Read ngakarimojong Luk. 8 Bible Online

Luk. 8 - ngakarimojong bible

Luk. 8

¹Kedaun ŋakiro ŋun, kirimo Yesu lotaunio ka lorerya, akitatam Ŋakiro ŋuna Ajokak ŋuna ka Apukan ka Akuj. Torukito ka ŋulutomon ka ŋiarei;

²ka ŋaberu daŋ ŋace ŋuna abu Yesu kitaŋaleu ikamunito ŋipyan ikes ka alodekesyo. Araakasi ikes Maria (ŋina arae ekiro keŋ Magadalena) ŋina etaŋaleunio ikamunito ŋipyan ŋikanikaarei;

³Joanna, aberu a Kusa a ŋolo eyokit ŋiboro ŋulu ke Erode, ka Susanna ka ŋace ŋuna alalak ŋuna eŋaranakinete ikes a ŋiboro kec.

⁴Potu ŋituŋa neni a Yesu alowaetin a daadaŋ, alotaunio a ŋulu alalak toruwor asepic; tolimok Yesu ikes akitadapet na tema,

⁵“Ayai ekile ŋolo abu tolot akitakin ŋikinyom keŋ. Ani eekini iŋes, todoto ŋice lorot, ido kipudaasi ŋituŋa ka kidepasi ŋikyeny.

⁶Apotu ŋice todoto loŋaro; ani erupunete, apotu tookiyosi, anerae amam pa apalal ŋalup.

⁷Apotu ŋikinyom ŋice todoto kidiŋ lokukwa, tosodo toruput kaapei ka ŋikukwa, torida ŋikukwa ikes.

⁸Nabo apotu ŋice todoto nalup ŋuna ajokak, toruput topolout, tokoniu ŋolokinyomit amiat.” Kedau Yesu erwor ŋun, tolimok ikes ikeunit tema, “Iŋes ŋini eya ŋaki ŋuna kiiraret, kiira!”

⁹Kiŋita ŋikasyomak Yesu apolou ŋina ka akitadapet a ŋin.

¹⁰Toboŋok Yesu ikes tema, “Ikiinakinitae iyes ayenun ŋuna imunono ŋuna ka Apukan ka Akuj, nai ŋituŋa ŋuluce elimokinio a ŋakitadapeta. Tosodi ani kiŋolikis daŋ, nyeanyuwasi; ani kepuput daŋ, nyiirasi.”

¹¹“Apolou ŋina ka akitadapet iŋes na: ekinyomit iŋes akirot ŋina ka Akuj.

¹²Ŋikinyom ŋulu adoete lorot erae ŋituŋa ŋulu iirarete, nai bu Satan tolema akirot alotai kec, ikotere nyenupa ikes toiunos.

¹³Ŋikinyom ŋulu adoete loŋaro erae ŋituŋa ŋulu iirarete akirot kijaut ka alelyan, nai emamukatar ikes ŋataagor, enupete ca iwadio, nai ani edoli ŋirwa ŋulu itemere, tosodo topalikis.

¹⁴Ŋikinyom ŋulu adoete lokukwa, erae ŋituŋa ŋulu iirarete akirot; nai amitakinit ŋuna ka akwap ka ekibure ŋolo a ŋiboro daadaŋ elomunete tooma toridakis akirot ŋina ka Akuj nyera.

¹⁵Ŋikinyom ŋulu adoete nalup ŋuna ajokak erae ŋituŋa ŋulu iirarete akirot, kiricakis, tonupa a ŋitai a ŋulu ajokak ka totitinyikis akitodol ŋina erayata.

¹⁶“Emam ituŋanan inokakini etaa, tosodi tobuburik atuba kori kiwuak kwap ekitaada. Nai iwuakini iŋes neni ikeuna, ikotere kiteoto ŋituŋa daadaŋ elomarete kai.

¹⁷Anerae emam ibore ŋini imunonitae ŋini nyisileereunio, kori ibore daadaŋ ŋini iwuaitae ŋini nyitatakununio yaunae nakica.

¹⁸“Tocoito robo ikwaŋina iiraryata; anerae ituŋanan daadaŋ ŋini eyakar ibore einakinio ŋini elal, nai ŋini daadaŋ emam ibore eyai, edemaryo tari ŋinidio cici ŋini etami iŋes atemar ayakar.”

