Read ngakarimojong Luk. 2 Bible Online

Luk. 2 - ngakarimojong bible

Luk. 2

¹Ŋirwa ŋul, tolimu Agusto ekepukan a Roma atemar itemokino kigirae ka kimarae ŋituŋa ka akwap daadaŋ.

²Arae ŋin akigiro ŋina esyaunan ŋirwa ŋulu araakar Kurino ekepukan ŋolo a Siria.

³Toloto nai ŋituŋa daadaŋ akigiro; a ŋinituŋanan tolot lokitela a papa keŋ.

⁴Tonyou Yosepu daŋ alore a Nasaret a ŋolo eyai nakwap ŋina a Galileya, tolot lotaun a Daudi ŋolo anyaritae Betelem anakwap a ŋina a Yudaya. Alosi iŋes inaa, anerae arae iŋes ŋolo anateker a Daudi.

⁵Torukosi iŋes ka Maria ŋina eikinitae iŋes akiit, ŋina daŋ apoti.

⁶Ani eriŋa ikes eya Betelem, todol ŋirwa ŋulu idounio Maria.

⁷Kidou iŋes ikoku keŋ ŋini sapat ŋini kiyae, kimukok ŋilowi, kiperik iŋes nataker ŋina amasyata ŋaatuk, anerae amam ikes neni perot ka adidiŋ akai ŋina a ŋipeyok.

⁸Ayakasi nakwap ŋin ŋikeyokok ŋulu aperikinito ŋikecebaren nakwaare.

⁹Totakanik emalaika ŋolo ke Ekapolon neni kec, tocaik akica ŋina ke Ekapolon ikes, tokuryaketa ikes nooi.

¹⁰Tolimok emalaika ikes tema, “Nyikuryaketa, akainunit ayoŋ iyes Ŋakiro ŋuna Ajokak ŋuna italakarete nooi ŋituŋa daadaŋ.

¹¹Anerae nakuwar na, edoun Ekaiunan kus alotaun a Daudi--Kristo ŋolo erae Ekapolon!

¹²Erae na akitaanyikinet ŋina ianyuniata iyes: iryamunete ikoku ŋini cici ŋini imukoritae a ŋilowi eperi anataker a ŋina emasyata ŋaatuk!”

¹³Ŋinapeipaki, bu asepic ŋina a ŋimalaikan anakuj, kimorikin ka emalaika ŋol, toeikis ipurosi Akuj ebasi,

¹⁴“Akipuro toyai kidiama neni ka Akuj, ka ekisil nakwap neni a ŋituŋa a ŋulu italakarito Akuj!”

¹⁵Ani eboŋorete ŋimalaikan nakuj, kirworikinos ŋikeyokok make temasi, “Oloto Betelem, oanyutu ŋakiro ŋuna ketakanut ŋuna ikilimok Ekapolon iwon.”

¹⁶Kikomakis ikes atipei, toryamut Maria ka Yosepu ta ikoku ŋini cici ŋini aperi anataker.

¹⁷Ani iŋolikinete ŋikeyokok iŋes, tolimokis ikes ŋakiro ŋuna alimokinit emalaika ikes aŋuna a ikoku a ŋin.

¹⁸Ŋituŋa daadaŋ ŋulu apotu kiirasi, toumokis aŋuna a ŋakiro a ŋuna erworosi ŋikeyokok.

¹⁹Kiric nai Maria ŋakiro ŋun daadaŋ, ido eomoomoe alotau keŋ.

²⁰Toboŋosi ŋikeyokok ipurosi ka emaete Akuj, aŋuna a ŋakiro a daadaŋ a ŋuna eirarete ikes ka ŋuna eŋolikinete daŋ, ikoŋinapei alimokinitere ikes.

²¹Ani edoli ŋirwa ŋikanikauni ŋulu kileŋeret ikoku, tolimokinae ekeekiro Yesu, ekiro ŋolo alimori emalaika eriŋa nyepotiuno iŋes.

²²Ani edoli akoloŋit ŋina kitesegunet Maria ka Yosepu, ikwaŋina igiritere Lokisila a Moses, toloto ikes Yerusalem akitoodiyar ikoku kiŋaren Ekapolon.

²³(Ikwaŋinapei igiritere Lokisila ŋulu ke Ekapolon ebe, “Ŋinikoku sapat ŋini erae ikiyae, itemokino kitaleoroe neni ke Ekapolon.”)

²⁴Tolemut daŋ ikes amuronot ŋina einakinio Akuj, ŋakuryo ŋaarei kori ŋicwi ŋulu a ŋakuryo ŋiarei, ikwaŋina elimunitere a Lokisila ke Ekapolon.

²⁵Ayai Yerusalem ekile ŋolo anyaritae Simeon. Arae iŋes ekile ŋolo eyookino ŋolo ainakina neni ka Akuj; edarit iŋes akoloŋit ŋina eiunere Isirael, nabo ayai Etau ŋolo Asegan neni keŋ.

²⁶Alimokinit Etau ŋolo Asegan iŋes atemar nyetwani eriŋa nyiŋolikina Kristo ŋolo ke Ekapolon.

