Read ngakarimojong Luk. 7 Bible Online

Luk. 7 - ngakarimojong bible

Luk. 7

¹Kedau Yesu erwor ŋakiro ŋun daadaŋ lotuŋa, abu tolot Kaperenaum.

²Ayai ekapolokiniton ŋasigarya amiat ŋolo adyaka epito keŋ ŋolo minat nooi, toapiye iŋes atwanare.

³Ani iirari ekapolon ŋol ŋakiro ŋuna alimitere Yesu, kiyakiya ŋikatukok a Ŋiyudayan neni a Yesu akiŋitakin iŋes abunore akitaŋaleun epito keŋ.

⁴Ani epote ikes neni a Yesu, kimaimaa iŋes temasi, “Itemokino iyoŋ kiŋarak ekile lo,

⁵anerae emina iŋes ŋituŋa ŋulu ka akwap yok, nabo abu itodukok iwon esinagoga.”

⁶Torukosi nai Yesu ka ikes. Ani eapiyarete ikes kai ŋina ke ekapolokiniton ŋasigarya, kiyakiya ekapolokiniton ŋasigarya ŋikeekonei neni a Yesu alimokin atemar, “Ekapolon, nyican akonikuwan aŋuna ka abunore ne.

⁷Eketimit ayoŋ abunore iyoŋ kai kaŋ, nyitemokino tari ayoŋ obu neni iyai iyoŋ, nai tolimu iyoŋ akirot bon, ejokuni ekaaketiyan.

⁸Ayoŋ daŋ ekepukatae, nabo apolokinit ayoŋ daŋ ŋacesigarya. Ani katema ayoŋ epei ‘Ape!’ elosi. Ani katema ece, ‘Bua!’ ebuni. Tari epito kaŋ katema ayoŋ ‘Kitiya nu!’ itiyae.”

⁹Ani iirari Yesu ŋakiro ŋun, toumok nooi. Tosodi toboboŋ tolimok ŋituŋa ŋulu ewuapito iŋes tema, “Akalimokini ayoŋ iyes kire atemar, nyeryamuna ayoŋ anupit ŋina epol ikwa naga tari alo Isirael!”

¹⁰Ani eboŋorete ŋituŋa ŋulu eakit ekapolokiniton ŋasigarya, toryamut epito keŋ keŋaleu.

¹¹Ani ekaku, tolot Yesu lotaun ŋolo anyaritae Nain, torukosi ka ŋikeekasyomak ta asepic a ŋituŋa a ŋulu ewuapito iŋes.

¹²Ani eapuuni iŋes lokek ŋolo ke etaun, kiryamas ka ŋituŋa ŋulu elepilepito edya ŋolo atwanit edakarete kiŋa; kerae iŋes epei bon idounitoe, nabo arae toto keŋ apuserut. Arukito toto keŋ ka asepic a ŋituŋa a ŋulu ke etaun.

¹³Ani iŋolikini Ekapolon apuserut, kisyoni iŋes tema, “Tojoŋo akigworo.”

¹⁴Tolot Yesu toapiya nibore ŋini elepilepitere, totap, tosodi towua ŋituŋa ŋulu adakito. Kirworik Yesu tema, “Edya, abala ayoŋ iyoŋ: Toyaru!”

¹⁵Kiboikin edya ŋolo sek atwanit togeu erwor, tosodi Yesu inak iŋes neni a toto keŋ.

¹⁶Totaaŋaŋa ŋituŋa daadaŋ kitopoloosi Akuj temasi alokabule kec, “Kedolu ekadwaran ŋolo apolon kidiŋ yok. Abu Akuj aiun ŋituŋa keŋ!”

¹⁷Tokeikinos ŋakiro ŋun Yudaya daadaŋ ka ŋakwapin ŋuna alodiyete keŋ.

¹⁸Apotu ŋikasyomak a Yoana tolimokis iŋes ŋakiro ŋun daadaŋ.

