Read ngakarimojong Luk. 21 Bible Online

Luk. 21 - ngakarimojong bible

Luk. 21

¹Toŋoleŋolek Yesu toanyuwa ŋikabarak iwuanakinete ŋisiliŋa nasaduku ŋina ayai tooma Kai ka Akuj.

²Toanyuwa iŋes tari apuserut ŋina a ŋican ecakakini ŋikapun ŋiarei.

³Tolimu Yesu tema, “Akalimokini ayoŋ iyes kire atemar, ewuak apuserut ŋina a ŋican na ŋisiliŋa ŋulu alalak nasaduku, akilo ŋituŋa ŋuluce daadaŋ;

⁴anerae ecakanakinete ŋuluce daadaŋ ŋisiliŋa ŋulu erae ŋipiya alobari kec. Nai acakaki apuserut ŋin anakulyako keŋ ŋulu daadaŋ ayakar ka edaritor akeekiyar.”

⁵Ani irworosi ŋikasyomak ŋice ŋakiro ŋuna ka Akai ka Akuj, akibuses ŋina a ŋamoru keŋ ka epite ŋolo esibusitere, tolimu Yesu tema,

⁶“Nu daadaŋ ŋuna iteete iyes edoli akoloŋit ŋina nyidoŋio tari apeimoru ewuoi a nege; eukoryo ŋamoru daadaŋ.”

⁷Kiŋita ikes iŋes temasi, “Eketataman, ori mono itiyakinotor ŋakiro ŋun? Nyo eruwor akitoodikinet ŋina itoodiuni atemar adol apaki?”

⁸Toboŋok Yesu ikes tema, “Tocoito nyikimodik ituŋanan. Epote ŋikalalak irworosi alokiro kaŋ ebasi, ‘Ayoŋ iŋes ŋolo!’ kori ebasi, ‘Adol apaki!’ Nai tocoito iwuapakinete ikes.

⁹Kiuryasi nyikibul iirarete ŋakiro ŋuna ke ejiye ka ŋuna ke egurigur; itemokino ŋakiro ŋun totakanut mono, nai nyitoodiunito ikes atemar adol asalunet.”

¹⁰Kirworik nabo Yesu tema, “Ejikinosi ŋituŋa ŋulu ka akwap ka apei ka ŋulu ka akwap ka ace; ejikin apukan ka apukan, epeibuku ka ŋulu ke ecebuku.

¹¹Eyakaun amaran ŋina ka akwap alowaetin a ŋulu egelegelya, nabo eyakaun eron ka ŋidekesyo daadaŋ ŋulu aronok; etakanunete ŋakitoodikineta ŋuna atyonok alokidiama, kitubulo ŋituŋa.

¹²Nai eriŋa ŋun daadaŋ nyitiyakina, ikikamunio iyes ikisicani nooi, ikiyaaryo iyes losinagogae ka mabus, ido itorikor akitowuo alokiŋaren ŋikarikok ka ŋikapolok aŋuna kaŋ.

¹³Apaki ŋin, iŋes iruworotor iyes ŋisuudae kaŋ.

¹⁴Kiuryasi nyikibul iyes ikotere ŋunalimuno kori epite ŋolo limunet,

¹⁵anerae ayoŋ elope akainakini iyes ŋakiro ŋuna ka aosou ŋuna emam ipei daŋ alokidiŋ ŋikusimoe ŋini epedori akiloc, kori apegakin.

¹⁶Ikilukinete iyes ŋikusikauruunak, atalokaato kus, ŋiyeneta kus ka ŋikusikonei ka epedorete tari akiar iyes ŋice.

¹⁷Ikiremokinosi ŋituŋa daadaŋ iyes aŋuna ke ekiro kaŋ.

¹⁸Nai emam tari etimat epei anakyes kus ŋolo ecakar.

¹⁹Ani kidaŋidaŋakis iyes ŋun, iunete akusikiyar.

²⁰“Ani iŋolikinete iyes Yerusalem irikaunito ŋajorei a ŋimoi, toyenete atemar aapiki akinyasun iŋes.

²¹Itemokino ŋulu eyakasi Yudaya, toema lomoru; nabo ŋulu eyakasi Yerusalem, itemokino torotokis ka ŋulu eyakasi nariet, itemokino nyelot lotaun.

²²Anerae erae ŋul ŋirwa ŋulu ka anyaŋan, kiyookinotor ŋuna igiritae Nakigireta daadaŋ.

²³Erokyarosi nooi ŋirwa ŋulu anaberu a ŋuna epotiyete ka ŋuna itanakete! Anerae eyakaun ŋican ŋulu apolok nakwap na, nabo emini anyunyura ŋina ka Akuj lotuŋa ŋul!

²⁴Earyo ikes ŋice ka atum, ŋice eruworosi ŋirikon nakwapin ŋunace; ipudaete ŋituŋa ŋulu nyerae Ŋiyudayan Yerusalem, akitodol ŋirwa ŋulu esalunia apukan a ŋituŋa a ŋulu nyerae Ŋiyudayan.

²⁵“Eyakaun ŋakitoodikineta nakoloŋ, lolap ka lokacer. Egeuni akwap daadaŋ aryeba ka amaran aŋuna ke eruye ka akimorokok ŋina ka anam.

²⁶Emaranikinete ŋituŋa kirakanaros ebulit aŋuna a ŋican a ŋulu epote nakwapin daadaŋ; anerae emaranikinete tari ŋiboorei daadaŋ ŋulu alokidiama.

²⁷Tosodi etakanuni Lokoku a Ituŋanan, iŋolikinio ebunit alodowuon ka apedor ka akica ŋina apolon.

²⁸Ani edoli ŋirwa ŋulu iyookinotor ŋun daadaŋ, towua kireosi ŋakyes kus kidiama, anerae aapuu aiuno kus.”

²⁹Abu Yesu tolimok ikes akitadapet na tema, “Totamakisi mono iyes epite ŋolo ke ebobore ka ŋikito ŋuluce daadaŋ.

³⁰Ani iŋolikinete iyes ŋakwii kec itilijaunete, toanyut atemar aapuu akamu.

³¹Ikwaŋinapei, ani iŋolikinete iyes ŋun itiyakin, toanyutu atemar aapuu Apukan ka Akuj adolun.

³²“Akalimokini ayoŋ iyes kire atemar, nyedaun anyamet na eriŋa nyitiyakina ŋakiro ŋun daadaŋ.

³³Edaunosi nakuj ka akwap, nai nyedaunosi ŋakiro kaŋ jik.

³⁴“Tokienyete! Kiuryasi adakanu, amera ka apodo ŋuna ka akiyar a na, nyikitumosi iyes, todolu akoloŋit ŋin atipei pa iyenete iyes,

³⁵ikwa aloc. Itiyakin ŋakiro ŋun lotuŋa ŋulu a ŋakwapin a daadaŋ.

³⁶Torubakisi ikienyete, nabo kilipete jwi jwi, ikotere toryamut agogoŋu ŋina ibucarotor anakiro a daadaŋ a ŋuna etakanunete ka towueta alokiŋaren Lokoku a Ituŋanan.”

³⁷Ŋirwa ŋul, etatami Yesu alo Kai ka Akuj jwi jwi, ani ewari tolot lomoru a ŋikito a ŋulu enyaritae Olipa.

³⁸Esyokanakinete ŋituŋa daadaŋ Kai ka Akuj akipup ŋakiro keŋ.