Read ngakarimojong Luk. 23 Bible Online

Luk. 23 - ngakarimojong bible

Luk. 23

¹Tonyout ŋituŋa daadaŋ a Natukot, torikosi Yesu neni a Pilato.

²Togeut ikes akisitakin iŋes a nen ebasi, “Ikiryamuni isua ekile lo icocoi ŋituŋa ŋulu ka akwap kosi ka ikiteŋerit isua akibuk ocur neni ke ekepukan a Roma, ebala nabo arae iŋes Kristo--erwosit.”

³Kiŋit Pilato Yesu tema, “Irae iyoŋ erwosit a Ŋiyudayan a?” Toboŋok Yesu iŋes, “Ilimu iyoŋ.”

⁴Tolimok Pilato ŋisacaradotin ŋulu apolok ka asepic ŋina a ŋituŋa tema, “Emam ibore ŋini aronon ŋini itiyat ekile lo, ŋini itemokino isitakinere.”

⁵Nai kibunyakinos ikes jik temasi, “Itutuki iŋes ŋituŋa a ŋakiro a ŋuna itatami, a ŋuna isiryamit iŋes Yudaya daadaŋ. Esyakini paaran alo Galileya, nai adolu tari ne daŋ.”

⁶Ani iirari Pilato ŋakiro ŋun, kiŋit ikes tema, “Erae ekile lo Egalilayat a?”

⁷Ani eanyuni iŋes atemar abunit Yesu anakwap a ŋina epukat erwosit Erode, kiyakiya iŋes Yesu neni ke Erode. Ŋirwa ŋul, ayai Erode Yerusalem.

⁸Tolakar Erode nooi eanyuwari Yesu, anerae apupi sek iŋes ŋakiro a Yesu, nabo ŋarwa ŋuna alalak emuit iŋes aanyun Yesu. Acamit iŋes akiŋolikin Yesu itiyae ŋakujuwuanisya ŋadi.

⁹Kiŋitiŋit Erode Yesu ŋakiro ŋuna alalak, nai kililiŋ Yesu cek.

¹⁰Ayakasi nen ŋisacaradotin ŋulu apolok ka ŋiketatamak a Ŋikisila, kisitakis iŋes enyunyurasi nooi.

¹¹Apotu Erode ka ŋisigarya keŋ kitiyata ŋakiro ŋuna a ŋileec neni a Yesu ka tobolyatar iŋes. Ani kedaut, kitanapa iŋes elou ikwa erwosit, kinyakasi nai iŋes neni a Pilato.

¹²Ameun apaki ŋin, tomaikin Erode ka Pilato, anerae adiŋasi sek ikes ekiŋaren.

¹³Tocunak Pilato ŋisacaradotin ŋulu apolok ka ŋikepukak ŋulu a ŋituŋa iwapei,

¹⁴tolimok ikes tema, “Ipotu iyes torikut ekile lo neni kaŋ ibasi itutuki ŋituŋa. Eŋitiŋit tokona ayoŋ iŋes alokiŋaren kus, nai emam ŋakiro aryamu ayoŋ alokile a lo, ŋuna itemokino etubokinere iŋes.

¹⁵Emam tari Erode daŋ ibore ŋini aronon ŋini aripu aneni keŋ; iŋes enyakunia iŋes neni yok. Emam ibore ŋini aronon etiya iŋes, ŋini itemokino earere.

¹⁶Aŋun, atemari ayoŋ kibuŋata iŋes, kimyekinae tolot.” [

¹⁷Ŋirwa daadaŋ ŋulu a Paska alacanakini Pilato emabus epei.]

¹⁸Tocelu asepic a ŋituŋa daadaŋ tema, “Toara ekile lo! Ikicamit isua Baraba tolacakinae!”

¹⁹(Aenitae Baraba alomabus ikotere aruruma ŋina esyakini iŋes alotaun, nabo aarit tari ituŋanan.)

²⁰Aŋuna acamitor Pilato alacakin Yesu, kisirwor nabo iŋes asepic a ŋituŋa.

²¹Nai tocelut ikes temasi, “Kibubuk! Kibubuk iŋes!”

²²Kiŋit Pilato ikes ŋina kiuniyet tema, “Nyo ibore aronon ŋini itiyat iŋes? Emam asecit ŋina aripu ayoŋ, ŋina itemokino iŋes earere! Aŋun, atemari ayoŋ kibuŋata iŋes, kimyekinae tolot.”

²³Nai torubakis ikes ecelasi nooi ebasi itemokino kibubukinoe iŋes lomusalaba, torebo acela kec neni daadaŋ.

²⁴Tosodi Pilato akitub ŋakiro atemar kitiyata ŋituŋa ikwaŋina acamitotor ikes.

²⁵Tolacak Pilato ekile ŋolo acamito ikes atemar tolacakinae, ekile ŋolo aenitae alomabus aŋuna ka aruruma ka akiar; ido kipotok iŋes Yesu lotuŋa ŋul, kitiyata ikwaŋina acamitotor.

²⁶Apaki ŋina arikoryata ikes Yesu, kitowua ekile ŋolo anyaritae Simoni ŋolo arae ŋolo anakwap a Kurene, ŋolo abunit alorerya. Toryoŋakis emusalaba loseket keŋ, kisiwuapakis iŋes Yesu.

²⁷Kiwuapak asepic ŋina a ŋituŋa ŋina alalan Yesu. Aya daŋ nen ŋaberu ŋuna egworosi nooi aŋuna a Yesu.