¹⁹Tonyara nai Yoana ŋikasyomak keŋ ŋiarei kiyakiya neni ke Ekapolon akiŋit atemar, “Erae iyoŋ itemokino ibu, kori itemokino isua edareutu ece?”

²⁰Ani edolete ikes neni a Yesu, tolimokis iŋes temasi, “Ikiyakuunit isua Yoana Ekebatisan akiŋit iyoŋ atemar, ‘Erae iyoŋ itemokino ibu, kori itemokino isua edareutu ece?’ ”

²¹Apaki ŋinapei ŋin, abu Yesu kitaŋaleu ŋituŋa ŋulu alalak ŋulu agelegelya ŋidekesyo, ŋulu aŋwalak ka ŋulu ekamunito ŋipyan; toŋaa daŋ ŋakonyen a ŋimudukanotin a ŋulu alalak.

²²Toboŋok Yesu ŋituŋa ŋulu eyakuunit Yoana tema, “Apesi, tolimokisi Yoana ŋuna iŋolikis iyes ka ŋuna iirasi daŋ. Ekyenyununuyete ŋimudukanotin, erotonokinete ŋikaŋwalak, esegununuyete ŋulu irumit atapon, iiranarete ŋikiŋimanotin, eyarununuyete ŋikatwak; nabo elimonokinio Ŋakiro ŋuna Ajokak lokulyak.

²³Erereŋ nooi ituŋanan ŋini nyejamakini anupit keŋ aŋuna kaŋ!”

²⁴Ani kerotokis ŋituŋa ŋulu eyakuunit Yoana, togeu Yesu akitatam asepic a ŋituŋa ŋakiro a Yoana tema, “Ŋina ilositotor iyes neni a Yoana apaki ŋina ayakar iŋes naloŋisat, nyo iitanito iyes akiŋolikin? Eoot ŋolo iloiloi ekuwuam a?

²⁵Nyo ilosito iyes akiŋolikin? Ekile ŋolo anapit ŋilowi ŋulu aninikak ŋulu emilimilete a? Toyenete atemar ŋulu enapito ikoŋina ka ŋulu ebarito jwi jwi, ikes iboiyete alorerya a ŋikapolok!

²⁶Nyo nai kire ilosito iyes aanyun? Ekadwaran a? Ee robo; akalimokini ayoŋ iyes atemar, iŋolikis iyes ituŋanan ŋini iloit nooi tari ekadwaran.

²⁷Yoana iŋes ŋolo ebala Akuj a Nakigireta ebe, ‘Toanyu, eyakiyari ayoŋ ekaakiyakia kiŋaren kon, kitemok ekonirot.’

²⁸Akalimokini ayoŋ iyes atemar, alotuŋa a daadaŋ a ŋulu idounitoe ŋinapei koloŋ, emam ŋini epol akilo Yoana. Nai ŋini edit akilo daadaŋ a Napukan ka Akuj, epol akilo Yoana.”

²⁹(Ani iirarete ŋituŋa daadaŋ ka ŋikerirak ocur ŋakiro ŋun, tocamut atemar itiyae Akuj ŋuna iyookino, anerae ebatisatae ikes ke ebatisimu a Yoana.

³⁰Nai apotu Ŋiparisayon ka ŋiketatamak ŋulu a Ŋikisila toŋero ebatisimu ŋolo ayeunit Akuj aŋuna kec, aŋuna aŋeryoto ebatisimu ŋolo a Yoana.)

³¹Torubak Yesu irworo ebala, “Nyo esikwaania ayoŋ ŋituŋa ŋulu a ŋirwa a lu? Ikote ikes nyo?

³²Ikote ikes ŋidwe ŋulu iboiyete alomaket. Enyarae epeiwae kec ŋuluce temasi, ‘Ikipotu isua okutakisi arupepe, nai nyimomworikis iyes; aponi isua kikalounoe aŋuna ka atwanare, nai nyiluuro iyes.’

