŋ.

²³Nyo bo ani kikote neni, pa iwuakinia iyoŋ esiliŋ kaŋ nabeŋki, ikotere ani aboŋuni ayoŋ, orukau kiyatakin?’

²⁴“Tolimok ekapolon ŋituŋa ŋulu awuasi a nen tema, ‘Tolemasi esiliŋ aneni keŋ, inakis ŋolo a ŋisiliŋa a ŋulutomon.’

²⁵Tolimokis ikes ekapolon temasi, ‘Ekapolon, eyakasi sek iŋes ŋitomon!’

²⁶Toboŋok ekapolon ikes tema, ‘Akalimokini ayoŋ iyes atemar, ŋinituŋanan eyakar ibore, iyatakinio. Nai ituŋanan ŋini emamukar ibore, edemaryo tari ŋinidio cici daŋ ŋini eyakar iŋes!

²⁷Nai ani ikwa ŋimoi kaŋ lu, ŋulu nyakacamito ayoŋ akipuka ikes, torikutu ikes ne toŋolae ete ayoŋ!’”

²⁸Ani kedau Yesu erwor ŋakiro ŋun, torubak elosi Yerusalem kiŋarenik ikes.

²⁹Ani eapikini iŋes ŋitaunio ŋulu a Betepage ka Betania, ŋulu aya diye emoru a ŋikito a ŋulu enyaritae Olipa, kiyakiya iŋes ŋikasyomak keŋ ŋiarei kiŋaren,

³⁰tolimok ikes tema, “Apesi lore ŋolo eyai kiŋaren kus; ani ilomarete, iryamunete eenitae isigirya ŋini emam ituŋanan adok, tolacut torikut nege.

³¹Ani kikiŋit idiotuŋanan iyes atemar, ‘Kaanukiro ilacata iyes isigirya?’ Tolimokis iŋes atemar, ‘Ekapolon iitanit iŋes.’ ”

³²Toloto ikes toryamut ibore daadaŋ ikoni neni alimokinitor Yesu ikes.

³³Ani eriŋa ikes elacete isigirya, kiŋita ŋilopeyek ikes temasi, “Kaanukiro ilacata iyes isigirya?”

³⁴Toboŋokis ikes temasi, “Ekapolon iitanit iŋes.”

³⁵Torikut nai ikes isigirya neni a Yesu, kidokokis ŋikecelowi kidiama, ido kiŋarakis Yesu adokar nisigirya.

³⁶Ani erotokini iŋes a isigirya, topetakis ŋituŋa ŋilowi kec lorot.

³⁷Ani eapuuni Yesu Yerusalem neni etiyaaror erot ŋolo eteni moru a ŋikito a ŋulu enyaritae Olipa, tolomak asepic a ŋikasyomak alelyan ka akipuro Akuj iworoete nooi, ikotere ŋakiro ŋuna kepotu ikes toanyut. Temasi ikes,

³⁸“Erereŋ erwosit ŋolo ebunit alokiro ke Ekapolon! Toyai ekisil nakuj ka akipuro neni ka Akuj alokidiama nooi!”

³⁹Tolimokis Ŋiparisayon ŋice ŋulu aya nasepic a ŋituŋa Yesu temasi, “Eketataman, kiyayak ŋikonikiyakia kililiŋa!”

⁴⁰Toboŋok Yesu ikes tema, “Akalimokini ayoŋ iyes atemar, ani kililiŋa ikes, ecelunete ŋamoru nu.”

⁴¹Toapiya Yesu Yerusalem; ani iŋolikini, kikalou aŋuna a ŋituŋa a ŋulu ke etaun a ŋol,

⁴²tema, “Okoe, kerae ca toyenete iyes nakuwar na ibore ŋini erae ikisilet! Nai tokona iwuaitae anakonyen kus!

⁴³Epote ŋirwa ŋulu ikirikauniata iyes ŋimoi kus itoroosi alowaetin a daadaŋ.

⁴⁴Ikinyasunete ikes iyes ka ŋidwe kus ŋulu eya tooma ŋakorya kus; emam amoru tari apei daŋ ŋina imyekinio ewuoi, anerae pa iyenete iyes apaki ŋina ebunio Akuj aiun iyes!”

⁴⁵Toloma Yesu Kai ka Akuj, kirita ŋimucurus.

⁴⁶Tolimok ikes tema, “Elimunitoe a Nakigireta ebe, ‘Enyarao Akai kaŋ Akai ŋinakilipet.’ Nai tokona ituruwosi iyes iŋes akai ŋina eŋopitotor ŋikokolak!”

⁴⁷Etatami Yesu ŋirwa daadaŋ alo Kai ka Akuj. Acamito ŋisacaradotin ŋulu apolok ka ŋiketatamak a Ŋikisila ta ŋikatukok akiar Yesu;

⁴⁸nai toŋopik ikes epite ŋoloaret iŋes, anerae apupete ŋituŋa daadaŋ ŋakiro a Yesu, emam ŋini acamit tari apeikirot ebucar.