²⁸Nai toboboŋ Yesu, kiŋolik ikes tolimok tema, “Ŋaberu ŋuna a Yerusalem! Nyigworosi aŋuna kaŋ, nai kigworos aŋuna kus ka aŋuna a ŋidwe kus.

²⁹Anerae epote ŋirwa ŋulu etemaryata ŋituŋa, ‘Erereŋ nooi ŋaberu ŋuna kolupanotin ka ŋuna nyidouno ta ŋuna nyitanaka!’

³⁰Ŋirwa ŋul, elimokinete ŋituŋa ŋimoru etemarete, ‘Totiyakinetei isua!’ Nabo elimokinete ŋimukura etemarete, ‘Kiwuae isua!’

³¹Ani kitiyakis ikes ŋun eriŋa akitoe epalal, anu nai itiyakinete ŋina eonio iŋes?”

³²Torikoroe ŋikeworok ŋice ŋiarei yaarae akiar ka Yesu kaapei.

³³Ani edolete ikes neni anyaritae “Akuulu,” kibubukis Yesu lomusalaba ka ŋikeworok ŋuluarei, epei lowae ŋolo aloteten, epei kedyany.

³⁴Kirworik Yesu tema, “Papa kisyoni ikes, anerae nyeyenete ŋuna itiyaete.” Tokora ikes ŋikeelowi ka akilamilam ŋisigirya.

³⁵Awuasi ŋituŋa a nen iteete iŋes, tokyenatar ŋikapolok ŋulu a Ŋiyudayan iŋes ebasi, “Aiununui ŋoon iŋes ŋuluce, kimyekisi cenite toiun bon, erae kerae iŋes Kristo ŋolo ka Akuj ŋoloseuna!”

³⁶Tokyenatar ŋasigarya daŋ iŋes, inakis epiini ŋolo enyalitae ka apid,

³⁷tolimokis iŋes temasi, “Ani kirae iyoŋ erwosit a Ŋiyudayan, toiun bon!”

³⁸Egiritae ŋakiro nu kidiama emusalaba ŋolo ebubukinitoe iŋes, “ERAE LO ERWOSIT A ŊIYUDAYAN.”

³⁹Tosodi ekeworon epei ŋolo ebubukinitoe ka iŋes, kiyany iŋes tema, “Meere iyoŋ irae Kristo a? Toiun bon, itoiu isua daŋ!”

⁴⁰Toboŋok nai ŋoloce iŋes tema, “Nyikerit iyoŋ Akuj a? Ikitubokinitae iwon ka iŋes kaapei.

⁴¹Nai iwon ikitubokinitae kire aŋuna ikitiyat; nai emam ŋakiro ŋuna aronok ŋuna itiyat ekile lo.”

⁴²Ido tema iŋes, “Yesu, totamunitetei ayoŋ, ŋina iboŋunio iyoŋ irae Erwosit.”

⁴³Tolimok Yesu iŋes tema, “Akalimokini ayoŋ iyoŋ kire atemar, napeikoloŋit na ikiruki iyoŋ ka ayoŋ anajakaanut a ŋina ka Akuj!”

⁴⁴Ani edoli ŋisaae ŋikanikapei ŋulu ka apaaran, kiryoniar akwap daadaŋ cuc akitodol ŋisaae ŋikanikaomwon esoŋakini akoloŋ.

⁴⁵Tocila anaŋga ŋina eneno alo Kai ka Akuj beret ageun alokidiama tari kwap.

⁴⁶Kiworou Yesu tema, “Papa! Ewuak ayoŋ ekaatau nakan kon!” Kedau alimun ŋun, kiridak.

⁴⁷Ani eanyuwari ekapolon ŋolo a ŋasigarya ŋakiro ŋuna apotu kitiyakin, kipur Akuj tema, “Kire, kemam ekile lo aronis.”

⁴⁸Ani eanyunete ŋituŋa daŋ ŋulu acunakina neni ŋakiro ŋuna apotu kitiyakin, toboŋosi lorerya kec eramete ŋitai.

⁴⁹Nai ŋulu daadaŋ anaikina sek ka Yesu, kaapei ka ŋaberu ŋuna ewuapunete iŋes alo Galileya, apotu towua aneni alwanan, kiteto ŋakiro daadaŋ.

⁵⁰Ayai nen ekile ŋolo anyaritae Yosepu, ŋolo abunit alotaun a ŋolo anyaritae Arimatea anakwap a Yudaya. Arae iŋes epei a Natukot a ŋina a Ŋiyudayan, ajok ka eyookino.

⁵¹Abu iŋes towou acamun ŋakiro ŋuna acamit Atukot ŋina a Ŋiyudayan akitiyakin neni a Yesu ka edarit iŋes abunore ŋina ka Apukan ka Akuj.

⁵²Tolot iŋes neni a Pilato, kiŋitak akuwan a Yesu.

⁵³Tolemu iŋes akuwan a Yesu alomusalaba, kilogilogak elou ŋolo apolon, kiperik nalyal ŋina abokakinitae nataaba neni sek amam ituŋanan anukakinitae.

⁵⁴Arae akoloŋit ŋin ŋina a ŋakan, toapikinite akidol akoloŋit ŋina a Sabato.

⁵⁵Kiwuapakis ŋaberu ŋuna arukunete ka Yesu alo Galileya Yosepu tari nalyal, toanyuwasi epite ŋolo eperikinitere akuwan a Yesu.

⁵⁶Toboŋosi nai lorerya kec akitemokin akimyet ŋina akukunyon ŋina kiwosakina nakuwan keŋ. Kieŋut ikes akoloŋit ŋina a Sabato, ikwa egiritere Lokisila a Moses.