Read ngakarimojong Ŋikis. 27 Bible Online

Ŋikis. 27 - ngakarimojong bible

Ŋikis. 27

¹Apotu Moses ka ŋikasikou a Ŋisirael kirworo neni a ŋituŋa. Kirwor Moses tema, “Kiwuapa ŋakiciketa daadaŋ ŋuna adau ayoŋ akicik iyes akiwuap nakoloŋit na.

²Akoloŋit ŋina idokariata iyes ekekwaye Yorodan, ido tolomasi nakwap ŋina ikiinit iyes Ekapolon Akuj kus, emaikina iyes tosipokis ŋamoru ŋuna aburok, kilelyakis esimit.

³Kigirakis kidiama kec ŋakiro daadaŋ ŋuna a ŋikisila a lu, kidaut iyes adokar ekekwaye alomar nakwap ŋina ikiinit Ekapolon Akuj kus iyes, nakwap ŋina eleleata ŋakile ka ao, lopite ŋolo ikiikinia iyes Ekapolon Akuj atapapaa kus.

⁴Aŋun, ani idokarete iyes ekekwaye Yorodan, tosipokisi ŋamoru ŋun ŋuna ekecik ayoŋ iyes nakoloŋit na lomoru Ebal ka kilelyakis ikes a esimit.

⁵Emaikina iyes todukokis Namuroet nen ŋina ke Ekapolon Akuj kus, todukokisi Namuroet ŋina nyicietae a ibore a idio a ŋini itiyaunitae a asuwat.

⁶Emaikina iyes todukokis Namuroet ŋina ke Ekapolon Akuj kus a ŋamoru a ŋuna nyicietae. Ekaku inakis a nen ŋainakineta ŋuna epeyo neni ke Ekapolon Akuj kus.

⁷inakisi ŋamuronisya ŋuna ke ekisil ka tonyama ikes a nen ilelyanete alokiŋaren Ekapolon Akuj kus.

⁸Emaikina iyes kigirakis namoru ŋun ŋakiro daadaŋ ŋuna a ŋikisila a ŋulu ke Ekapolon ileerete.”

⁹Ekaku a ŋun, kirworo Moses ka ŋisacaradotin ŋulu arae ŋilepi neni a Ŋisirael a daadaŋ temasi, “Kililiŋa, okoe Ŋisirael, kiirasi! Akoloŋit napei na, idaut iyes aruwor ŋituŋa ŋulu ke Ekapolon Akuj kus.

¹⁰Aŋun, kiwuapa ŋakiro a Ekapolon Akuj kus, kiwuapa ŋakiciketa keŋ ka ŋakiro ŋuna etubunit iŋes ŋuna ekecik ayoŋ iyes nakoloŋit na akiwuap.”

¹¹Akoloŋit ŋinapei tolimok Moses ŋituŋa tema,

¹²“Ani idokarete iyes ekekwaye Yorodan, ewoete ŋituŋa a ŋikabilae a lu alomoru Gerisim apaki ŋina iterereŋere ŋituŋa: Simeon, Lepi, Yuda, Isakar, Yosepu ka Benjamin.

¹³Ewoete ŋituŋa a ŋikabilae a lu alomoru Ebal apaki ŋina ilamere ŋituŋa: Ruben, Gad, Aser, Sebulon, Dan ka Naputali.

¹⁴Elimokinete nai ŋilepi Ŋisirael daadaŋ ŋakiro nu ikeunito:

¹⁵‘Ilamam ituŋanan daadaŋ ŋini itiyauni etorube a akuj, kori etorube edio ca daadaŋ, kori ibore ca daadaŋ ŋini eŋerit Ekapolon, ibore ŋini icieunitae, ido kilip neni keŋ anakimunono.’ Eboŋokinete ŋituŋa daadaŋ temasi, ‘Kiyookin ŋun.’

¹⁶“‘Ilamam ituŋanan daadaŋ ŋini nyitopoloorit papa keŋ ka toto keŋ’ Eboŋokinete ŋituŋa daadaŋ temasi, ‘Kiyookin ŋun.’

¹⁷“‘Ilamam ituŋanan daadaŋ ŋini isiyotokini ekukoru a ikidunyet keŋ.’ Eboŋokinete ŋituŋa daadaŋ temasi, ‘Kiyookin ŋun.’

¹⁸“‘Ilamam ituŋanan daadaŋ ŋini itooliyori emuduki alorot.’ Eboŋokinete ŋituŋa daadaŋ temasi, ‘Kiyookin ŋun.’

¹⁹“‘Ilamam ituŋanan daadaŋ ŋini nyetubi anakiyookino ŋakiro a igelaanot, a ikoki ka apuserut.’ “Eboŋokinete ŋituŋa daadaŋ temasi, ‘Kiyookin ŋun.’

²⁰“‘Ilamam ituŋanan daadaŋ ŋini ituruwori aberu a papa keŋ ŋina keŋ, anerae ŋun ajamuwar papa keŋ.’ “Eboŋokinete nai ŋituŋa ŋuluce temasi, ‘Kiyookin ŋun.’

²¹“‘Ilamam ituŋanan daadaŋ ŋini iryamakin a etyaŋ, kori ka ibarasit.’ Eboŋokinete ŋituŋa daadaŋ temasi, ‘Kiyookin ŋun.’

²²“‘Ilamam ituŋanan daadaŋ ŋini ituruwori nakaato keŋ aberu keŋ, kori nakaapa keŋ, kori nakaato keŋ ŋina euruunit ekile ece.’ Eboŋokinete nai ŋituŋa daadaŋ temasi, ‘Kiyookin ŋun.’

²³“‘Ilamam ituŋanan daadaŋ ŋini ituruwori akamuran keŋ aberu keŋ.’ Eboŋokinete nai ŋituŋa daadaŋ temasi, ‘Kiyookin ŋun.’

²⁴“‘Ilamam ituŋanan daadaŋ ŋini eari ikidunyet keŋ anakimunono.’ Eboŋokinete ŋituŋa daadaŋ temasi, ‘Kiyookin ŋun.’

²⁵“‘Ilamam ituŋanan daadaŋ ŋini ijaari akaluŋuluŋut aarya ituŋanan ŋini emam ibore esecit.’ “Eboŋokinete nai ŋituŋa daadaŋ temasi, ‘Kiyookin ŋun.’

²⁶“‘Ilamam ituŋanan daadaŋ ŋini nyitopoloorit ŋakiro ŋuna a ŋikisila a lu aŋuna nyiwuapitor ikes.’ “Eboŋokinete ŋituŋa daadaŋ temasi, ‘Kiyookin ŋun.’ ”