Read ngakarimojong Luk. 22 Bible Online

Luk. 22 - ngakarimojong bible

Luk. 22

¹Toapuut ŋasuban a ŋamugati a ŋuna emam ŋakinyalet, ŋasuban ŋuna enyaritae Paska.

²Ewarito ŋisacaradotin ŋulu apolok ka ŋiketatamak a Ŋikisila atukun epite ŋoloaret Yesu, nai akuryanito ikes aŋuna a ŋituŋa.

³Toloma Satan lotau a Yuda a ŋolo anyaritae Isikariot, ŋolo arae epei a ŋulutomon ka ŋiarei.

⁴Tolot Yuda akirworiun ka ŋisacaradotin ŋulu apolok ka ŋikapolok ŋulu a ŋiketeok Akai ka Akuj epite ŋolo kipotokinet Yesu neni kec.

⁵Tolakaros ikes, tocamut ainakin iŋes ŋisiliŋa.

⁶Tocamu nai Yuda ŋisiliŋa, kisyak akiwarit apaki ŋina etemokino torikorere ikes neni a Yesu pa eyenete ŋituŋa.

⁷Todol akoloŋit ŋina a ŋamugati a ŋuna emam ŋakinyalet, akoloŋit ŋina a Paska ŋina eŋolere imesek.

⁸Kiyakiya Yesu Petero ka Yoana tema, “Toloto kitemokis akimuj ŋina a Paska emuja.”

⁹Kiŋita ikes Yesu temasi, “Ai icamitor iyoŋ isua etemokinioto?”

¹⁰Toboŋok iŋes ikes tema, “Topupokisi! Ani ilomarete iyes lotaun, iryamete ka ekile eryoŋit amot ŋina a ŋakipi. Kiwuapakisi iŋes tari kai ŋina elomari,

¹¹ido tolimokis elope ŋolo ka akai temasi, ‘Ebala Eketataman, ai eyai agule ŋina itemokino ayoŋ ka ŋikaakasyomak emujata akimuj ŋina a Paska?’

¹²Ikitoodikini iŋes iyes agule ŋina eyai kidiama ŋina aloloman ŋina esubakinitae, kitemokis ibore daadaŋ a nen.”

¹³Toloto ikes toryamut ibore daadaŋ ikoni neni alimokinitor Yesu ikes; tosodo kitemokis akimuj ŋina a Paska.

¹⁴Ani edoli apaki, kiboikinos Yesu ka ŋikasyomak keŋ kimuja.

¹⁵Tolimok iŋes ikes tema, “Ekemuit ayoŋ nooi akimor ka iyes akimuj ŋina a Paska naga, eriŋa ŋican kaŋ nyedoluno!

¹⁶Akalimokini ayoŋ iyes atemar, emam nabo jik nyemuji akimuj na akitodol akoloŋit ŋina iyookinor apolou keŋ a Napukan ka Akuj.”

¹⁷Tolemu nai Yesu ekopo, tolakar neni ka Akuj, ido tolimu tema, “Kijaasi lo, tomora,

¹⁸anerae akalimokini ayoŋ iyes atemar, ameun tokona emam nabo nyamasi epiini akitodol Akoloŋit ŋina ebunio Apukan ka Akuj.”

¹⁹Tosodi tolemu amugati, tolakar neni ka Akuj, tonyilinyili, inak ikes tema, [“Erae naga akaakuwan ŋina ejalyo ikotere iyes. Kitiyaete ikona ikiitunitotor ayoŋ.”

²⁰Ikwaŋinapei kedaun akimuj, abu iŋes tolemu ekopo, inak ikes tema, “Erae logo ekopo ŋolo a ŋaokot kaŋ aŋuna ka Acamunet a ŋina kitete ŋuna ebukoritae ikotere iyes.]

²¹“Nai kiŋolikisi, ikirukit ayoŋ a ne alomesa ka ŋolo akalukini ayoŋ!

²²Kire etwani Lokoku a Ituŋanan ikwaŋina adwaritere; nai ekaŋ ekile ŋolo erikokini iŋes ŋituŋa!”

²³Togeut ikes akiŋitanar make atemar ŋae alokidiŋ kec itiyakini ŋakiro ŋun.

²⁴Topegakinos ŋikasyomak a Yesu irworosi make ebasi, ŋae alokidiŋ kec epol akilo ŋuluce.

²⁵Tolimok Yesu ikes tema, “Epolokinito ŋirwosi ŋulu a ŋibukui a ŋulu nyerae Ŋiyudayan ŋituŋa kec; nabo ŋulu ipukato enyaritae ‘Ŋikeŋaranakinak ŋituŋa.’

