Read ngakarimojong Luk. 4 Bible Online

Luk. 4 - ngakarimojong bible

Luk. 4

¹Toboŋu Yesu alo Yorodan ileleba Etau ŋolo Asegan ŋolo abu toriko iŋes naloŋisat,

²kiboi aina ŋirwa ŋatomoniomwon, kitem Satan iŋes. Kiriya iŋes ŋirwa ŋul daadaŋ nyimuja, tonyam nai akoro.

³Tolimok Satan iŋes tema, “Ani kirae iyoŋ Lokoku ka Akuj, tolimok ceni amoru na toruwor akimuj.”

⁴Tolimok Yesu iŋes tema, “Igiritae Nakigireta ebe, ‘Nyeyari ituŋanan ka akimuj bon.’ ”

⁵Toriko Satan Yesu kidiama emoru, kitoodik iŋes ŋibukui ŋulu ka akwap daadaŋ apeikitoodikinet bon,

⁶tolimok iŋes tema, “Akainakini ayoŋ iyoŋ apolou ka ebari lo daadaŋ; akainakinio koloŋ ayoŋ daŋ ka apedori ayoŋ ainakin ŋinituŋanan acamit.

⁷Ŋiboro lu daadaŋ eruworosi ŋulu kon, erae kiryedik iyoŋ alokiŋaren kaŋ, ikima ayoŋ.”

⁸Toboŋok Yesu iŋes tema, “Igiritae Nakigireta ebe, ‘Iryediki iyoŋ kitopoloo Ekapolon Akuj kon, kitiyanak iŋes bon!’ ”

⁹Toriko nabo Satan Yesu Yerusalem, kitowuo iŋes alobibiru a ŋolo ka Akai ka Akuj, tolimok iŋes tema, “Ani kirae iyoŋ Lokoku ka Akuj, kimasar kwap a ne.

¹⁰Anerae igiritae Nakigireta ebe, ‘Icikakini Akuj ŋimalaikan keŋ akiyok iyoŋ.’

¹¹Igiritae nabo daŋ atemar, ‘Ikigagaunete iyoŋ a ŋakan kec, ikotere nyewan amoru tari ŋakejen kon.’ ”

¹²Toboŋok Yesu iŋes tema, “Ebookoi ebe, ‘Nyitem Ekapolon Akuj kon.’ ”

¹³Kedau Satan akitem Yesu a ŋirotin a daadaŋ, abu iŋes toesik Yesu mono.

¹⁴Toboŋo Yesu Galileya ileleba apedor ke Etau a ŋolo Asegan neni keŋ, tokeikin ŋakiro keŋ nakwap ŋin daadaŋ.

¹⁵Etatami iŋes alosinagogae kec ka apotu ŋituŋa daadaŋ kituruut iŋes.

¹⁶Bu nai Yesu Nasaret neni koloŋ apolounio iŋes; ani akoloŋit ŋina a Sabato, tolot losinagoga ikwaŋinapei sek. Abu iŋes tonyou akisyom;

¹⁷inakinae iŋes ekitaabo ŋolo ke ekadwaran Isaya. Toŋaa iŋes ekitaabo, toŋau neni egiritae ebe,

¹⁸“Eyai Etau ke Ekapolon neni kaŋ, anerae ekeos iŋes ayoŋ aŋuna ka akiserakin Ŋakiro ŋuna Ajokak lokulyak. ekeyakuu iŋes ayoŋ alimokin ŋulu eenitae atemar elacakinio ikes ka aŋaar ŋakonyen a ŋimudukanotin ka alakakin ŋipi,

¹⁹ta akiseraun atemar adol apaki ŋina eiunia Ekapolon ŋituŋa keŋ.”

²⁰Togolok Yesu ekitaabo, inak eketiyan, kiboikin nai iŋes. Kitekis ŋituŋa daadaŋ ŋulu aya losinagoga iŋes nooi.

²¹Kisyak iŋes alimonokin ikes tema, “Nakoloŋit na, eyookinosi ŋuna igiritae Nakigireta nu, ikwaŋina sek ipupyoto iyes esyomyo.”

²²Apotu ŋituŋa daadaŋ kipuro iŋes ka toumokis ikes a Ŋakiro a ŋuna Ajokak a ŋuna erworo iŋes temasi, “Meere nai lo lokoku a Yosepu a?”

²³Tolimok Yesu ikes tema, “Ayeni ayoŋ atemar ikilimokinete iyes ayoŋ akitadapet ŋina ebala, ‘Emuron, kitaŋaleun bon. Ikiira isua daadaŋ ŋuna kibu iyoŋ kitiya alo Kaperenaum. Kitiya a ne anakwap kon daŋ ŋunapei.’

