Read ngakarimojong Luk. 24 Bible Online

Luk. 24 - ngakarimojong bible

Luk. 24

¹Taparacu akoloŋit ŋina ke Esabit, todilokis ŋaberu nalyal ekodito akimyet ŋina akukunyon ŋina etemokinito ikes.

²Toryamut ikes amoru kikokoriyor alokek ka alyal,

³ido tolomasi tooma; nai nyeryamut akuwan ŋina ke Ekapolon Yesu.

⁴Ani eriŋa ikes ewuasi a nen eŋayaŋayato a ŋakiro a ŋun, towua ŋinapeipaki ŋikilyok ŋiarei ŋulu anapito ŋilowi ŋulu amilimilete alodiye kec.

⁵Tobul ŋaberu nooi kijuuroto; kiŋita ŋikilyok ŋul ikes temasi, “Kaanukiro iwaritotor iyes ituŋanan ŋini eyari lotuŋa ŋulu etwakito?

⁶Emam iŋes a ne, anerae ayaru. Totamutu ŋina paaran ikilimonokinia iŋes iyes, ŋina ayakar iŋes Galileya ŋina abaakar,

⁷‘Itemokino Lokoku a Ituŋanan kipotokinoe nakan a ŋikasecak, kibubukinoe lomusalaba, ido toyaru kelunyar ŋirwa ŋiuni!’ ”

⁸Totamut nai ŋaberu ŋakiro ŋuna abala Yesu ŋun,

⁹toboŋosi analyal, tolimokis ŋulutomon ka epei ka ŋituŋa ŋuluce daadaŋ ŋakiro ŋun.

¹⁰Arae ŋaberu ŋun Maria Magadalena, Joanna ka Maria toto a Yakobo ta ŋakecerukitos; ikes alimokinete ŋikasyomak ŋakiro ŋun daadaŋ.

¹¹Nai tobas ŋikasyomak erae ŋakiro ŋuna alimokinete ŋaberu ikes alyokonu, towout akinup.

¹²(Nai tonyou Petero kipiiri nalyal. Todol iŋes nalyal tokukokin toripik, kiŋolik ŋilowi ŋulu sek aenitere akuwan a Yesu ebilakina make eya nalyal. Toboŋo iŋes lore eŋayaŋayat pa eyeni ŋuna kepotu kitiyakin.)

¹³Akoloŋit ŋinapei ŋin, alosete ŋikewuapak a Yesu ŋiarei lore ŋolo anyaritae Emmaus, neni arae ŋakilomitae ŋatomon ka apei alo Yerusalem.

¹⁴Eanete ikes ŋakiro daadaŋ ŋuna apotu kitiyakin.

¹⁵Apaki ŋina eaniata ikes, todita Yesu ikes elosete, torukosi kaapei.

¹⁶Kiŋolikis ikes Yesu, nai kibiler nyeyan ikes iŋes.

¹⁷Kiŋit Yesu ikes tema, “Anukiro ŋuna ianete iyes alorot nu?” Towua ikes esiliyorito.

¹⁸Toboŋok epei kec ŋolo anyaritae Kileopa iŋes tema, “Iyoŋ bon irae epeyonon alo Yerusalem, ŋolo nyiyeni ŋakiro ŋuna etiyakin a nen ŋirwa lupei bien lu a?”

¹⁹Tema Yesu iŋisi ikes, “Anukiro?” Toboŋokis ikes temasi, “Ŋakiro ŋuna etiyakin neni a Yesu a ŋolo a Nasaret. Arae iŋes kire ekadwaran ŋolo ka Akuj, ŋolo etiyae ŋakujuwuanisya, nabo etatami ŋakiro ŋuna apolok alokiŋaren Akuj ka alokiŋaren ŋituŋa.

²⁰Apotu ŋisacaradotin ŋulu apolok ka ŋikarikok totubut atemar itemokino iŋes toarae; kibubukis iŋes lomusalaba.

²¹Ikigeno sek isua atemar kori iŋes eiuni ŋituŋa ŋulu a Isirael! Nabo, erae tokona ŋirwa ŋiuni alunyarosi ŋinapei etiyakinotor ŋakiro ŋun.

²²Nai ikituumikis isua ŋaceberu ŋuna erae ŋarukitos kosi; kedilokinito ikes taparacu nalyal a Yesu,

²³nai nyeryamut akuwan keŋ. Toboŋut ikes ebasi ebe ikianyu atakanikinet ŋina a ŋimalaikan a ŋulu abasi ayaru iŋes.

²⁴Toloto ŋice aneni kosi nalyal, torukaut ikote nenipei abasi ŋaberu, nai nyiŋolikis iŋes.”

²⁵Tolimok Yesu ikes tema, “Okoe egogoŋ iyes ŋakyes! Etyono ŋitai kus akinup atipei ŋakiro daadaŋ ŋuna a ŋikadwarak.

