Read ngakarimojong Ŋikis. 20 Bible Online

Ŋikis. 20 - ngakarimojong bible

Ŋikis. 20

¹Ani ilosete iyes lojie akitijikin ŋimoe kus, ido kiŋolikis atemar elalak ŋaŋolei kec, ŋagaari kec ŋuna iritae a ŋaŋolei ka ŋasigarya a ŋimoe kus akilo ŋuna kus, nyikuryaketa aŋuna kec, anerae irukito iyes ka Ekapolon Akuj kus ŋolo ikitipeunio iyes anakwap a Ijipit.

²Ani eriŋa iyes nyitijikino ŋimoe kus, tonyarautu esacaradoti bu kiŋaren, kirwor neni a ŋasigarya,

³tolimok ikes ŋakiro nu: “Kiirasi, okoe Ŋisirael! Nakoloŋit na aapuu iyes akitijikin ŋimoe kus. Totitinyoto, kori nyikuryaketa, kori nyikibul, kori nyikera ikes,

⁴anerae Ekapolon Akuj kus iŋes ikiŋarenikini iyes akitijiore ŋimoe kus aŋuna kus ikiinak akiloun ŋimoe kus.”

⁵Irworikinete nai ŋikapolokinitok ŋajiorei tolimokis ŋasigarya temasi, “Eyai mono ne ituŋanan adukoki akai ŋina kitete ŋina eriŋa nyitaleuno a? Ani keyai ituŋanan ŋin ne, emaikina toboŋo kai keŋ, acepaki etwani iŋes alojie, ido kitaleu ituŋanan ice akai keŋ.

⁶Eyai mono ne ituŋanan edupakinit ŋikito a epiini, nai toriŋa nyiira ŋaraito a ŋikito keŋ a? Ani keyai ituŋanan ŋin ne, emaikina toboŋo kai keŋ, acepaki etwani iŋes alojie, ido tonyam ituŋanan ice ŋaraito a epiini keŋ.

⁷Eyai mono ne ituŋanan ŋini etiŋit apese ŋina ecamunit iŋes nai toriŋa nyiita a? Ani keyai ituŋanan ŋin ne, emaikina iŋes toboŋo kai keŋ, acepaki etwani iŋes alojie ido kiit ekile ece apese keŋ.”

⁸Erubakinete ŋikapolokinitok ŋituŋa irworosi neni a ŋituŋa ebasi, “Eyai mono ne ituŋanan ŋini ekuryana, kori nyetitiny a? Emaikina ituŋanan ŋin toboŋo kai keŋ, acepaki itubuli iŋes ŋuluce daŋ”

⁹Ani kedaut ŋikapolokinitok ŋituŋa akirwor neni a ŋasigarya, emaikina nai ikes toseut ŋikarikok a ŋajorei toriko ŋajorei.

¹⁰Ani iyapikinete iyes etaun edio aŋuna ka akitijikin ŋituŋa keŋ, kiŋita mono ikes kecamito ekisil.

¹¹Ani kecamito ikes ekisil, ido nyikitijioto iyes, eruworosi ŋituŋa a etaun a ŋol daadaŋ ŋulu ikitiyanakinete iyes, ŋulu ereikinitae akitiya.

¹²Ani pa kecamut ŋituŋa a etaun a ŋol ekisil, ido ikitijioto iyes, kirikautu etaun ŋol daadaŋ kiryama cib

¹³ka ani ikiinakini iyes Ekapolon Akuj kus etaun ŋol akiloun, emaikina iyes toara alotaun a ŋol ŋisapa daadaŋ.

¹⁴Nai ipedorete iyes akiya ŋaberu kec erae ŋaŋatara kus kaapei ka ŋidwe, ŋibaren ka ibore daadaŋ ŋini eyai lotaun ŋol. Ipedorete iyes akisitiya ikwaŋina ecamitotor ŋituŋa ŋiboro a ŋimoe kus ŋulu adau Ekapolon Akuj kus ainakin iyes.

¹⁵Kitiyata ŋun lotaunio ŋulu alwanak anakwap kus, ŋulu nyerae ŋitaunio a ŋituŋa a ŋakwapin a ŋuna idunyasi ka iyes.

¹⁶Ani eruwor ŋitaunio ŋulu ikiinakini iyes Ekapolon Akuj kus aruwor ŋulu kus, ŋitaunio a ŋituŋa a lu, nyimyekis idiobore ŋini eyari toyar.

¹⁷Emaikina iyes kitoŋopiyasi anakwap ŋituŋa lu: Ŋiitaiti ka Ŋiamori, Ŋikanaani ka Ŋiperisi, Ŋiipi ka Ŋiyebusi. Tomunyasi ikes lopite ŋolo ikicikia Ekapolon Akuj kus iyes akitiya,

¹⁸ikotere nyikitatam ikes iyes akitiya ŋiticisyo ŋulu aronok ŋulu itiyaeneneete ikes aŋuna a ŋakujo kec, ido toseca iyes aneni ke Ekapolon Akuj kus.

¹⁹Ani kirikaut iyes etaun edio icamito akitijikin iŋes aŋuna ka akikamar, ido yaa apaki ŋina aoyan irikaunito, tocoito iyeparete ŋikito. Tari kinyama iyes ŋaraito alokito a ŋul tocoito iyepakinete ikes kwap. Erae mono ŋikito ŋituŋa irikaunito iyes ikes a?

²⁰Nai ipedorete iyes amunaar ŋikito ŋulu iyenete iyes atemar nyenyamyo, ipedorete akiyep ikes aŋuna ka agolyo ŋimoe alotuŋa a ŋulu itijiete iyes tari ŋina ikamaryata iyes iŋes.