²⁶Nai nyitemokino ŋakiro ikote neni aneni kus; itemokino ŋini epol aneni kus kikwaanikin ka ŋini edit ka ekarikon kikwaanikin ka eketiyan.

²⁷Nyaani ŋini epol, ŋini iboi alomesa kori ŋini ekori akimuj? Meere mono ŋini iboi alomesa a? Nai ayai ayoŋ kidiŋ kus arae ekejanakinan.

²⁸“Irae iyes ŋulu ikiruk ka ayoŋ anakikatakineta kaŋ a daadaŋ.

²⁹Ikwaŋina eketuruworya Papa kaŋ ayoŋ Ekapolon, eketuruwori ayoŋ iyes daŋ ŋikapolok,

³⁰ikotere kimuja ka tomata daŋ a Napukan kaŋ. Kiboikinotor lokicoloŋo, totubonokis ŋatekerin ŋunatomon ka ŋaarei ŋuna a Isirael.

³¹“Simoni, Simoni! Topupok mono iyoŋ! Aryamu Satan apedor ŋina kikeikeet iyes daadaŋ, ikwaŋina ikeikeya eketan ŋimomwa.

³²Nai ekelipak ayoŋ iyoŋ Simoni, ikotere nyepuripuryaar anupit kon. Ani iboŋuni iyoŋ nabo neni kaŋ, itemokino iyoŋ kitogogoŋ ŋikonikaitotoi.”

³³Toboŋok Petero iŋes tema, “Ekapolon, atenit ayoŋ arukor ka iyoŋ mabus ka natwanare!”

³⁴Tolimok Yesu iŋes tema, “Petero, akalimokini ayoŋ iyoŋ atemar, eriŋa ekokoroit nyeruuno nakoloŋit na, ipegi iyoŋ ŋapeget ŋauni atemar ikiyeni ayoŋ.”

³⁵Kiŋit Yesu ikes tema, “Ŋina ekeyakiaritor ayoŋ iyes emam ecwee ŋolo a ŋisiliŋa, ekikapu kori ŋamuk, ayai ibore ŋini ipotu iyes kicanakinosi a?” Toboŋokis ikes temasi, “Amam ibore ikicana.”

³⁶Tolimok Yesu ikes tema, “Nai tokona ŋini daadaŋ eyakar ŋisiliŋa kori ekikapu, itemokino kiric; ani ŋini emamukar atum, itemokino togyela elou, tosodi togyelu atum.

³⁷Anerae akalimokini ayoŋ iyes atemar, itemokino kiyookin aneni kaŋ Ŋakigireta ŋuna igiritae ikona: ‘Emaritae iŋes ka ŋikasecak kaapei.’ ”

³⁸Tolimokis ŋikasyomak iŋes temasi, “Ekapolon! Kiŋolik! Eya ŋatumio ŋaarei ne!” Toboŋok Yesu ikes tema, “Etemokin!”

³⁹Tonyou Yesu alotaun, tolot moru a ŋikito a ŋulu enyaritae Olipa, ikwaŋinapei sek aloseneneo iŋes, kiwuapakis ŋikeekasyomak iŋes.

⁴⁰Ani edoli iŋes nen, tolimok ikes tema, “Kilipa, ikotere nyilomasi nakitemyet.”

⁴¹Torotok iŋes aneni kec tari neni ebai neni edoe amoru imasaryo, ido toryedik kilip.

⁴²Tema, “Papa, ani kicamit iyoŋ, tolema ekopo lo ŋolo a ŋican aneni kaŋ! Nai meere aŋuna ka acamit kaŋ, nai kitiyakin acamit kon.” [

⁴³Bu emalaika anakuj, kitogogoŋ iŋes.

⁴⁴Kilip iŋes imukekinit toryeba nooi alotau, kikokis ŋakinyinyir keŋ edoete kwap ŋaokot.]

⁴⁵Ani enyouni Yesu aneni elipya, toboŋo torukau ŋikeekasyomak kejotoorosi, kiinaasi ŋakiro ŋuna anomorito ŋikecetai.

⁴⁶Kiŋit Yesu ikes tema, “Nyo ijotooto iyes? Tonyoutu, kilipa, ikotere nyilomasi nakitemyet.”

⁴⁷Ani eriŋa Yesu irworo, todolu asepic ŋina a ŋituŋa, ŋina arikit Yuda ŋolo arae epei alokidiŋ ŋulutomon ka ŋiarei. Kikomaiya Yuda neni a Yesu, tonu iŋes.