³³Abu Yoana Ekebatisan; eroneene ka nyemasi epiini daŋ; itemasi iyes, ‘Ikamunit iŋes ekipye.’

³⁴Abu Lokoku a Ituŋanan, imuji ka emasi epiini; nai itemasi iyes, ‘Kiŋolikisi ekadakan ka ekameran, ekone a ŋikerirak ocur ka ŋikasecak!’

³⁵Nai aosou ŋina ka Akuj itoodiunitae erae ŋina a kire aneni a ŋulu ecamunito iŋes.”

³⁶Tonyarau Eparisayot Yesu akimuj ka iŋes, tolot nai iŋes kai ke Eparisayot akimuj.

³⁷Ayai nen aberu ŋina ke etaun ŋina arae akasecan nooi. Ani iirari iŋes atemar imujete Yesu kaapei ka Eparisayot, tolot iŋes nen etiŋit ecupa ŋolo eleleba akimyet ŋina akukunyon.

³⁸Min iŋes kaku nakejen a Yesu igworo, kitapapal ŋakejen a Yesu a ŋakiyo keŋ, toninaiya nai iŋes ŋakejen a ŋitim keŋ, tonu, kiwosak akimyet.

³⁹Ani iŋolikini Eparisayot ŋolo anyarit Yesu nakimuj ŋakiro ŋun, abu totamak bon tema, “Kerae kire torae ekile lo ekadwaran, keyeni atemar aniberu na ŋina etapit iŋes na; nabo keyeni atemar erae iŋes akasecan!”

⁴⁰Toboŋok Yesu iŋes tema, “Eyakasi ayoŋ ŋakiro ŋuna acamit alimokin iyoŋ Simoni.” Kiik Simoni tema, “Ewa, Eketataman, tolimokinae robo.”

⁴¹Tolimu Yesu tema, “Ayai ituŋanan ice ŋini edeniyorito ŋituŋa ŋiarei ŋidinari keŋ. Emicae iŋes ipei ŋidinari ŋamiae ŋakan, ŋoloce ŋidinari ŋatomonikan.

⁴²Aŋuna pa apedoryata ikes akitac iŋes, abu tojal ŋamicae ŋun daadaŋ. Ali alokidiŋ ŋuluarei ŋul eminakini iŋes nooi?”

⁴³Toboŋok Simoni tema, “Atami ayoŋ ŋolo ajalakinio ŋidinari ŋulu alalak.” Tolimok Yesu iŋes tema, “Ilimu iyoŋ iyookino.”

⁴⁴Tosodi toboboŋ Yesu neni ka aberu, tolimok Simoni tema, “Ite iyoŋ aberu na a? Abu ayoŋ olomu kai kon, ibu iyoŋ nyikiinak ayoŋ ŋakipi ŋuna kilotaret ŋakaakejen, nai etapapal iŋes ŋakaakejen a ŋakiyo keŋ ka aninaiya a ŋitim keŋ.

⁴⁵Nyenuwa iyoŋ ayoŋ, nai enui iŋes ŋakejen kaŋ ameun ŋinapei takae alomunia ayoŋ ne.

⁴⁶Nyiwosakina iyoŋ akimyet nakou kaŋ, nai eosak iŋes akimyet ŋina akukunyon nakejen kaŋ.

⁴⁷Aŋun, akalimokini ayoŋ iyoŋ atemar, esyoni ŋasecisya keŋ ŋuna alalak, anerae etoodiu iŋes amina keŋ ŋina epol nooi, nai iŋes ŋini isyoniyo iwadio, edit amina keŋ.”

⁴⁸Tosodi tolimok Yesu aberu tema, “Esyoni ŋasecisya kon.”

⁴⁹Togeut ŋituŋa ŋulu aya ka iŋes lomesa akiŋitiŋita make temasi, “Okoe, ŋae ituŋanan ŋini epedori tari akisyon ŋasecisya en?”

⁵⁰Tolimok Yesu aberu tema, “Ikiteyar iyoŋ anupit kon, tolot ke ekisil.”