Read ngakarimojong Ŋikis. 21 Bible Online

Ŋikis. 21 - ngakarimojong bible

Ŋikis. 21

¹Anakwap a ŋina ikiini iyes Ekapolon Akuj kus aruwor ŋina kus, ani keryamun ituŋanan etwanikinit nariet nai nyeyenio ituŋanan ŋini keari,

²epote ŋikasikou kus ka ŋikatubok ŋakiro kus kipima alwanis ameun aneni eperyo ikatwan tari ŋolotaun eyai diyete ikatwan.

³Ani eryamunio etaun ŋolo eapikinit nooi neni eperyo ikatwan, elemunete ŋikasikou a etaun a ŋol ibarasit ŋini emam nyitiyat etic edio, ŋini nyitanapa ayokot,

⁴eayete ŋikasikou ŋul ibarasit ŋin totiyaarotor nayonae ŋina eleleata ŋakipi, ŋina eyai nakadipaalat ŋina nyitatae, kori nyedupitae ibore idio, tosodi tomojira emosiriŋ a ibarasit a nen toara.

⁵Epote nai ŋisacaradotin, ŋidwe a Lepi ŋulusapa kiŋaren, anerae aseu Ekapolon Akuj kus ikes akitiya aŋuna keŋ ka akiterereŋ alokiro ke Ekapolon ta akitub ŋakiro a ŋiburasinei a daadaŋ ka a ŋijiesyo a daadaŋ.

⁶Ilotakinete nai ŋikasikou a etaun a ŋolo eapi aneni aperyo ikatwan ŋakan kec kidiama ibarasit ŋini aaryo anakadipaalat,

⁷ido temasi, “Meere isua ikiari ituŋanan en, nyiŋolikina isua tari earyo iŋes.

⁸Okoe Ekapolon, kisyoni ŋituŋa kon Ŋisirael ŋulu ibu iyoŋ tolaku, kiurya ekaile aŋuna ka atwanare a ituŋanan a ŋin pa asecit a ŋin nyerubak eyai lotuŋa kon Ŋisirael.” Tosodi isyoni ikes aŋuna ka atwanare a ituŋanan a ŋin.

⁹Aŋun, ilemarete iyes alokidiŋ kus ekaile aŋuna ka atwanare a ituŋanan a ŋini nyesecit, anerae emaikina iyes kitiyata ŋuna iyookino alokiŋaren Ekapolon.

¹⁰Ani kiloto iyes akitijikin ŋimoe kus, tosodi ikiinak Ekapolon iyes kilout ikes, kikamasi iyes ikes erae ŋirikon,

¹¹ido kiŋolik idio kus alokidiŋ ŋituŋa ŋulu erikitoe aberu ŋina ebusan ŋina ikinirari ka kiitan iyoŋ akiit,

¹²ya iŋes lore keŋ, emaikina aberu ŋin tobanya ŋitim keŋ, tokula ŋimeeger keŋ,

¹³tolaca ŋilowi ŋulu sek anapit iŋes ikamunio, emaikina iŋes torubak iboi alokai a ekile a ŋolo arikuni iŋes akitodol elap epei igworo aŋuna a papa keŋ ka toto keŋ, ani edaun ŋun, epedori ekile ŋol akituruwor iŋes aberu keŋ, ido eruwor iŋes lokile a aberu a ŋin.

¹⁴Nai ani pa kelakara ekile ŋol aŋuna ka aberu a ŋin, emaikina iŋes kimyek aberu ŋin tolot neni daadaŋ ecamit alosit, nai nyegyela iŋes losiliŋa. Nyemaikina iŋes kisitiya aberu ŋin esibit apito, anerae abu iŋes kituruwo aberu ŋin ŋina keŋ.

¹⁵Ani keyakar ekile ŋaberu ŋaarei, tomina apei, nai nyemina ŋinace ka ani kidounito daadaŋ ŋidwe ŋulusapa, ido torae ikoku a aberu a ŋina nyeminae iŋes erae ikiyae,

¹⁶ani edoli apaki ŋina ecamitor iŋes ainakin ŋiboro keŋ neni a ŋidwe keŋ kiruma, Nyemaikina iŋes kituruwo lokoku a aberu keŋ a ŋina emina iŋes ekiyae adepar lokoku ka aberu a ŋina nyemina iŋes ŋolo erae ekiyae.

¹⁷Emaikina iŋes tocamu ikwapei ikoku ŋini kiyae lokoku ka aberu a ŋina nyemina iŋes, ido inak iŋes ŋiboro ŋulu elalak nooi ŋulu edeparito ŋiboro ŋulu eryamuni lokoku a aberu a ŋina emina iŋes, anerae erae iŋes ikoku ŋini esyauni ekile ŋol auruun. Ikiyae iŋes emaikina kituruworoe ikiyae.

¹⁸Ani keyakar ituŋanan ikoku ŋini esyaan ka ŋini eŋerono, ŋini nyiwuapit ŋakiro a papa keŋ ka toto keŋ, ŋini nyecamit ŋuna itatamete ŋikauruunak keŋ iŋes,

¹⁹emaikina ŋikauruunak ŋul kikamut ikoku ŋin yaasi iŋes kiŋa neni a ŋikasikou a etaun kec alopuke a etaun a ŋol.

²⁰Elimokinete ikes ŋikasikou a etaun kec ebe, “Isyaana ikoku kosi en ka eŋerono daŋ. Nyiwuapit iŋes ŋakiro kosi. Edakana iŋes ka emerana daŋ.”

²¹Ecakete nai ŋikilyok a etaun a ŋol iŋes a ŋamoru totwan. Aŋun, ilemarete iyes aronis alokidiŋ kus, ido iirarete Ŋisirael daadaŋ ŋakiro ŋun, tobul.

²²Ani kesec ituŋanan asecit ŋina emaikina totubokinere iŋes atwanare, ido toarae iŋes, kinenekinoe lokitoe

²³nyemaikina kimyekinae akuwan keŋ ineno alokitoe akuwar kia, emaikina iyes tonuka iŋes akoloŋit ŋinapei earere iŋes, anerae ituŋanan ŋini inenekinio lokitoe, ilamit Akuj iŋes. Nyemaikina iyes tomunaasi akwap ŋina ikiinit Ekapolon Akuj kus iyes aruwor ŋina kus.