Read ngakarimojong Ŋikis. 19 Bible Online

Ŋikis. 19 - ngakarimojong bible

Ŋikis. 19

¹Ani emunyari Ekapolon Akuj kus ŋituŋa a ŋakwapin aŋuna ikiini iŋes iyes ka kidaut iyes akiritar ikes, ido kiboikinos lotaunio kec ka nakais kec,

²emaikina iyes totyakasi ŋitaunio ŋiuni anakwap a ŋina ikiini Ekapolon Akuj kus iyes aruwor ŋina kus.

³Emaikina iyes kipima akwap, ido totyaka akwap ŋina ikiini Ekapolon iyes aruwor ŋina kus ŋarwa ŋauni eriyan, ikotere ituŋanan ŋini eari ŋinice epedori akisii nakwap ŋin adio lotaun ŋolo atyakaritae.

⁴Erae lu ŋituŋa ŋulu ani keara ituŋanan ŋinice epedorete akisii lotaunio ŋul: Ituŋanan ŋini ebucakin akiar ŋinice nyimanit sek ka aŋorot.

⁵Ani kelot ituŋanan namoni erukito ka ice akiyep ŋakito, ido kikyaa epei aep keŋ ecamit akitel akitoe, tosodi aep toutor anakujuk, todo neni a ŋinice ka toar, epedori ŋolo abucakin akiar ŋoloce akisii lotaunio ŋul epei toiun.

⁶Nai ani kelwana etaun ŋolo epedori iŋes akisii, epedori ekenyaŋan akiwuap iŋes enyunyura tari ŋina eryamunia toar, nai pa amaikina iŋes toarae, anerae pa emanan ikes ka aŋorot.

⁷Aŋun, ekeciki ayoŋ iyes nu: Totyakasi ŋitaunio ŋiuni.

⁸Ani kiyatak Ekapolon Akuj kus akwap kus lopite ŋolo ekoŋitor neni atapapaa kus, ido ikiinak iyes akwap daadaŋ ŋina eikinit iŋes atapapaa kus ainakin iyes,

⁹ani ca kiwuapa iyes ŋakiciketa nu daadaŋ ŋuna ekecik ayoŋ iyes nakoloŋit na: Amina Ekapolon Akuj kus ka akiwuap jwi jwi ŋakiro keŋ, ipedorete nai akiyatakin ŋitaunio ŋice ŋiuni lotaunio ŋuluuni ŋul,

¹⁰ikotere nyebukor anakwap a ŋina ebuni Ekapolon Akuj kus ainakin iyes aruwor ŋina kus, ŋaokot a ituŋanan a ŋini nyesecit, ido toyakaunotor iyes ekaile ŋolo ka akiar ituŋanan.

¹¹Nai ani kimanit ituŋanan ŋinice, ido edapit tari ŋina earya, tosodi tosi lotaun edio a ŋulu edoonokinio a ŋul,

¹²emaikina ŋikasikou ŋulu ke etaun a ŋolo eboiyo ituŋanan ŋini aari ŋinice kiyakiyasi ituŋanan ayaun ekile ŋol alotaun a ŋolo abu iŋes todoki aiun, ido inakinae neni a eyenet a ituŋanan a ŋini abu iŋes toar, ikotere toarae iŋes daŋ.

¹³Nyisyonioto iŋes jik, ikotere ilemarete alo Isirael ekaile ŋolo ka asecit a ŋina ka akiar ituŋanan ŋini pa asecit, ido iboiyete iyes emam ŋace.

¹⁴Nyemaikina iyes kisiyotosi ekukoru a ŋikidunyet kus, ŋolo kiwuakinio ananyameta a ŋuna ŋorok, anakibois a ŋina ikikorakinio iyes anakwap a ŋina ebuni Ekapolon Akuj kus ainakin iyes toruwor ŋina kus.

¹⁵Nyitemokino ŋakiro esuuda epei aŋuna ka atubokinia ituŋanan ŋakiro ŋuna ka aronis a ŋina isitakinitere iŋes, mati kelimut ŋisuudae ŋiarei, kori ŋiuni ŋakiro, iŋes nai enupere atemar esecit, kori nyesecit ituŋanan ŋini isitakinitae.

¹⁶Ani kimanit ituŋanan ŋinice, ido kisitak iŋes a ŋakiro a ŋuna nyiyookino,

¹⁷emaikina ŋul ŋiarei toloto neni ke Ekapolon, towua alokiŋaren ŋisacaradotin ka ŋikatubok ŋakiro ŋulu eyakasi lotic alorwa a ŋul,

¹⁸imimaunete nai ejok ŋikatubok ŋakiro a ŋituŋa a ŋul. Ani kirworit esuuda ŋakiro ŋuna nyiyookino, ŋuna erwor alyokonu itoroniyarit ŋinice,

¹⁹emaikina iyes kitiyata neni a ŋolo esitakinit ŋoloce a ŋakiro aŋuna nyiyookino ŋuna sek acamit iŋes kitiyae neni a ŋolo esitakinit iŋes. Aŋun, ilemarete iyes aronis alokidiŋ kus.

²⁰Iirarete ŋituŋa ŋuluce ŋakiro ŋun ido tobul, ido mam nabo nyitiyaete ŋituŋa aronis ŋina ikoni ŋin alokiŋaren kus.

²¹Nyisyonioto ituŋanan, totacakisi akiyar aŋuna ka akiyar, akoŋu aŋuna ka akoŋu, ekelae aŋuna ke ekelae, akan aŋuna ka akan, akeju aŋuna ka akeju.