Read ngakarimojong Ŋikis. 18 Bible Online

Ŋikis. 18 - ngakarimojong bible

Ŋikis. 18

¹Nyeryamunete ŋisacaradotin ŋulu erae ŋilepi ŋulu arae ŋituŋa a Lepi daadaŋ akwap ŋina eruwor ŋina kec anakwap a Ŋisirael. Epedorete ikes akinyam ŋamuronisya ka ŋainakineta ŋuna etyakakinitae Ekapolon,

²nai nyeryamunete ikes akwap ŋina eruwor ŋina kec lopite ŋolo eryamuniata Ŋisirael ŋuluce; Ekapolon iŋes erae akorakinet kec, lopite ŋolo eikinitor Ekapolon ikes.

³Emaikina ŋisacaradotin toryamut aneni a ŋituŋa a ŋulu eyaunete amuronot ŋina ke emoŋ, kori a emesek ŋinerin lu: Eseket, ŋiŋitiny ka aboi.

⁴Eryamunete ŋisacaradotin aneni a ŋituŋa ŋikinyom ŋulu eŋarenok, epiini ŋolo a ekiŋaren, akimyet ŋina a ekiŋaren ka ŋajul a ŋamesekin ŋuna etubunio ekiŋaren. Emaikina ŋituŋa inakis ikes ŋiboro ŋul;

⁵anerae abu Ekapolon Akuj kus toseu ŋituŋa a ekabila a Lepi alotuŋa a ŋikabilae a Ŋisirael daadaŋ akiwo ka akitiya alokiro ke Ekapolon, iŋes kaapei ka ŋidwe keŋ ŋulusapa ŋikaru ka ŋikaru.

⁶Ani kimyek Elepait etaun kus edio neni sek iboiyo iŋes alo Isirael, todolu nakibois ŋina eseuni Ekapolon (epedori iŋes abunore nen apaki daadaŋ ŋina ecamitor),

⁷epedori iŋes akitiya alokiro ke Ekapolon Akuj keŋ, lopite ŋolo itiyaata ŋikaitotoi keŋ, ŋilepi ŋuluce, ŋulu ewuasi akitiya anakibois a ŋin alokiŋaren Ekapolon.

⁸Emaikina ikes toryamut akimuj ŋina enyamete ŋina eriyan ka ŋina eryamunete ŋilepi ŋuluce, tari daŋ keryamununeete ikes ŋiboro ŋice aneni a ŋituŋa a ŋikalya kec.

⁹Ani idolete iyes nakwap ŋina ikiinit Ekapolon Akuj kus iyes, tocoito nyisisaut ŋiticisyo ŋulu aronok ŋulu eŋeritoe ŋulu itiyaete ŋituŋa a ŋakwapin a ŋun.

¹⁰Nyeryamun alokidiŋ kus ituŋanan ŋini eari lokoku keŋ, kori nakoku keŋ erae amuronot ŋina epeyo, kori nyeyakaun kidiŋ kus ŋimurok, ŋikadwarak ŋakiro, kori ŋikelamak, kori ŋikekukujak,

¹¹kori ŋikecenok, kori ŋulu irworosi ka ŋililae, kori ŋulu iwarito aryamun ŋakiro aneni a ŋikatwak.

¹²Eŋerit Ekapolon ituŋanan daadaŋ ŋini itiyae ŋakiro ŋun. Erae aŋuna etiyaata ŋituŋa a ŋakwapin ŋuna eŋerit Ekapolon, iŋes eritarya Ekapolon ikes alokiŋaren kus.

¹³Emaikina iyes torubakis iwuapito ŋuna a Ekapolon Akuj kus.

¹⁴Tari kiwuapito ŋituŋa ŋulu ilosete iyes akiritar anakwapin kec ŋakiro a ŋikadwarak ŋakiro ka ŋuna a ŋimurok, nai iyes, nyecamit Ekapolon Akuj kus iyes itiyaete ŋakiro ŋun.

¹⁵Ebuni Ekapolon Akuj kus aseun aŋuna kus alotuŋa kus ekadwaran ece ŋolo ikikwaan ka ayoŋ, emaikina iyes kiwuapa ŋakiro a ekadwaran a ŋol.

¹⁶Ŋakiro nu ikes ipotu iyes kiŋita Ekapolon Akuj kus akoloŋit ŋina iponiata iyes tocunakin alomoru Oreb, ŋina ibaakatar iyes, “Ani kikiira nabo iwon etoil ka Akuj a Ekapolon yok, kori kikiŋolik nabo akim ŋina apolon na, ikitwaki iwon.”

¹⁷Abu nai Ekapolon okoboŋok ayoŋ tema, “Iyookinito ikes anakiro aŋuna irworosi.

¹⁸Aseuni ayoŋ alokidiŋ kec ka aŋuna kec ekadwaran ŋolo ikwaan ka iyoŋ; alimokini ayoŋ ekadwaran ŋol ŋakiro kaŋ ka ebuni iŋes alimokin ikes ŋakiro daadaŋ ŋuna alimokini ayoŋ iŋes.

¹⁹Ituŋanan daadaŋ ŋini nyiwuapi ŋakiro ŋuna elimuni ekadwaran alokiro kaŋ, ayoŋ elope esicani iŋes.

²⁰Nai ekadwaran ŋolo irworo alokiro a ŋakujo, kori ŋolo elimuni alokiro kaŋ ŋakiro ŋuna pa alimokinit ayoŋ iŋes akirwor, emaikina ekadwaran ŋol totwan.”

²¹Acepaki itemarete iyes neni kus make, “Ikiyenuni isua ikwaani akirot ŋina nyelimunit Ekapolon?”

²²Ani kirwor ekadwaran alokiro ke Ekapolon nai nyitiyakin, kori nyiyookin ŋuna alimunit iŋes, iŋes atemar nyelimunit Ekapolon akirot ŋin; irworo ekadwaran ŋol ŋakiro ŋuna pa alimokinit ayoŋ iŋes, nyikibul aŋuna a ŋakiro keŋ.