²⁴Akalimokini ayoŋ iyes kire atemar, emam ekadwaran ŋolo ecamitae anakwap keŋ.”

²⁵“Nai akalimokini ayoŋ iyes atemar, alalak ŋapuseru alo Isirael ŋirwa ŋulu ke Eliya, ŋina aŋopiyarya akiru ŋikaru ŋiuni ka ŋilapyo ŋikanikapei, bu eron ŋolo aronon nooi nakwap ŋin daadaŋ.

²⁶Nai aponi nyiyakiyar Eliya tari neni ka apei a ŋuna aya Isirael, mati neni ka apuserut ka apei a ŋina ayai Serepito, nakwap ŋina a Sidonia.

²⁷Nabo aya ŋituŋa ŋulu alalak ŋulu erumit atapon alo Isirael ŋirwa ŋulu ke ekadwaran Elisa; emam ikes ipei daŋ ŋini aponi kitaŋaleunoe, mati Naaman ŋolo ka akwap a ŋina a Siria.”

²⁸Ani iirarete ŋituŋa ŋulu aya losinagoga ŋakiro ŋun, toŋoa nooi.

²⁹Tonyout ikes, kijukasi iŋes kiŋa etaun, torikosi iŋes nakope ŋina ke emukura a ŋolo adukitoe etaun, anerae acamito ikes akimasar Yesu a nen.

³⁰Nai kitor Yesu kidiŋ kec, tolot.

³¹Tolot Yesu Kaperenaum, lotaun epei alo Galileya; kitatam iŋes ŋituŋa akoloŋit ŋina a Sabato.

³²Toumokis ŋituŋa aŋuna ka akitatam keŋ, anerae etatami iŋes ka apedor.

³³Ayai tooma losinagoga ekile ŋolo ekamunit ekipye. Abu iŋes kiworou tema,

³⁴“Wooi! Eya iyoŋ ŋakiro ka isua Yesu ŋolo a Nasaret a? Ibunit iyoŋ amunyar isua a? Akayeni ayoŋ iyoŋ, irae iyoŋ ŋolo Asegan ŋolo ka Akuj!”

³⁵Kiŋenyak Yesu ekipye tema, “Kililiŋ, tolomu alokile a lo!” Toramak ekipye ekile ŋol kwap kidiŋ ŋituŋa, tolomu nai aneni keŋ, nyewana iŋes.

³⁶Toumokis ŋituŋa daadaŋ kirworikinos make temasi, “Anikirot na, ŋina eyakar ekile lo apedor ka apolou ŋina kiŋenyakinet ŋipyan, ido tolomut!”

³⁷Tokeikin arwonu a Yesu akwap ŋin daadaŋ.

³⁸Tonyou Yesu alosinagoga, tolot kai a Simoni. Ekamunit elekes nakamuran a Simoni nooi, ido aponi tolimokinae Yesu ŋakiro ka adyak keŋ.

³⁹Tolot Yesu towo alodiye ekitaada ŋolo ka aberu a ŋin, kiŋenyak elekes aesikin iŋes, toesik nai elekes iŋes atipei. Tonyou iŋes atipei, kisyak akisimuj ikes.

⁴⁰Ani edoiyori akoloŋ, apotu ŋituŋa daadaŋ ŋulu adyakasi ŋikecetuŋa ŋidekesyo ŋulu agelegelya, yaut ikes neni a Yesu. Kidokonok iŋes ikes daadaŋ ŋakan, kitaŋaleu.

⁴¹Tari ŋipyan apotu tolomut alotuŋa iworoete ebasi, “Irae iyoŋ Lokoku ka Akuj!” Nai kikilyanak Yesu ikes nyecamak tari epei akirworikin, anerae ayenete ikes atemar Yesu erae Kristo.

⁴²Ani iwalari, tonyou Yesu alore, tolot nariet. Kisyakis ŋituŋa akiwarit iŋes; ani eryamunete, kiitana akiretakin iŋes nyelot iwace.

⁴³Nai tolimok iŋes ikes tema, “Itemokino ayoŋ etatam Ŋakiro ŋuna Ajokak ŋuna ka Apukan ka Akuj tari lotaunio ŋuluce daŋ; anerae erae ŋun ekeyakuunitere ayoŋ.”

⁴⁴Kitatamenenee iŋes alosinagogae a ŋulu ka akwap a ŋin.