Read ngakarimojong Ŋikis. 2 Bible Online

Ŋikis. 2 - ngakarimojong bible

Ŋikis. 2

¹Aponi iwon towotokinae tolotoi naloŋisat lowae ŋolo ka anam a ŋina Areŋan lopite ŋolo akalimokinitor Ekapolon ayoŋ, ido aponi tolotoi ŋirwa ŋulu alalak, ekeeretae emoru Seir.

²Abu nai Ekapolon kirwor neni kaŋ tema,

³“Irimo tokona iyes emoru lo ŋirwa ŋulu alalak, toloto tokona lowae ŋolo alo Kuju,

⁴tolimok ŋituŋa ŋakiro nu, ‘Aapuu iyes akitor nakwap a ŋiyeneta kus, nakwap a ŋiletok a Esau a ŋulu iboiyete alo Seir. Ekuryaketa ikes aŋuna kus, nai tocoito.

⁵Nyitijikis ikes, nyakainakini ayoŋ iyes atutubet adio ŋina a akwap kec, anerae adau ayoŋ ainakin emoru Seir neni a Esa aruwor akwap keŋ.

⁶Togyelutu a ŋisiliŋa aneni kec akimuj ŋina imujete iyes, togyelutu daŋ a ŋisilipae aneni kec ŋakipi ŋuna imasete iyes.

⁷Kire jik, ikiterereŋ Ekapolon Akuj kus iyes anakiro a daadaŋ a ŋuna itiyata iyes, eyeni iŋes alosit kus ŋina ilosyoto iyes analoŋisat na a ŋina apolon nooi. Ŋikaru ŋatomoniomwon lu daadaŋ irukito iyes ka Ekapolon Akuj kus, mam ibore ipotu iyes kicanakin.’ ”

⁸Aŋun aponi iwon kitoroi tolunyaretei aloyeneta yok, aloletok a Esau a ŋulu eboiyete alo Seir. Aponi iwon nyemekin erot ŋolo elosi Araba ka aponi todeparae Elas ka Esion-Geber. Apaki ŋina alosere iwon iwuapitae erot ŋolo ka aloŋisat a ŋina a Moab,

⁹Abu Ekapolon kirwor neni kaŋ tema, “Nyisican ŋituŋa a Moab, kori nyitijik ikes, nyakainakini ayoŋ iyoŋ atutubet adio a akwap kec toruwor ŋina kus, anerae adau ayoŋ ainakin Ar toruwor akwap ŋina a ŋiletok a Lot.”

¹⁰(Koloŋ sek eboiyete a nen Ŋiemim ŋituŋa ŋulu agogoŋok ŋulu alalak nooi, ŋulu aburok tooyak ikwa Ŋianakim.

¹¹Arae ikes ŋituŋa ŋulu aburok tooyak ikwa Ŋianakim, nai anyarito Ŋimoabi ikes Emim.

¹²Nabo daŋ kiboiyete sek Ŋiorim alo Seir, nai apotu ŋiletok a Esau todemasi ikes Seir, tomunyasi Ŋiorim, ido kikamasi akwap kec, lopite ŋolo ekaku aponiata Ŋisirael kikamasi ŋina abu Ekapolon inak ikes toruwor ŋina kec.)

¹³“Toloto tokona kiŋaren, todoka ayonae Sered.” Aŋun, aponi iwon todokae ayonae Sered,

¹⁴ido apaki ŋin, aponi iwon yaarae elosyo ameun alo Kades-Barinea tari ŋina adokere iwon ayonae Sered ŋikaru ŋatomoniuni ka ŋikanikauni, akitodol ŋina atwakyata ŋikajiok a anyamet a ŋin daadaŋ analomar, lopite ŋolo arisyo Ekapolon kikoŋio aŋuna kec.

¹⁵Kire arae Ekapolon elope anapedor keŋ iŋes emanit ikes, acamit alemar ikes analomar tari ŋina atwakyata ikes daadaŋ.

¹⁶Apaki ŋina amunyarotor ŋikajiok daadaŋ alotuŋa,

¹⁷abu Ekapolon kirwor neni kaŋ tema,

¹⁸“Nakoloŋit na ilunyarosi iyes alokukoru a Moab itorete Ar.

¹⁹Ani iapiyarete iyes lokukoru ŋolo a Ŋiamori, nyisicana ikes, kori nyitijikis ikes, nyakainakini ayoŋ iyes akwap a Ŋimoabi toruwor ŋina kus, anerae adau ayoŋ ainakin akwap ŋin neni a ŋiletok a Lot.”

