Read ngakarimojong Luk. 6 Bible Online

Luk. 6 - ngakarimojong bible

Luk. 6

¹Akoloŋit ace ŋina a Sabato, kitoro Yesu ka ŋikeekasyomak lomanikor, togyeut ŋikeekasyomak ŋimomwa kiŋinyut, tonyama.

²Kiŋita Ŋiparisayon ŋice ikes temasi, “Nyo itiyaata iyes ŋakiro ŋuna italeo akitiya akoloŋit ŋina a Sabato?”

³Toboŋok Yesu ikes tema, “Nyesyoma iyes ŋuna abu Daudi kitiya apaki ŋina anyamya akoro iŋes ka ŋikeerukitos a?

⁴Abu iŋes toloma kai ŋinakilipet Akuj, tolemu tonyam amugati ŋina ainakinitae Akuj, tosodi inak ŋikeerukitos daŋ; torae bo ŋina etaleo idiotuŋanan akinyam, mati ŋisacaradotin bon.”

⁵Tolimok nabo ikes tema, “Lokoku a Ituŋanan iŋes erae Ekapolon a Sabato.”

⁶Akoloŋit nabo ace ŋina a Sabato, tolot Yesu losinagoga akitatam ŋituŋa. Ayai nen ekile ŋolo amitarit akan ŋina aloteten.

⁷Eteunito ŋiketatamak a Ŋikisila ŋice ka Ŋiparisayon, erae kitaŋaleuni Yesu ituŋanan akoloŋit ŋina a Sabato, ikotere eryamuniata ŋakiro ŋunakisitakinet iŋes.

⁸Ayeni Yesu ŋuna atamete ikes, nai tolimok ekile ŋolo amitarit akan tema, “Tonyou, bua kiŋaren ne.” Tonyou ekile ŋol, tolot, towo a nen.

⁹Kiŋit Yesu ikes tema, “Ekeŋisi ayoŋ iyes, nyo ecamakinitae a Lokisila akitiya akoloŋit ŋina a Sabato? Akiŋarakin kori akiwan? Akiteyar kori akiar?”

¹⁰Kitek Yesu ikes daadaŋ a ŋipeipei, ido tolimok ekaŋwalan tema, “Toriyo akan kon.” Toriyo nai iŋes akan keŋ, toŋaleu.

¹¹Toŋoa ikes nooi, kisyakis atukun ŋuna kitiyakina neni a Yesu.

¹²Apaki ŋin, tolot Yesu lokamukumukut akilip; kiboi iŋes a nen akuwar kya, ilipi neni ka Akuj.

¹³Ani iwalari, tonyarau Yesu ŋikeekasyomak, toseu ŋitomon ka ŋiarei, tonyara ikes Ŋikiyakia:

¹⁴Simoni (ŋolo aponi tonyarae Petero) ka lokaato keŋ Anderia, Yakobo ka Yoana, Pilipo ka Batolomayo,

¹⁵Matayo ka Tomas ka Yakobo lokoku ka Alipayo ka Simoni (ŋolo anyaritae Eseletoit)

¹⁶ka Yuda lokoku a Yakobo ta Yuda Isikariot ŋolo abu toluk Yesu.

¹⁷Ani edokunete Yesu ka ikes alomukura, towua ikes aneni alapatan ta asepic ŋina a ŋikewuapak keŋ ka asepic a ŋituŋa a ŋulu aponito alo Yudaya, Yerusalem, alo Tiro ka Sidon, ŋuna edunyito anam;

¹⁸aponito ikes daadaŋ akiirar ŋakiro keŋ ka ewarito akitaŋaleuno alodekesyo kec. Kitaŋaleunoe tari ŋituŋa ŋulu ekamunito ŋipyan.

¹⁹Acamito ŋituŋa daadaŋ akitap iŋes, anerae ayai apedor neni keŋ ŋina etaŋaleuni ikes daadaŋ.

²⁰Kiŋolik Yesu ŋikeekasyomak tema, “Irereŋ iyes ŋulu ikulyakaka; Apukan ka Akuj erae ŋina kus!

²¹“Irereŋ iyes ŋulu ikinyamit akoro tokona; ikisimwokyo iyes rwanu! “Irereŋ iyes ŋulu igworosi tokona; ikyeniyete iyes rwanu!

²²“Irereŋ iyes ŋina ikiremokinotor iyes ŋituŋa, ikikotasi, ikisolokis ka kirworotor ŋikusirorwa aŋuna a Lokoku a Ituŋanan!

²³Tolakaros itiyakin ŋun. Kicurokisi ka alelyan, anerae epol eropit kus anakuj; atapapaa kec daŋ koloŋ etiyato ikoŋinapei lokadwarak.

²⁴“Ekaŋ iyes ŋulu ibarito; idaut iyes aryamun alakara kus!

²⁵“Ekaŋ iyes ŋulu imwokito tokona; anerae ikinyami iyes akoro! “Ekaŋ iyes ŋulu ikyenasi tokona; iyaloloŋete ka igworete daŋ!

²⁶“Ekaŋ iyes ŋulu ikipuroe tokona; atapapaa kec daŋ koloŋ ekote neni ipurosi ŋikadwarak ŋulu alyokonok.

