Read ngakarimojong Ŋikis. 15 Bible Online

Ŋikis. 15 - ngakarimojong bible

Ŋikis. 15

¹Ekaru daadaŋ ŋolo a ŋikanikaarei, emaikina iyes kimyekis ibore daadaŋ ŋini imicaete ŋinice,

²ido epite lo iŋes itiyaere ŋun: Elimori ekemican ibore keŋ ŋini ideniyorit ituŋanan aneni keŋ, nyemaikina iŋes kiitan atacakino ibore ŋin aneni a ekidunyet keŋ a ŋolo erae Eisiraelit, anerae adaun akiseraun apaki ŋina ke Ekapolon ŋina eesikinere ŋamicae.

³Epedori ituŋanan akimicaun ibore keŋ ŋini ideniyorit ituŋanan ŋinigela, nai ani kerae Esiraelit pei ayakar amica a ŋinice nyimicao iŋes.

⁴Kikote neni daŋ nyemaikina eyai kidiŋ kus ituŋanan ŋini ekulyakana, anerae kire jik ebuni Ekapolon Akuj kus akiterereŋ iyes anakwap a ŋina ikiinakini iŋes iyes aruwor ŋina kus kiboiyoto.

⁵Itiyakin ŋun erae kiwuapa iyes ejok ŋakiro a Ekapolon Akuj kus anakiwuapit ŋakiciketa nu ŋuna ekecik ayoŋ iyes nakoloŋit na.

⁶Ani ikiterereŋi iyes Ekapolon Akuj kus, lopite ŋolo ikiikinia iyes, idenionokinete iyes neni a ŋituŋa a ŋakwapin aŋuna alalak, nai nyideniyorete iyes idiobore aneni kec, ipukaete iyes ŋituŋa a ŋakwapin, nai nyikipukaete ikes iyes.

⁷Ani keyai alokidiŋ kus ituŋanan ŋini iitanit idiobore, ituŋanan idio alotooma atukot kus, alotaun kus ka anakwap a ŋina ikiinakini iyes Ekapolon Akuj kus, nyiraakasi ŋituŋa ŋulu imini, kori ibunito ŋakan aneni a ikidunyet kus a ŋini eyakar akiitanit.

⁸Nai emaikina iyes torae ŋulu eŋaara ŋakan, ido kidenikis ituŋanan ŋin anapatanu a etau ibore daadaŋ ŋini iitanit iŋes.

⁹Tocoito, nyiyakatar atametait ŋina ka aminiu, ido itamete ebe, “Aapuu tokona ekaru ŋolo a ŋikanikaarei ŋolo eesyanakinere ŋamicae,” ido iteete iryenyaaka ikidunyet kus ŋini icana nyiinakis iŋes ibore ŋini icana. Acepaki igworokini ikidunyet kus ŋin Ekapolon ikitoroniyarit iyoŋ, ido iyakaunor iyoŋ ekaile ŋolo ka asecit.

¹⁰Inak ikidunyet kon ibore ŋini iitanit, inak iŋes emam akitiŋakinet ka emam apodo, anerae ikiterereŋi iyoŋ Ekapolon a ŋakiro a ŋun alotooma ŋiticisyo kon daadaŋ ŋulu itiyae iyoŋ.

¹¹Ikwapei nyemamukaunotor anakwap ŋituŋa ŋulu iitanito akiŋarakino, ekeciki tokona ayoŋ iyes ebe, “Toŋaarito ŋakan kus neni a ŋikulyak ka neni a ikidunyet kus a ŋini eyakar iitanit anakwap kus.”

¹²Ani kikigyelakin iyes ituŋanan kus pei, Eburaniyat, kori Aburaniyait, ido kitiya neni kus ŋikaru ŋikanikapei, emaikina iyes kimyekis iŋes tolot edoli ekaru ŋolo a ŋikanikaarei.

¹³Tosodi, ani ilacakinete iyes epito, nyitoloto iŋes erorete ŋakan.

¹⁴Inakisi iŋes emam akitiŋakinet adio daŋ ibore idio alotooma ŋamesekin kus, ŋikinyom kus ka epiini kus, inakis iŋes idiobore alotooma abaru ŋina ikiterereŋitor iyes Ekapolon Akuj kus.

¹⁵Totamunito atemar iirakasi iyes daŋ ŋipi anakwap a Ijipit, ido abu Ekapolon Akuj kus ikilaku iyes, a ŋakiro a ŋun, ekeciki ayoŋ iyes nakoloŋit na akiwuap akiciket na.

¹⁶Nai ani ketema epito ŋol neni neni a idio kus, “Nyalosi ayoŋ aneni kon” aŋuna ikiminar iŋes iyoŋ ka ŋituŋa a ekal kon daadaŋ, anerae elakara iŋes iboiyete kaapei ka iyoŋ,

¹⁷emaikina nai iyoŋ tolemu emutu, topedio akit keŋ, ido eruwor iŋes epito kon ŋikaru ka ŋikaru. Kitiya tan ŋunapei ŋun neni apito kus.

¹⁸Nyemaikina ikinomorit iyes akimyekin epito, kori apito kus tolot, anerae abu iŋes ikitiyanak iyoŋ alotooma ŋikaru ŋikanikapei, eriyan etic ŋolo etiya iŋes, alotooma ŋikaru ŋul ka etic ŋolo itiyaete ŋiketiyak ŋiarei ŋulu ipaŋgatae, ido ikiterereŋi iyes Ekapolon aloticisyo a daadaŋ a ŋulu itiyaete iyes.

¹⁹Emaikina iyes kitaleiyosi aŋuna ke Ekapolon ŋikiyae ŋulumoŋin a ŋamesekin kus, kori a ŋamee kus, nyisitiyata emoŋ kus ŋolokiyae aŋuna a etic adio, kori nyitubo ŋajul a ŋikiyae a ŋamesekin kus.

²⁰Inyamete iyes ikes a ŋolokaru kaapei ka ŋituŋa a ŋikalya kus, alokiŋaren Ekapolon Akuj kus anakibois a ŋina eseuni iŋes.

²¹Nai ani eyai neni eŋwalit alobaren a ŋul, kori kemudukana, nyiinakis ikes erae amuronot neni ke Ekapolon Akuj kus,

²²ipedorete iyes akinyam ŋibaren ŋulu eyai neni eŋwalit ŋul alotaunio kus ka enyamete ŋituŋa daadaŋ ŋulu nyitoroniyaritae ka ŋulu itoroniyaritae, inyamete iyes ikes, lopite ŋolo inyamyata akiriŋ a agete, kori a atili.

²³Nyemaikina nai iyes tonyama ŋaokot kec, tobukokisi nalup ikwa ŋakipi.