²⁷Yau Etau ŋolo Asegan iŋes Kai ka Akuj. Ani eyaunete ŋikauruunak ikoku Yesu Kai ka Akuj akitale ikwaŋina elimunitere a Lokisila,

²⁸todak Simeon ikoku, kipur Akuj tema,

²⁹“Iyook tokona iyoŋ Ekapolon akiikinet kon, kimyekinae nai ekoniketiyan eeŋu a ekisil.

³⁰Anerae aanyu ayon elope aiuno kon,

³¹ŋina itemok iyoŋ alokiŋaren ŋituŋa daadaŋ.

³²Akica ŋina ecaikini lobukui ŋulu nyerae Ŋiyudayan, ka ŋina erae akipuro ŋina a ŋituŋa kon Isirael.”

³³Toumokis Papa ka toto a ikoku aŋuna a ŋakiro a ŋuna erworoe aŋuna a ikoku.

³⁴Kiterereŋ Simeon ikes, tolimok nai iŋes Maria toto a Yesu tema, “Aseu Akuj ikoku en, ikotere inyasunotor ŋikalalak ka ikotere eiunotor ŋikalalak alo Isirael. Erae daŋ iŋes akitaanyikinet aneni ka Akuj ŋina epegete ŋikalalak,

³⁵ikotere ileereunioto ŋakiro ŋuna imunonito ikes alotai kec. (Tari iyoŋ alope, ikiryebete ŋican etau esibit ikicumitae ka atum.)”

³⁶Ayai akadwaran ŋina anyaritae Ana, nakoku a Panuel a ŋolo ka ateker a ŋina ka Aser. Amojoŋit iŋes nooi. Kiboito iŋes ka lokile keŋ ŋikaru ŋikanikaarei bon ameun ŋina eisere iŋes.

³⁷Arae iŋes apuserut ŋina adolito ŋikeekaru ŋatomonikanikauni ka ŋiomwon. Pa arotonokini iŋes alo Kai ka Akuj; etiyae etic ŋolo ke Ekapolon Akuj apaaran jwii ka akuwar kya, kikanyanakini akimuj kilipi akilip bon.

³⁸Todolu iŋes apaki ŋinapei ŋin tolakar neni ka Akuj, tolimok ŋakiro ŋuna a ikoku lotuŋa daadaŋ ŋulu edarito aiuno a Yerusalem.

³⁹Ani kedaut ikes akitiya ŋakiro daadaŋ ikwaŋina ecikakinitere a Lokisila a ŋulu ke Ekapolon, toboŋosi Galileya, toloto lore kec Nasaret.

⁴⁰Topolou ikoku, togogoŋior, kilelebun aosou; kiterereŋ Akuj iŋes. Akuj aŋuna keŋ.

⁴¹A ŋolokaru aloseneneete ŋikauruunak a Yesu Yerusalem nasuban ŋuna a Paska.

⁴²Ani edolete ŋikaru a Yesu ŋitomon ka ŋiarei, toloto ikes Yerusalem ikwapei araakar ekecetal.

⁴³Ani edaunosi ŋasuban ŋuna a Paska, toboŋosi ikes lore; nai kebu esapat Yesu kidoŋ Yerusalem pa eyenete ŋikeekauruunak.

⁴⁴Atamete ikes atemar kori ayai iŋes nasepic a ŋikalotok; toloto ikes akoloŋit ŋin daadaŋ akiwarit iŋes loyeneta ka lokonei kec.

⁴⁵Ani eŋopikini iŋes ikes, toboŋosi Yerusalem akiwarit iŋes.

⁴⁶Kedaunosi ŋirwa ŋiuni, apotu toryamut iŋes alotooma Akai ka Akuj iboiyete ka ŋiketatamak, epupi ŋuna erworosi ikes, nabo kiŋisenenee ikes ŋakiro.

⁴⁷Toumokis ŋituŋa daadaŋ ŋulu apupete iŋes aŋuna ka aosou a ŋina a ŋakiro a daadaŋ a ŋuna aboŋonokini iŋes ikes.

⁴⁸Ani iŋolikinete ŋikauruunak keŋ Yesu, toumokis. Tolimok toto keŋ iŋes tema, “Aa robo lokoku, inyoni bo itiyaa iyoŋ neni kosi ikona? Ikiyaloloŋi ayoŋ ka Papa kon nooi ikiwarit iyoŋ.”

⁴⁹Toboŋok Yesu ikes tema, “Kaanukiro ikiwaritotor iyes ayoŋ? Pa iyenete iyes atemar itemokino ayoŋ oyai Kai a Papa kaŋ a?”

⁵⁰Nai nyeyenut ikes apolou ŋina a ŋakiro a ŋuna alimokini iŋes ikes.

⁵¹Toboŋosi nai iŋes ka ikes Nasaret, kiboyoto ka ikes epupi ŋakecekiro. Kiricak toto keŋ ŋakiro ŋun daadaŋ alotau keŋ.

⁵²Abu Yesu topolou ka kiyatakin aosou italakarit Akuj ka ŋituŋa.