Read ngakarimojong Ŋikis. 14 Bible Online

Ŋikis. 14 - ngakarimojong bible

Ŋikis. 14

¹Iraakasi iyes ŋidwe ŋulu ke Ekapolon Akuj kus. Nyiduŋuduŋoto ŋawat kus, kori nyibanya ŋireetin kus aŋuna a ŋikatwak,

²anerae irae iyes ŋituŋa ŋulu asegak aneni ke Ekapolon Akuj kus, iyes ikiseu Ekapolon alotuŋa a ŋakwapin a daadaŋ aruwor ŋulu keŋ, ŋituŋa keŋ ŋulu emina iŋes nooi.

³Nyinyama idiobore ŋini itoroniyaritae.

⁴Ŋibaren ka ŋityaŋ ŋulu ipedorete iyes akinyam ikes lu: emoŋ, amesek, ameot,

⁵atili, agete, etili, ameot ŋina ka ariet, ŋikorya ŋulu a ŋimoru, amesek ŋina ka ariet ka elob.

⁶Ipedorete iyes akinyam ityaŋ daadaŋ ŋini erae ŋigece ŋiarei ka ŋini iyerununui akimuj kinyadot.

⁷Nai alotooma ŋityaŋ ŋulu eyakatar ŋigece ŋiarei ka ŋulu iyerununeete akimuj kinyadoto, nyemaikina iyes tonyama lu: Ekaal, apoo ka aduka, anerae tari kiyerununeete ikes akimuj kinyadoto, nyerae ŋigece ŋiarei, aŋun erae ikes ŋulu itoroniyaritae aneni kus.

⁸Nyinyama eguruye, anerae tari keyakar iŋes ŋigece ŋiarei, nyiyerununui akimuj kinyadot, itoroniyaritae iŋes aneni kus. Nyinyama akiriŋ a ŋityaŋ a ŋul, nyitapa tari kiryamut iyes ikes etwakito.

⁹Alokidiŋ ŋiboro ŋulu eyarete alotooma ŋakipi tonyama lu: Ŋinibore eyakar ŋibebenuk ka ŋakabebekwa;

¹⁰tosodi ityaŋ ŋini eyari alotooma ŋakipi daadaŋ ŋini emamukar ŋibebenuk ka ŋakabebekwa, nyemaikina iyes tonyama, anerae itoroniyaritae aneni kus.

¹¹Ipedorete iyes akinyam ŋikyeny daadaŋ ŋulu nyitoroniyaritae.

¹²Nai nyemaikina iyes tonyama ŋikyeny lu: Ŋigolei, ŋataruk, ŋigolei ŋulu a ŋapooe,

¹³ŋigolei ŋulu enyaritae atanawi, ŋiculya ŋulu a ŋolokabila daadaŋ,

¹⁴ŋikurukwa ŋulu a ŋolokabila daadaŋ,

¹⁵ŋikaleeso, atanawi ŋulu eporete nakwaare, ŋigolei ŋulu ekopete ŋilelem ananamyo,

¹⁶ŋitulae ŋulu cicik ka ŋitulae ŋulu aburok, ŋabaaŋa,

¹⁷ŋitulae ŋulu ka aloŋisat, ŋataruk ŋuna enyaritae atatoŋole, ŋataruk ŋuna enyaritae atanatuŋa,

¹⁸ŋacolikokoi, ŋautomiryo ŋuna a ŋikabilae a daadaŋ, ŋikyeny ŋulu a ŋimoru ŋulu esibito ŋikokoroi ka ŋimenwa,

¹⁹Itoroniyaritae aneni kus ŋiboorei daadaŋ ŋulu cicik ŋulu eyakatar ŋabebenuk, nyinyama ikes.

²⁰Ipedorete iyes akinyam ŋisubuna daadaŋ ŋulu nyitoronitae ŋulu eyakatar ŋabebenuk.

²¹Nyinyama idiobore ŋini etwani bon, ani kicamito inakisi tonyama ŋituŋa ŋulugelae ŋulu iboiyete ka iyes alotaunio kus, kori togyelakisi neni a ituŋanan a ŋinigela, anerae irae iyes ŋulu asegak aneni ke Ekapolon Akuj. Nyidorokis ikale ŋinimeot a ŋakile a toto keŋ.

²²Totyakasi atutubet apei alotooma ŋitomon a ŋaraito a ŋikinyom kus a daadaŋ a ŋulu elemununiyete iyes a ŋolokaru alomanikorin kus.

²³Tonyama atutubet apei alotooma ŋitomon a ŋikinyom kus, a epiini kus, a akimyet kus kaapei ka ŋikiyae a ŋaatuk ka a ŋamesekin kus, tonyama ikes alokiŋaren Ekapolon Akuj kus, anakibois a ŋina ebuni iŋes aseun aruwor neni ilipere enyaritae ekiro keŋ, kitiyata ŋun ikotere iyenuniata akitopoloorit Ekapolon Akuj kus jwi jwi.

²⁴Nai ani ikiterereŋi iyes Ekapolon Akuj kus, eoya nooi erot ka nyipedorete iyes akiwuok ŋatutubeta ŋun, anerae elwana nooi aneni iyakasi iyes akibois ŋina eseuni Ekapolon Akuj kus toyakaun ekiro keŋ,

²⁵aŋun, ipedorete agyelar losiliŋa, yaasi nai ŋisiliŋa ŋul nakibois ŋina eseuni Ekapolon;

²⁶kisitiyata a nen ŋisiliŋa aŋuna a ŋinibore a daadaŋ a ŋini ecamito iyes, kerae agyelunia ŋimoŋin, ŋamesekin, epiini, ŋagwe ŋuna adwarak, kori ibore daadaŋ ŋini icamito iyes. Tosodi tonyama ikes a nen alokiŋaren Ekapolon Akuj kus, iyes kaapei ka ŋituŋa a ŋikalya kus tolelyana.

²⁷Ani eruwor ŋilepi ŋulu iboiyete alotaunio kus, tocoito ijamakinete ikes, anerae emam akwap ekorakinio ikes, kori ŋina eruwor ŋina kec.

²⁸Ŋinapaki daadaŋ epete ŋikaru ŋiuni, emaikina iyes yaut atutubet apei alotooma ŋitomon a ŋinibore kus a daadaŋ a ŋini iryamunete iyes alokaru a ŋol, ido kiŋadakis lotaunio kus,

²⁹ikotere ŋilepi ikwapei nyeryamunitotor ikes akwap ŋina ekorakinitae ikes ŋina eruwor ŋina kec eryamunete akimuj ŋina itemokino kaapei ka ŋigelae, ŋikokyok ka ŋapuseru ŋituŋa ŋul ŋulu eya lotaunio kus, ikiterereŋi iyes Ekapolon Akuj kus aloticisyo a daadaŋ a ŋulu itiyaete iyes.