Read ngakarimojong Ŋikis. 17 Bible Online

Ŋikis. 17 - ngakarimojong bible

Ŋikis. 17

¹Nyiinakis erae amuronot neni ke Ekapolon Akuj kus emoŋ, kori emesek, ŋibaren ŋulu eyai neni eŋwalit, kori idiobore daadaŋ ŋini nyejok, anerae eŋerit Ekapolon Akuj kus ŋun.

²Ani keryamun aneni kus idiotuŋanan ekile, kori aberu alotaun kus a edio a ŋulu ikiinakini iyes Ekapolon Akuj kus, ŋini itiyae ŋuna aronok alokiŋaren Ekapolon Akuj kus ka nyiricak ŋuna ka acamunet,

³aŋuna alosyo akitiyanakin ŋakujo ŋace ka akilip neni kec, kerae neni ka akoloŋ, kori, a elap, kori a ŋiboorei ca daadaŋ ŋulu eya kidiama, a ŋulu nyakacamakinit ayoŋ iyes kilipa neni kec,

⁴tosodi ani kikilimokin iyes, kori kiirasi iyes ŋakiro ŋun, kimimaut iyes ejok ŋakiro ŋun toryamut atemar itiyatae kire alo Isirael ŋakiro ŋuna eŋerit Akuj,

⁵emaikina nai iyes yaut ekile ŋol, kori aberu ŋin ŋina itiyat ŋakiro ŋuna eŋerit Akuj ŋun lopuke a etaun kus, tosodi emaikina iyes tocaka ekile ŋol, kori aberu ŋin a ŋamoru tari ŋina etwania.

⁶Nai emaikina toya ŋisuudae ŋiarei, kori ŋiuni etubokinio ituŋanan ŋin atwanare, nyetubokinio ituŋanan atwanare anakiro a ŋuna a esuuda a epei bon.

⁷Ŋisuudae ikes egeunete akicak ituŋanan ŋini etubokinitae atwanare, ani ekaku tocaka ŋituŋa ŋuluce daadaŋ. Aŋun ilemarete iyes aronis alokidiŋ kus.

⁸Ani keyakaun ŋakiro ŋuna ikityonikinit iyes akitub, kerae ŋuna earitor ituŋanan ŋinice, kori kemaryaete ŋituŋa ŋiboro, kori kewanit ituŋanan ŋinice, ani eyai ebura a ŋakiro a ŋuna ikote ŋun alotaunio kus, emaikina iyes toloto atipei kitipeiyosi nakibois ŋina eseuni Ekapolon Akuj kus,

⁹neni iŋituniata iyes aneni a ŋisacaradotin a ŋulu erae ŋilepi ka aneni a ekatubon ŋakiro a ŋolo epolokinit akitub ŋakiro alorwa a ŋul, ikilimokinete ikes iyes a nen ŋuna kitiyakina anakiro aŋun.

¹⁰Kitiyata ŋakiro daadaŋ ŋuna etubunete ikes anakibois a ŋina eseuni Ekapolon ka kiwuapa ŋakiro daadaŋ ŋuna ikilimokinete ikes iyes.

¹¹Emaikina iyes kiwuapa ŋakiro daadaŋ ŋuna a ekisil ŋuna ikisileerekinete ikes iyes, kori ŋakiro daadaŋ ŋuna ikilimokinete ikes iyes akitiya, nyiesikis akitiya ŋuna ikilimokinete ikes iyes.

¹²Ani ŋini nyecamuni akitiya ŋuna etubuni esacaradoti ŋolo eseunitae akitiya neni ke Ekapolon a Akuj kus, kori ŋuna a ekatubon ŋakiro, emaikina ituŋanan ŋin toarae. Aŋun, ilemarete iyes aronis alo Isirael.

¹³Iirarete ŋituŋa daadaŋ ŋakiro ŋun tobul, tosodi nyitiyaete nabo ikes ŋakiro ŋun iredakinito.

¹⁴Ani idolete iyes nakwap ŋina ikiinit iyes Ekapolon Akuj kus, kidaut akikamar ka kiboikinos nen, ido itemasi, “Oseutu aŋuna yok erwosit ŋolo ikipukae iwon, lopite ŋolo eyakatar ŋirwosi nakwapin daadaŋ ŋuna ikidunyar iwon,”

¹⁵ipedorete iyes akiwuakin erwosit ŋolo eseuni Ekapolon Akuj kus. Ipedorete iyes akiturwor ipei alokidiŋ kus erwosit kus, nyecamakinitae iyes akiwuakin ituŋanan ŋinigela ŋini nyerae Esiraelit aruwor erwosit kus.

¹⁶Kikote neni daŋ, nyemaikina iŋes toryamu aŋuna keŋ ŋaŋolei ŋuna alalak, kori kinyaka ŋituŋa Ijipit aŋuna ka aryamun ŋaŋolei ŋace, anerae ikilimok iyes Ekapolon ebe, “Nyiboyosi nabo inaa.”

¹⁷Nyemaikina daŋ erwosit kus toryamu ŋaberu ŋuna alalak, acepaki epedori etau keŋ akibatar. Nabo daŋ, nyemaikina iŋes kirira aŋuna keŋ esilipa ka egolid ŋolo alalan.

¹⁸Ani isiboikinio iŋes lokicoloŋ akipuka, emaikina iŋes toyakar ekitaabo ŋolo igiritae ŋikisila ŋulu kigiryo aŋuna keŋ toyakas ŋisacaradotin ŋulu erae ŋilepi.

¹⁹Idoŋi ekitaabo ŋol neni keŋ, tosyomenene iŋes ŋirwa daadaŋ ŋulu ka akiyar keŋ, ikotere eyenuni akitopoloorit Ekapolon Akuj keŋ, iwuapit ejok ŋikisila ŋul ka ŋakiro ŋuna etubunitoe,

²⁰nyitopoloor bon alokiŋaren ŋituŋa ŋuluce, kori nyeŋer akiwuapit ŋakiciketa ŋuna ke Ekapolon, ikotere nai iŋes ka ŋiletok keŋ ipukaete apaki ŋina aoyan alo Isirael.