Read ngakarimojong Ŋikis. 10 Bible Online

Ŋikis. 10 - ngakarimojong bible

Ŋikis. 10

¹Apaki ŋin kirwor Ekapolon neni kaŋ tema, “Kiceu ŋamoru ŋace ŋaarei ŋunadapal ŋuna ikote ŋunakuar a ekiŋaren, ido kitipeu neni kaŋ kidiama emoru, kitiyau daŋ asaduku a ŋakito.

²Egirakini ayoŋ namoru ŋun ŋakiro ŋunapei sek ayakasi namoru ŋunadapal ŋuna a ekiŋaren, ŋuna ibu iyoŋ tobwaŋabwaŋa, ido emaikina iyoŋ kiwuak ikes nasaduku.”

³Abu nai ayoŋ etiyau asaduku a ŋakito a ŋuna a ŋiwo, ecieu ŋamoru ŋaarei ŋunadapal, ŋuna ekwaan ka ŋuna sek a ekiŋaren, ido olot kidiama emoru, atiŋit ŋamoru ŋunaarei ŋun.

⁴Abu nai Ekapolon kigirak namoru ŋunadapal ŋun ŋakiro ŋunapei sek aya namoru ŋuna a ekiŋaren, arae ŋakiro ŋun ŋakiciketa ŋunatomon ŋuna abu Ekapolon itolimok iyes alomoru akoloŋit ŋina iyakatar iyes iwapei, ŋina erworor Ekapolon eyai narira. Abu Ekapolon okoinak ayoŋ ŋamoru ŋun.

⁵Abu nai ayoŋ oboŋu otiyaun alomoru, ido ewuak ŋamoru ŋun nasaduku ŋina etiyauni ayoŋ, tosodi eya tokona nen, lopite ŋolo akalimokinia Ekapolon ayoŋ.

⁶(Apaki ŋin, apotu Ŋisirael towotokis alo Beeros Bene-Yaakan [4] tari Mosera, abu Aron totwan a nen, tonukae daŋ nen, kilunyokin lokoku keŋ Eleasar lorot keŋ ikwapei esacaradoti.

⁷Apotu Ŋisirael towotokis a nen tari Gudgoda, towotokis alo Gudgoda tolomiyasi Yotibasa nakwap ŋina aya ŋayona ŋuna aleleete.

⁸Apaki ŋin abu Ekapolon totyaka ekabila a Lepi aŋuna ke etic a ŋolo ka adakit Asaduku ŋina ka Acamunet ke Ekapolon ka aŋuna ke etic ŋolo ka akiwo alokiŋaren Ekapolon akitiyanakin iŋes ta aŋuna ke etic ŋolo ka akiterereŋ ŋituŋa alokiro ke Ekapolon. Tari tokona ŋiticisyo a ŋilepi ikes ŋul.

⁹Aŋun, emam akwap ekorakinitae ŋituŋa a ekabila a Lepi aruwor ŋina kec, Araakau ŋisacaradotin ŋulu itiyanakinete Ekapolon iŋes erae akorakinet kec, lopite ŋolo abunio Ekapolon Akuj kus kiik ikes.)

¹⁰Abu nabo ayoŋ eboi alokidiama emoru ŋapaarasya ŋatomoniomwon ka ŋakuwarisya ŋatomoniomwon, lopite ŋolo etiyatar apaki ŋina esyaunan, tosodi abu nabo Ekapolon kiira ŋakiro kaŋ; kimyek amunyar iyes.

¹¹Kirwor Ekapolon neni kaŋ tema, “Tonyou, tolot kiŋarenik ŋituŋa ikotere elosete kituruwosi akwap ŋina abu ayoŋ ekoŋ ainakini neni atapapaa kus ŋina kec.”

¹²Aŋun tokona, Okoe Ŋisirael, anukiro iitanit Ekapolon Akuj kus iyes kitiyata? Erae akitopoloorit Ekapolon Akuj kus, akiwuap ŋakiro keŋ daadaŋ, amina iŋes, akitiyanakin Ekapolon Akuj kus a ŋitai kus a daadaŋ ka a akiyar kus a daadaŋ

¹³ka akiwuap ŋakiciketa ŋuna ke Ekapolon Akuj kus ka ŋakiro ŋuna etubunit iŋes, ŋuna akalimok ayoŋ iyes nakoloŋit na aŋuna ka alakara kus a ŋikulepek.

¹⁴Tari kerae nakuj ka kidiama daadaŋ ka akwap ta ŋiboro daadaŋ ŋulu eya nen ŋulu a Ekapolon Akuj kus,

¹⁵abu iŋes tominak atapapaa kus bon ka abu ikiseu iyes, ŋulu irae ŋiletok kec alotuŋa daadaŋ, lopite ŋolo eyakatar ŋakiro tokona.

¹⁶Aŋun tokona, kilocokisi ŋipitesyo kus, tojoŋoto jik arakau ŋituŋa ŋulu egogoŋ ŋakyes;

¹⁷anerae erae Ekapolon Akuj kus Akuj a ŋakujo, Ekapolon a ŋikapolok, Akuj ŋina apolon, ŋina etiron ka ŋina etubulon, ŋina etubi ŋakiro iyookino ka eŋerit akaluŋuluŋut,

¹⁸Akuj ŋina etubi ŋakiro anakiyookino aŋuna a ikoki ka aŋuna ka apuserut, ŋina emina ŋituŋa ŋulugelae einanakini ikes akimuj ka ŋilowi.

¹⁹Emaikina nai iyes daŋ tominas ŋituŋa ŋulugelae, anerae irae paaran iyes daŋ ŋigelae anakwap a Ijipit.

²⁰Kitopoloorito Ekapolon Akuj kus, kilipa neni keŋ bon, kimiidikinos neni keŋ ka kikoŋo alokiro keŋ bon.

²¹Ekapolon iŋes erae akipuro kus, iŋes erae Akuj kus, ŋina etiya aŋuna kus ŋakiro ŋuna apolok ka etubulok ŋun ŋuna iŋolikis iyes a ŋakonyen kus.

²²Apaki ŋina alosyoto atapapaa kus Ijipit, arae ikes daadaŋ ŋituŋa ŋatomonikanikaarei bon, ikituruwo tokona Ekapolon Akuj kus iyes ŋituŋa ŋulu alalak ikwa ŋikacer ŋulu alokidiama.