¹⁹Potu toto a Yesu ka ŋikaitotoi a Yesu, nai nyepedosi akidol diyete Yesu aŋuna ka asepic a ŋina apolon.

²⁰Tolimokinae Yesu temarae, “Ewuasi toto kon ka ŋikonikaitotoi alokiŋa, ecamito aanyun iyoŋ.”

²¹Toboŋok iŋes tema, “Toto kaŋ ka ŋikaitotoi kaŋ ikes ŋulu iirarete ŋakiro ŋuna ka Akuj, kiwuapa.”

²²Apeikoloŋit, todokasi Yesu ka ŋikeekasyomak nataker tolimok iŋes ikes tema, “Apena, odokasi ekekwaye anam.” Kisyakis ikes amiar ataker.

²³Ani eriŋa ikes eya nanam, kinapakin Yesu tojotoor. Tokut atipei ekuwuam ŋoloti apolon ananam, kiburiburi ataker akilelebun. Toryamut ikes ŋican ŋulu apolok.

²⁴Kiyotosi ŋikasyomak neni a Yesu, kitekienyut iŋes temasi, “Eketataman, Eketataman! Edikino ikitwaki.” Tonyou Yesu, kikilyak ekuwuam ka ŋakipi ŋuna emorokokoete, todipakinos ikes, kililiŋ akwap cek.

²⁵Kiŋit Yesu ŋikeekasyomak tema, “Ai eyai anupit kus?” Tobul ikes, toumokis kiŋitas make temasi, “Ŋae ekile lo ŋolo elimokini tari ekuwuam ka ŋakipi kiirasi iŋes lo?”

²⁶Todolut nai ikes nakwap ŋina a Ŋigadara ŋina eteosi ka Galileya.

²⁷Ani edokuni Yesu anataker, kiryama ka ekile ŋolo abunit alotaun, ŋolo ekamunito ŋipyan. Eboit iŋes ekaoyan eleri, nabo kiboiye analyalin toŋerite ere.

²⁸Ani iŋolikini iŋes Yesu, kiworou toramakin kiŋaren keŋ, tocelu tema, “Anukiro eya iyoŋ ka ayoŋ, Yesu Lokoku ka Akuj, a ŋina alokidiama nooi? Akadyekit ayoŋ iyoŋ atemar, nyikisican kare ca!”

²⁹Alimuni iŋes ikoŋina, anerae eŋenyakini Yesu ŋipyan alomun aneni keŋ. Etokoponorete iŋes ŋipyan ŋirwa ŋulu alalak, tari keeni iŋes a ŋiriko ŋakejen ka ŋakan, aŋedanari kipiiri nariet aŋuna ka agogoŋu a ŋipyan a ŋul.

³⁰Kiŋit Yesu iŋes tema, “Ŋae ekonikiro?” Toboŋok ekile tema, “Erae ekiro kaŋ ‘Ajore’,” anerae alomarito ŋipyan ŋulu alalak tooma keŋ.

³¹Kimaimaa ŋipyan ŋul Yesu nyecakak ikes nauwuat ŋina aoyan.

³²Ayai nen esipan ŋolo apolon ŋolo a ŋipegei ŋolo adaka nagum ke emoru. Kilipa ŋipyan Yesu aesikin ikes tolomasi lopegei. Tocamak iŋes ikes.

³³Tosodo tolomut ŋipyan ŋul alokile, tolomasi lopegei; tosuro esipan daadaŋ anakope, tosuror tooma nanam, kitamat totwaka.

³⁴Ani iŋolikinete ŋikeyokok ŋulu a ŋipegei ŋakiro ŋuna etiyakinosi, kipiiryoto alimor lotuŋa ŋulu aya lotaun ka lorerya.

³⁵Toloto ŋituŋa aanyun ŋakiro ŋuna apotu kitiyakin. Potu neni a Yesu, toryamut ekile ŋolo etolomunere ŋipyan iboi a nakejen a Yesu, enapit ŋilowi, kejokyar akeekuwan; tokuryaketa ikes.

³⁶Tolimokis ŋulu aris keyenut epite ŋolo etaŋaleunere ekile ŋolo ekamunito ŋipyan.