⁴⁸Tolimu Yesu tema, “Yuda, iluki iyoŋ Lokoku a Ituŋanan ka akinu a?”

⁴⁹Ani iŋolikinete ŋikasyomak ŋuna alosete akitiyakin, kiŋita ikes Yesu temasi, “Ekapolon, icamit iyoŋ isua etelo ikes a ŋatumio a?”

⁵⁰Kitel epei alokidiŋ kec epito ŋolo ke Esacaradoti a ŋolo Apolon nooi nakit ŋina aloteten, totubo.

⁵¹Nai tolimu Yesu tema, “Etemokin!” Totap iŋes akit ŋina ke epito, kitaŋaleu.

⁵²Tolimok Yesu ŋisacaradotin ŋulu apolok ka ŋikapolok ŋulu a ŋisigarya a ŋulu eteok Akai ka Akuj, ta ŋikatukok ŋulu aponito akikamun iŋes tema, “Nyo iponitotor iyes itiŋito ŋatumio ka ŋabiroi esibit arae ayoŋ ekokolan?

⁵³Ikirukit iyes ka ayoŋ ŋirwa daadaŋ alo Kai ka Akuj, ipotu iyes nyikikamut ayoŋ. Nai tokona erae esaa lo ŋolo kus, ŋolo ka apedor a ŋina ka akiryonut.”

⁵⁴Kikamut ikes Yesu, torikosi kai ke Esacaradoti a ŋolo Apolon nooi, kiwuapite Petero ikes aneni alwanan.

⁵⁵Enokakinitae akim kidiŋ alapatu, tosodi tolot Petero min neni a ŋulu eboiyete a nen irikaunito akim.

⁵⁶Ani iŋolikini aketiyan apei Petero iboi alodiye akim, kitek iŋes, tolimu tema, “Arukito ekile lo daŋ ka iŋes!”

⁵⁷Nai topeg Petero ŋun, tema, “Iyoŋ aberu na, nyayeni ayoŋ iŋes!”

⁵⁸Kelunyar apaki ŋina auruwuana, toyen ekile ece Petero tolimu tema, “Irae iyoŋ jik epei alokidiŋ kec!” Nai toboŋok Petero iŋes tema, “Ekile, meere ayoŋ!”

⁵⁹Kelunyar epeisaa, kitogogoŋ nooi ituŋanan ice tema, “Arukito jik ekile lo ka Yesu, anerae erae iŋes daŋ ŋolo alo Galileya!”

⁶⁰Tosodi Petero tema, “Nyayeni ayoŋ ŋakiro ŋuna irworo iyoŋ!” Atipei eriŋa iŋes irworo, toru ekokoroit.

⁶¹Toboboŋ Ekapolon Yesu kitek Petero. Totamu Petero ŋakiro ŋuna alimokinit Yesu iŋes atemar, “Eriŋa ekokoroit nyeruuno nakoloŋit na, ipegi iyoŋ ŋapeget ŋauni atemar ikiyeni ayoŋ.”

⁶²Toloma Petero kiŋa, kigwor nooi.

⁶³Tokyenatar ŋikilyok ŋulu eyokiyete iŋes ka kibuŋata daŋ.

⁶⁴Torapa daŋ ereet keŋ, kiŋita iŋes temasi, “Todwar! Ŋae ŋini ikirami iyoŋ?”

⁶⁵Tolimokis iŋes ŋakiro ŋuna alalak ŋuna a ŋiyany.

⁶⁶Ani iwalari akwap, totukokin ŋikatukok ka ŋisacaradotin ŋulu apolok ta ŋiketatamak a Ŋikisila, torikoroe nai Yesu Natukot kec.

⁶⁷Kiŋita ikes Yesu temasi, “Tolimokinae mono iyoŋ isua, iyoŋ iŋes irae Kristo a?” Toboŋok Yesu tema, “Tari kakalimok ayoŋ iyes, nyinupete ŋakiro kaŋ;

⁶⁸ani tari kekeŋit ayoŋ iyes akirot, emam nyiboŋokinete.

⁶⁹Nai ameun tokona, iboikin Lokoku a Ituŋanan teten Akuj ŋina alokidiama nooi!”

⁷⁰Kiŋita ikes daadaŋ temasi, “Irae nai iyoŋ Lokoku ka Akuj a?” Toboŋok iŋes ikes tema, “Ilimut iyes atemar arae ayoŋ.”

⁷¹Tolimut ikes temasi, “Okoe, nyo nabo ikiitanitor ŋisuudae ŋice? Ikiira iwon ŋilopeyek ŋakiro ŋuna alimu iŋes!”