Read ngakarimojong Luk. 20 Bible Online

Luk. 20 - ngakarimojong bible

Luk. 20

¹Akoloŋit apei ŋina ayakar Yesu Kai ka Akuj itatami ŋituŋa Ŋakiro ŋuna Ajokak, potu ŋisacaradotin ŋulu apolok ka ŋiketatamak a Ŋikisila ta ŋikatukok neni keŋ,

²kiŋita iŋes temasi, “Tolimokinae cenite iyoŋ isua neni ebunitor apedor ŋina itiyaa iyoŋ ŋakiro nu. Ŋae ikiinakinit iyoŋ apedor na?”

³Toboŋok Yesu ikes tema, “Ekeŋisi ayoŋ daŋ iyes apeikirot. Tolimokinae cenite iyes ayoŋ.

⁴Ai abunitor apedor ŋina ebatisaa Yoana ŋituŋa, neni ka Akuj kori lotuŋa?”

⁵Togeut ikes akiŋitanar make ebasi, “Okoe ikitemari mono ai? Ani kikitema iwon, ‘Abunit aneni ka Akuj,’ etemari iŋes, ‘Ani nyo bo pa inupyata iyes ŋakiro a Yoana?’

⁶Nabo kikitema iwon, ‘Abunit alotuŋa,’ ikicaki iwon asepic a ŋituŋa a ŋamoru, anerae enupito ikes nooi atemar arae Yoana ekadwaran.”

⁷Tosodi toboŋokis temasi, “Nyikiyeni isua neni abunitor.”

⁸Tolimok Yesu ikes tema, “Nyakalimokini ayoŋ daŋ iyes neni ebunitor apedor ŋina etiyaa ayoŋ ŋakiro nu.”

⁹Tolimok Yesu ŋituŋa akitadapet na, “Abu ekile kita emanikor ŋolo a ŋikito a ŋulu ecuyo epiini, ido kicikak ŋituŋa ŋulu etiyaete lomanikor, tolot nai iŋes akiboi lobuku ece.

¹⁰Ani edoli ŋirwa ŋulu elemere, kiyakiya iŋes epito keŋ loketiyak akijaun ŋadiraito; nai apotu ŋiketiyak kikamut epito ŋol, kibuŋata, kitoboŋosi iŋes emam idiobore etiŋit.

¹¹Kiyakiya nabo iŋes epito keŋ ece, kibuŋata ŋolo daŋ, tobolyatar, kitoboŋosi a ŋakan.

¹²Kiyakiya nabo iŋes epito keŋ ŋolo a ŋiuni; kitereŋut ŋiketiyak ke emanikor ŋolo daŋ, kiritasi alomanikor.

¹³Tosodi elope ŋolo ke emanikor tolimu tema, ‘Ekokini ayoŋ ai? Eyakiyari ayoŋ lokoku kaŋ ŋolo minat, acepaki ekerete ikes iŋes!’

¹⁴Nai ani eanyuwarete ŋiketiyak ŋulu ke emanikor iŋes, kirworikinos make temasi, ‘Lokoku keŋ lo! Potu oara eruma iwon emanikor ŋolo ke epiini!’

¹⁵Yaasi ikes iŋes kiŋa emanikor, toarakis inaa.” Kiŋit Yesu ikes tema, “Anukiro nai itiyakini elope ŋolo ke emanikor loketiyak ŋul?

¹⁶Ŋina ebunio iŋes eari ŋiketiyak ŋulu ke emanikor, tosodi inak emanikor loketiyak ŋice.” Ani iirarete ŋituŋa ŋakiro ŋun temasi, “Nyikiryama ca ka ŋun!”

¹⁷Kiŋolik Yesu ikes tolimok tema, “Nyo nai apolou a ŋakiro a ŋuna igiritae Nakigireta ikona? ‘Amoru ŋina koloŋ aŋerete ŋikadukok, iŋes tokona itogogoŋit akai alokoona!’

¹⁸Ituŋanan daadaŋ ŋini eramakin namoru ŋin, enyilinyilaar; ani ecakakin amoru ŋin ice kidiama, inyaadiyari iŋes toruwor apuwa.”

¹⁹Acamito ŋiketatamak a Ŋikisila ka ŋisacaradotin ŋulu apolok akikamun Yesu apaki ŋin, anerae ayenete atemar arae ikes alimunitor Yesu akitadapet ŋin. Nai tokera akikamun iŋes aŋuna a ŋituŋa.

²⁰Kiwara ikes erot ŋolo kikamunet iŋes, ikotere torikosi iŋes lokapolok ŋulu a Ŋiromanin. Kiluŋuluŋa ikes ŋibekae, inakis ŋisiliŋa kiyakiyasi nai alokun Yesu alorwor keŋ. Toloto ŋibekae neni a Yesu esubito ŋituŋa ŋulu ajokak.

