Read ngakarimojong Ŋikis. 25 Bible Online

Ŋikis. 25 - ngakarimojong bible

Ŋikis. 25

¹Ani kiburakinosi ŋituŋa ŋiarei, toŋoikinos, ido yaasi ŋakiro kec loikiiko totubo ŋikatubok ŋakiro kec, tolimut atemar iyookinit ipei nai nyiyookinit ŋinice,

²ani kemaikina todaae ŋini nyiyookino ŋakiro keŋ, emaikina ekatubon ŋakiro tolimok ituŋanan ŋin toper alokwap, ido todaae iŋes alokiŋaren ituŋanan ŋini eburato ka iŋes, toramae iŋes ŋaramet ŋuna etubunitoe aŋuna ka aronis a ŋina itiyat iŋes.

³Eramyo ituŋanan ŋaramet ŋatomoniomwon bon, meere ŋuna edeparito ŋun, ani kerami ituŋanan ŋaramet ŋuna edeparito ŋatomoniomwon, eruwor ikidunyet kus ŋini nyejok iŋolikinete iyes.

⁴Nyiena akituk a emoŋ apaki ŋina isitiyata iyes aramya ŋikinyom.

⁵Ani kiboiyete ŋikaitotoi kaapei, ido totwana epei emam ikoku ŋinisapat, nyemaikina aberu keŋ kirum ekile ŋolo nyerae eyenet alokile keŋ a ŋolo atwani. Irumi lokaato a lokile keŋ aberu ŋin toruwor aberu keŋ, kitiya neni a aberu a ŋin ŋiticisyo daadaŋ ikwapei ekile keŋ.

⁶Ikoku ŋinisapat ŋini a ekiŋaren ŋini euruunete ikes, elimokinio ekiro a ekile a ŋolo sek atwani, ikotere nyeŋopiya ekiro a ekile a ŋol alo Isirael.

⁷Nai ani pa kecamit ekile ŋol akirum aberu alokaato keŋ a ŋolo abu totwan, elosi apuserut ŋin neni a ŋikasikou, lopuke ŋolo ke etaun, tolimok ikes tema, “Ewounit lokaato a ekile kaŋ akiturubakin ekiro alokaato keŋ eyai Isirael, nyecamit iŋes akirum ayoŋ.”

⁸Enyaraunete nai ŋikasikou lokaato keŋ a ekile a ŋolo abu totwan, ido kirworo neni keŋ. Ani kerubaki eŋerit ebala, “Nyacamit ayoŋ akiya iŋes toruwor aberu kaŋ,”

⁹elosi nai apuserut ŋin neni alokaato alokile keŋ iteete ŋikasikou, tolacu amukat a ekile a ŋol apei, kimwaak ŋakimul loreet a ekile a ŋol, ido tolimu tema, “Ŋun itiyakinio neni a ekile a ŋolo nyecamit akiturubakin ekal alokaato keŋ eyai.”

¹⁰Alo Isirael a daadaŋ enyarao ekal ŋol ebe, “Ekal a ekile a ŋolo aponi tolacarae amukat.”

¹¹Ani kejikinosi ŋikilyok ŋiarei, ido bu aberu a epei akiŋarakin lokile keŋ nyewani, ido toporok aberu ŋin ekile ŋol kikamu ekulyakane keŋ,

¹²emaikina iyes totubosi akan a aberu a ŋin. Nyemaikina iyes kisyonioto iŋes.

¹³Nyimodyanakinete ŋituŋa a ŋakipimeta a ŋaarei, ŋina eook ka topot ŋinace.

¹⁴Nyiyakatar ŋakipimeta ŋaarei nakais kus apei ŋina edit ka topol ŋinace.

¹⁵Emaikina iyes toyakatar akipimet apei bon ŋina ileleba ŋina ipimi ejok, toyakatar akipimet ŋina ipimi ibore ŋini itemokino, ikotere elalaketa ŋirwa ka akiyar kus anakwap a ŋina ikiinakini Ekapolon Akuj kus iyes,

¹⁶anerae ŋulu daadaŋ itiyaete ŋakiro ŋuna ka amodiyo, eŋerit Ekapolon Akuj kus ikes.

¹⁷Totamunito ŋuna abu Amelek kitiya neni kus apaki ŋina iwotuniata iyes alo Ijipit,

¹⁸epite ŋolo ikitijikinio iŋes iyes alorot apaki ŋina ikiupitor iyes ka ikibulitor iyes, abu iŋes toar daadaŋ ŋulu asaunito alokaku kus, abu iŋes nyitopoloo Akuj.

¹⁹Aŋun, ani kedau Ekapolon Akuj kus akisieŋun iyes alomoe kus a daadaŋ ka alowaetin kus a daadaŋ, anakwap a ŋina ebuni Ekapolon Akuj kus ainakin iyes aruwor ŋina kus, tomunyasi ŋituŋa daadaŋ ŋulu ka Amelek anakwap, nyetamun ikes nabo jik; nyikimuryak akitiya ŋun.