²⁶Nyiyenete iyes atemar etemokino Kristo toryamu ŋican, ikotere tolomarya napolou keŋ a?”

²⁷Kisyak nai iŋes akisileerekin ikes ŋakiro ŋuna ka Akuj ŋuna igiritae Nakigireta aŋuna keŋ, ameun alokitaaboi a ŋulu a Moses tari lokadwarak daadaŋ.

²⁸Ani eapiyarete ikes diye ere ŋolo alosete, tosub acamit Yesu akiporor;

²⁹nai kimaimaa ikes iŋes temasi, “Bua apena lore kosi, anerae awar ka eryoniu akwap.” Tolot iŋes toloma tooma, toruko ka ikes.

³⁰Ani iboikinosi Yesu ka ikes akimuj alomesa, tolemu iŋes amugati, kilipak ka tonyilinyili inak ikes.

³¹Toŋaar ŋatameta kec, toyena iŋes, nai topuripuryaar iŋes anakonyen kec.

³²Kirworikinos ikes temasi, “Pa mono ariraete ŋitai yok ka alakara apaki ŋina erworor iŋes neni yok alorot ka ŋina ikisileerekinio iŋes iwon ŋuna igiritae Nakigireta a?”

³³Torotokis ikes atipei, toboŋosi Yerusalem. Torukaut ŋulutomon ka epei ka ŋuluce ecunakina iwapei,

³⁴tolimokis ikes temasi, “Erae kire ŋakiro ŋun! Ayaru Ekapolon atakanu daŋ neni a Simoni!”

³⁵Kitatamikis ŋikewuapak ŋuluarei ŋul ikes ŋakiro ŋuna atakanikinito ikes alorot ka epite ŋolo ayeniata ikes Ekapolon apaki ŋina anyilinyiliya iŋes amugati.

³⁶Ani eriŋa ikes itatamete ŋakiro nu, towo Yesu alokidiŋ kec tolimu tema, “Ekisil toyai neni kus.”

³⁷Tobul ikes nooi temasi kori ikiŋolik ekipye.

³⁸Nai tolimok Yesu ikes tema, “Anukiro eryebete ŋitai kus? Nyo elalaa aŋayaŋayat alotai kus?

³⁹Kiŋolikisi ŋakaakan ka ŋakaakejen; erae ayoŋ. Totapae ayoŋ kiŋolikis; emamukar ekipye akuwan ka ŋakoyo ikwaŋina tokona iteoto iyes ayakar ayoŋ.”

⁴⁰Ani kelimu Yesu ŋun, kitoodik iŋes ikes ŋakan ka ŋakejen keŋ.

⁴¹Nai eriŋa ikes jik nyenupa aŋuna ka alelyan ka aumokinit ŋina apolon nooi. Aŋun, kiŋit Yesu ikes tema, “Iyakatar iyes ibore idio ŋini nyamat a?”

⁴²Inakis ikes iŋes atubet ŋina ke ekolya a ŋolo apeitoi.

⁴³Kijau iŋes, tonyam alokiŋaren kec.

⁴⁴Tolimok Yesu ikes tema, “Erae ŋakiro nu ŋuna paaran akalimokinit ayoŋ iyes eriŋa iwon ikirukit; ŋakiro daadaŋ ŋuna egiritae a ŋuna kaŋ Lokisila ŋulu a Moses ka nakigireta ŋuna a ŋikadwarak ta lokirukisyo a Daudi; itemokino daadaŋ kiyookin.”

⁴⁵Toŋaaros ŋatameta kec toyenut ŋuna igiritae Nakigireta.

⁴⁶Tolimok ikes tema, “Nugu ikes ŋuna igiritae atemar itemokino Kristo toryamu ŋican, ido toyaru kelunyar ŋirwa ŋiuni.

⁴⁷Itemokino kitatamae akiki ka akisyon ŋasecisya lobukui daadaŋ alokiro keŋ, akisyakin alo Yerusalem.

⁴⁸Irae iyes ŋisuudae a ŋakiro a nu.

⁴⁹Eyakuuni ayoŋ neni kus ŋolo ikiik Papa iyes. Nai itemokino iyes kidareut a ne alo Yerusalem, akitodol akoloŋit ŋina iryamuniata iyes apedor ŋina ebunit alokidiama.”

⁵⁰Tosodi toriko iŋes ikes Betania. Kikyaa iŋes ŋakeekan a nen, kiterereŋ ikes.

⁵¹Ani eriŋa iŋes iterereŋi ikes, kikyaarae iŋes alokiŋaren kec, tolot nakuj.

⁵²Toryediko ikes, kilipa neni keŋ; ani irikakin, toboŋosi Yerusalem elakara nooi,

⁵³ido toloto akiboi alo Kai ka Akuj, ipurosi Akuj jwi jwi ka elelyanete.