²¹Tolimokis ŋibekae ŋul Yesu temasi, “Eketataman, ikiyeni isua atemar iyookino ŋakiro ŋuna irworo iyoŋ ka ŋuna itatami daŋ. Nyimisit iyoŋ kepol ituŋanan kori kemam, nai itatami iyoŋ ŋuna a kire ŋuna ka Akuj alopite a ŋolo iyookino.

²²Tolimokinae isua, ikicamakinito mono Ŋikisila obukosi ocur neni ke ekepukan a Roma kori mam?”

²³Ikwaŋina ayenia Yesu atemar alokunito ikes iŋes a ŋakiro a ŋun, tolimok ikes tema,

²⁴“Kitoodikinae cenite esiliŋ.” Tosodi Yesu kiŋit ikes tema, “Ŋolo a ŋae ereet lo ka ŋakigireta nu?” Toboŋokis ikes temasi, “Ŋulu ke ekepukan a Roma.”

²⁵Tolimok Yesu ikes tema, “Inakisi ekepukan a Roma ŋini erae ikeŋ, inakis Akuj ŋini erae ŋini ka Akuj.”

²⁶Toŋopikis ikes ŋakiro ŋuna lokunet iŋes a nen alokiŋaren ŋituŋa. Toumokis ikes nooi a ŋakiro a ŋuna aboŋokini Yesu, kililiŋa cek.

²⁷Potu neni a Yesu Ŋisadukayon ŋice ŋulu apegasi atemar eyarunete ŋikatwak, kiŋita ikes Yesu temasi,

²⁸“Eketataman, egirit koloŋ Moses aŋuna kosi ebala, Ani ketwana lokaato keŋ ke ekile, toesik aberu keŋ emam ŋidwe, itemokino lokaato keŋ kirum aberu, touru ŋidwe aŋuna alokaato keŋ a ŋolo atwan.

²⁹Aya ŋikaitotoi ŋikanikaarei; kiita ŋolo apolon totwan, nyeryamuna ŋidwe.

³⁰Kirum ŋolo a ŋiarei aberu;

³¹ka ŋolo a ŋiuni ka ŋuluce daadaŋ kiruma aberu, nai totwaka ikes daadaŋ, nyeryamuna ŋidwe.

³²Ekaku abu aberu daŋ totwan.

³³Ani akoloŋit ŋina eyaruniata ŋituŋa daadaŋ, eruwor aberu ŋin ŋina a ŋae? Anerae arae iŋes aberu a ŋulukanikaarei a daadaŋ.”

³⁴Toboŋok Yesu ikes tema, “Ŋituŋa ŋulu ka akwap a na iitanarete ka iitanaryo,

³⁵nai ŋulu eryamun iyookino ikotere ŋirwa ŋulu eponito ka ayarun ŋina a ŋikatwak, nyiitanarete kori nyiitanaryo.

³⁶Nyetwakete ikes nabo, anerae ikwaanikin ikes ka ŋimalaikan; eraakasi ikes ŋidwe ŋulu ka Akuj ka ŋulu ka ayarun alokatwak.

³⁷Tokona ŋuna ka ayarun alokatwak itoodiunit Moses daŋ anakigireta a ŋuna ka amoni a ŋina anoki atemar eyarunete ŋikatwak, anerae enyarit iŋes Ekapolon ebe, ‘Akuj ŋina ka Aburaam, Akuj ŋina a Isaka ka ŋina a Yakobo.’

³⁸Erae iŋes Akuj ŋina a ŋulu eyarete, meere Akuj ŋina a ŋulu etwakito; anerae aneni keŋ eyarete daadaŋ.”

³⁹Kirworikis ŋiketatamak a Ŋikisila ŋice temasi, “Eketataman, irwor iyoŋ ejok!”

⁴⁰Anerae apotu Ŋisadukayon tokera akiŋit iŋes ŋakiŋiseta ŋace.

⁴¹Kiŋit Yesu ikes tema, “Nyo ebaakatar ŋituŋa erae Kristo lokoku a Daudi?

⁴²Anerae ebala Daudi elope alokitaabo a ŋolo a ŋieosyo ebe, ‘Atema Ekapolon neni ke Ekapolon kaŋ, kiboikin iyoŋ teten kaŋ,

⁴³akitodol neni ewuakinia ŋikonimoi kwap ŋakejen kon.’

⁴⁴Ani kenyarit Daudi iŋes ‘Ekapolon;’ ikokini nai iŋes eruwor lokoku keŋ ai?”

⁴⁵Ani epupokini asepic ŋina a ŋituŋa Yesu, tolimok iŋes ŋikasyomak keŋ tema,

⁴⁶“Tocoikinito ŋiketatamak a Ŋikisila; eminasi ikes akirimit enapito ŋikaasoi ŋulu aoyak, nabo ecamito kimalae ikwa ŋikapolok alomaket. Eseete ikes ŋikicoloŋo ŋulu ebusak alosinagogae ka anasuban.

⁴⁷Edemete ikes ŋapuseru ŋiboro kec ka daŋ ilipete ekaoyan iwogasi neni erae koŋin! Eryamunete ikes atubokino ŋina aronon nooi!”