³⁷Apotu nai ŋituŋa ŋulu ka akwap a Gadara kiŋitakis Yesu alosit iwace, anerae abu tobul ikes nooi. Todoka nai Yesu nataker, toboŋo.

³⁸Tosodi ekile ŋolo sek eritaryo ŋipyan aneni keŋ, kimaima Yesu arukor ka iŋes. Nai kitoboŋo Yesu iŋes lore keŋ tema,

³⁹“Toboŋo lore kon, kiserak lotuŋa ŋakiro ŋuna etiya Akuj neni kon.” Tolot nai iŋes tolimok ŋituŋa daadaŋ alotaun ŋuna abu Yesu kitiyak neni keŋ.

⁴⁰Ani eboŋuni Yesu alokekwaye anam, kisiryam asepic a ŋituŋa iŋes, anerae edarito ŋituŋa iŋes.

⁴¹Bu ekile ŋolo anyaritae Yairo, ŋolo apolokinit esinagoga. Toramakin kiŋaren Yesu, kimaima iŋes abunore kai keŋ,

⁴²anerae adyaka nakoku keŋ ŋina donupei, toapiye atwanare. Arae ŋikaru keŋ ŋitomon ka ŋiarei. Nai ani eriŋa Yesu elosi toridak nooi asepic a ŋituŋa iŋes.

⁴³Ayai nen aberu ŋina aleleete ŋaokot ŋikaru ŋitomon ka ŋiarei. Kisunyak iŋes ŋikeeboro daadaŋ lomurok, nai amam tari ipeituŋanan daŋ ŋini apedori akitaŋaleun iŋes.

⁴⁴Toŋicun iŋes alokaku, totap abilet ŋina ke elou a Yesu; totubos ŋaokot atipei.

⁴⁵Kiŋit Yesu tema, “Ŋae ŋini akatap ayoŋ?” Topega ŋituŋa daadaŋ ŋun, ido tema Petero, “Eketataman, ikilukakinito iyoŋ ŋituŋa kidiŋ ka ikijukito daŋ.”

⁴⁶Nai tema Yesu, “Akatapit sek ayoŋ ituŋanan, anerae abu ayoŋ oyenu atemar alot agogoŋu aneni kaŋ.”

⁴⁷Ani eanyuni aberu ŋin atemar pa apedorit iŋes akimunon ŋakiro ŋun, bu emarani, toryedik alokiŋaren Yesu. Kitatamik iŋes alokiŋaren ŋituŋa daadaŋ ŋakiro ŋuna atapya iŋes elou a Yesu ka epite ŋolo aŋaleunio iŋes atipei.

⁴⁸Tolimok Yesu iŋes tema, “Nakoku, ikitaŋaleu iyoŋ anupit kon. Tolot a ekisil.”

⁴⁹Ani eriŋa Yesu irworo ŋun, bu ituŋanan ice alore a Yairo, tolimok Yairo tema, “Eridak nakoku kon, tojoŋo akicanit eketataman.”

⁵⁰Kiira Yesu ŋakiro ŋun, tolimok Yairo tema, “Nyikibul, nai tonup iyoŋ, eyari iŋes.”

⁵¹Ani edoli iŋes lore, nyecamak iŋes ŋituŋa alomar ka iŋes tooma kai, mati Petero, Yoana, Yakobo, Papa ka toto a ikoku.

⁵²Kigworos daadaŋ kiworoete aŋuna a ikoku. Tolimok Yesu ikes tema, “Tojoŋoto akigworo, nyetwanit iŋes--ejotoe!”

⁵³Tokyenatar daadaŋ iŋes, anerae ayenete atemar atwanit apese kire.

⁵⁴Nai kikam Yesu akan ka apese, tonyara iŋes tema, “Nakoku, tokienyu!”

⁵⁵Toyaru apese, tonyou atipei, tolimok nai Yesu ŋikekauruunak ainakin iŋes adiokimuj.

⁵⁶Toumokis ŋikauruunak ka apese nooi, todaun ŋuna elimunete, nai kicik Yesu ikes tema, “Nyilimokis tari ipeituŋanan daŋ ŋuna etiyakinosi.”