²⁷“Nai akalimokini ayoŋ iyes ŋulu ipupete atemar, tominas ŋikusimoe, kitiyata ejok neni a ŋulu ikiremokino iyes.

²⁸Togatakisi arereŋu neni a ŋulu ikilamete iyes, kilipakinito ŋulu ikibolyatar iyes.

²⁹Ani kikibap iyoŋ ituŋanan lokeli, inak ŋoloce daŋ; ani ikidemari ituŋanan iyoŋ ekoti, inak esati daŋ.

³⁰“Inak ŋinituŋanan ikilipi iyoŋ; ŋini ikidemari iyoŋ ŋikoniboro, nyiŋit akinyakakino.

³¹Kitiya neni a ŋuluce, ŋuna icamit iyoŋ ikes kitiyata neni kon.

³²“Ani kiminakis iyes ŋulu ikiminasi iyes bon, aliropit nai iryamunete iyes? Ŋikasecak daŋ eminasi ŋulu eminasi ikes!

³³Ani kijokak iyes aneni a ŋulu ejokak aneni kus, aliropit nai iryamunete? Ŋikasecak daŋ itiyaete ikoŋina!

³⁴Ani kipotokis iyes ŋikusiboro neni a ŋulu iyenete iyes atemar epedorete akitac, aliropit nai iryamunete iyes? Ŋikasecak daŋ einanakinete ŋulucekasecak, ikotere eryamuniata etya nenipei.

³⁵Nai tominas ŋikusimoe, tojokak aneni kec ka kipotonorete tomam akiitanit atacanot. Epoloor nai eropit kus ka iruworosi ŋidwe ŋulu ka Akuj a ŋina alokidiama nooi, anerae erimaana iŋes neni a ŋulu nyelakanarosi neni keŋ ka ŋulu aronok.

³⁶Toyakatar akisyon, ikwaŋina eyakar Papa kus akisyon.

³⁷“Nyitubonokis ŋuluce, ikotere nyikitubok Akuj iyes. Nyitoroniyasi ŋuluce, ikotere nyikitoroniya Akuj iyes. Kisyonioto ŋuluce, ikotere ikisyoni Akuj iyes.

³⁸Kipotonorete neni a ŋuluce, ikiinakini Akuj iyes etyae ŋolo ajokan idicakinitae, ŋolo iyaŋiyaŋakinitae ka ŋolo ilapanar; iŋes iwuakini Akuj locwee kon. Etyae ŋolo iinakinete iyes, iŋes ikiinakinio iyes daŋ.”

³⁹Tolimok Yesu ikes akitadapet tema, “Epedori mono emuduk akirik emuduk ŋoloce a? Nyibusokinosi mono ikes daadaŋ nakipany a?

⁴⁰Emam ekasyoman ŋolo iloit eketataman keŋ, nai ŋinituŋanan itatamitae ejok nooi, iriyanikin ka eketataman keŋ.

⁴¹“Kaanukiro iteo iyoŋ imilot anakoŋu a lokaato kon, nai nyite akitoe ŋina eyai nakoŋu kon a elope?

⁴²Nabo ikokini iyoŋ ilimokini lokaato kon ebe, ‘Lokaato kaŋ, kimyek olema imilot ŋini eyai nakoŋu kon,’ nyite iyoŋ akitoe ŋina eyai nakoŋu kon ai? Iyoŋ ekaŋisoswae! Tolema mono akitoe anakoŋu kon, topedo nai akiŋolikin ejok epite ŋolo lemaret imilot anakoŋu a lokaato kon.

⁴³“Emam ekitoe ŋolo ajokan ŋolo eraii ŋaraito ŋuna aronok; kori daŋ emam ekitoe ŋolo aronon ŋolo eraii ŋaraito ŋuna ajokak.

⁴⁴Anerae ŋolokitoe daadaŋ eyenitae a ŋaraito keŋ. Nyipedori iyoŋ agerun ŋaboboryo alokaramwae, kori nyipedori agerun ŋalebulebwo alopeeto.

⁴⁵Ituŋanan ŋini ajokan alotau keŋ, itiyae ŋakiro ŋuna ajokak. Ituŋanan ŋini aronon alotau keŋ, itiyae ŋakiro ŋuna aronok. Anerae irworo akituk ŋuna ilapun alotau.

⁴⁶“Kaanukiro ikinyaritotor iyes ayoŋ ‘Ekapolon, Ekapolon,’ nyitiyaete bo ŋuna akalimokini ayoŋ iyes?

⁴⁷Ituŋanan ŋini ebuni neni kaŋ, kiira ŋakiro kaŋ kitiya ikes, eketoodikini ayoŋ iyes neni ikoni iŋes.

⁴⁸Ikoni iŋes ekile ŋolo aduki akai. Tobok iŋes akipany, kidulo tari natabab, todukok akisyakinet nen. Toleleu akalele, kilap aŋolol, tonaŋ akai ŋin; nai nyiryaŋak, anerae adukuk nooi.

⁴⁹Nai ŋini iirari ŋakaakiro nu nyitiya, ikoni iŋes ekile ŋolo aduki akai kwap emam akisyakinet ŋina ajokan. Kilap aŋolol, tonaŋ akai ŋin, toritakin daadaŋ atipei, kinyasun akai ŋin nooi.”