²⁰(Arae sek akwap ŋin daŋ ŋina a Ŋirepaim, kiboiyete koloŋ sek Ŋirepaim a nen, nai anyarito Ŋiamori ikes Samisumim,

²¹arae ikes ŋituŋa ŋulu agogoŋ ka ŋulu alalak nooi tooyak ikwa Ŋianakim. Nai abu Ekapolon tomunya ikes alokiŋaren Ŋiamoni, ikotere edemaryata ikes akwap kec kiboikinos nai ikes nen.

²²Abu Ekapolon kitiya ŋunapei aŋuna a ŋiletok a Esau a ŋulu eboiyete alo Seir, abu tomunya Ŋiorim alokiŋaren kec, ikotere ŋituŋa a Esau edemarete ikes akwap kec kiboikinos ikes nakwap ŋin tari tokona.

²³Apotu Ŋikapitorim ŋulu aponito alo Kapitor tomunyasi Ŋiapim ŋulu aya ŋalomarisinei diyete Gasa, ido kilunyokin akiboi a nen.)

²⁴“Toloto kiŋaren anawosit kus, todoka ayonae Arinon. Toyenutu atemar, adau ayoŋ akipotokin iyes erwosit Sikon Eamorait ŋolo a Esibon kaapei ka akwap keŋ. Togeikisi akikamar akwap keŋ, kitijikisi iŋes.

²⁵Nakoloŋit na, esyakini ayoŋ akiwuakin akuryanu ka ekabule aŋuna kus neni a ŋituŋa a akwap a daadaŋ, ani iirarete ikes ŋakiro kus, emaranikinete ka emini ikes akuryanu aŋuna kus.”

²⁶Abu nai ayoŋ eyakiya ŋituŋa analoŋisat a ŋina a Kedemos neni a erwosit Sikon a ŋolo a Esibon, alimokin iŋes ŋakiro nu ŋuna ke ekisil,

²⁷“Ani kikimyek iyoŋ isua etoro nakwap kon, iwuapyo isua erot bon, nyikirii isua kedyeny, kori teten.

²⁸Egyelyo isua aneni kon akimuj ŋina imujio, egyelyo isua a ŋisiliŋa aneni kon ŋakipi ŋuna emasyo, kimyekinae iyoŋ isua etoro nakwap kon,

²⁹lopite ŋolo aponiata ŋiletok a Esau ŋulu iboiyete alo Seir kitiyaata aŋuna kosi ka lopite ŋolo aponiata Ŋimoabi daŋ ŋulu iboiyete alo Ar kitiyaata, kimyekinae isua olunyar tari ŋina ikidokarya ekekwaye a ŋolol Yorodan olomasi nakwap ŋina ikiinakinit Ekapolon Akuj isua.”

³⁰Nai abu erwosit Sikon nyikicamak isua kitoroi nakwap keŋ, anerae aris Ekapolon Akuj kus kitogogoŋ akou keŋ, inak etau keŋ topeganiar, ikotere Ekapolon ipotokini iŋes neni kus lopite ŋolo etiyakinia tokona.

³¹Kirwor Ekapolon neni kaŋ tema, “Toyenu nu, ageu ayoŋ ainakin Sikon kaapei ka akwap keŋ neni kon. Togeu tokona akikamar akwap keŋ kituruwo ŋina kon.”

³²Aŋun, ani ebuni Sikon akitijikin iwon, abu iŋes bu kaapei ka ŋituŋa keŋ daadaŋ akitijikin iwon alo Yaas,

³³abu Ekapolon Akuj yok kipotu iŋes neni yok; ido aponi iwon toarae iŋes kaapei ka ŋidwe keŋ ka ŋituŋa keŋ daadaŋ.

³⁴Apaki ŋin, aponi iwon kikamarae ŋitaunio keŋ daadaŋ ka alotooma ŋolotaun, aponi iwon tomunyarae ŋikilyok, ŋaberu ka ŋidwe. Nyimyekina iwon ituŋanan keŋ ipei daŋ eyari.

³⁵Aponi iwon toŋatarae ŋaatuk ka ŋiboro daadaŋ ŋulu a ŋitaunio.

³⁶Ameun alo Aroer alokipetot a ayonae Arinon (Kaapei ka etaun ŋolo ayai tooma nayonae) akitodol Gilead, amam akai ŋina kirereet ŋina aoya aŋuna yok. Abu Ekapolon Akuj yok ikiinak iwon ŋinibore daadaŋ.

³⁷Kikote neni daŋ, nyedemara iyes Ŋiamoni akwap kec, ipotu iyes kimyekis akwap daadaŋ ŋina alodiyete ayonae Yabok kaapei ka ŋitaunio ŋulu ka a akwap a ŋina a ŋikamukumukui, lopite ŋolo arisyo Ekapolon Akuj yok kikilimokinia iwon.