Read ngakarimojong Ŋikis. 3 Bible Online

Ŋikis. 3 - ngakarimojong bible

Ŋikis. 3

¹Apaki ŋina ikitipeyorya iwon emetae erot ŋolo eteni Basan, abu erwosit Og ŋolo a Basan bu akitijikin iwon, abu iŋes bu kaapei ka ŋituŋa keŋ daadaŋ akitijikin iwon alo Ederei.

²Kirwor Ekapolon neni kaŋ tema, “Nyikuryaniar aŋuna keŋ, anerae adau ayoŋ akipotokin iŋes neni kon kaapei ka ŋituŋa keŋ ta akwap keŋ. Kitiya neni keŋ lopite ŋolo ibunio iyoŋ kitiyaa neni a erwosit Sikon a ŋolo a Ŋiamori a ŋolo epukat alo Esibon.”

³Aŋun, abu Ekapolon Akuj yok ikipotok iwon erwosit Og ŋolo a Basan daŋ kaapei ka ŋituŋa keŋ daadaŋ. Aponi iwon toarae iŋes tari ŋina adaunor ituŋanan ipei daŋ ŋini abu kidoŋ.

⁴Apaki ŋin aponi iwon kikamarae ŋitaunio keŋ daadaŋ a mam aduketait ŋinakirereet ŋina aponi iwon nyikamar aneni kec. Aponi iwon kikamarae ŋitaunio ŋatomonikanikapei, akwap daadaŋ ŋina ka Arigob ka akwap ŋina epukat Og alo Basan daadaŋ.

⁵Arae ŋul daadaŋ ŋitaunio ŋulu adukitoe ŋaduketa ŋunajiet ka awuatae a ŋarwatatain ŋuna aoyak, ayakatar ŋipukei ŋulu agolyo a ŋigolyata a ŋiarei ka ŋasuwa ŋuna elorere ŋipukei, aponi daŋ iwon kikamarae ŋirerya ŋulu alalak.

⁶Tosodi, aponi iwon tomunyarae ikes jik, lopite ŋolo etiyatere neni a erwosit Sikon a ŋolo a Esibon, aponi iwon tomunyarae alotooma ŋolotaun, ŋikilyok, ŋaberu ka ŋidwe.

⁷Nai ŋibaren daadaŋ ka ŋiboro daadaŋ ŋulu aya lotaunio ŋul, aponi iwon toŋatarae aŋuna yok.

⁸Aŋun, aponi iwon apaki ŋin todemunae aneni a ŋirwosi a ŋuluarei a ŋulu a Ŋiamori akwap ŋina alokekwaye Yorodan, ageun anayonae a ŋina ka Arinon tari Moru Erimon.

⁹(Enyarito ŋisidoniani Erimon Sirion, tonyarito Ŋiamori iŋes Senir).

¹⁰Aponi iwon todemunae ikes ŋitaunio daadaŋ ŋulu ka akwap a ŋina amamu neni amukur, akwap a Gilead daadaŋ ka Basan daadaŋ tari Saleka ka Ederei, ŋitaunio a Basan a akwap a ŋina epukat Og.

¹¹(Erwosit Og bon edoŋit eyari aneni a Ŋirepaim. Ŋuna ileerete ikes nu, tari tokona eyai ekitaada keŋ ŋolo etiyaunitae a ŋasuwa Raba lotaun ŋolo a Ŋiamoni. Erae aoyau ke ekitaada keŋ ŋimitae ŋiomwon ka erae alalau keŋ ŋimitae ŋiarei.)

¹²Ani eruwor akwap ŋina aponi iwon kikamarae apaki ŋin, abu ayoŋ oinak ŋituŋa a ekabila a Ruben ka ŋulu a ekabila a Gad akwap ŋina alo Kuju Areor, iŋes akwap ŋina alodiyete ayonae Arinon, abu daŋ oinak ikes atutubet apei a akwap a ŋina a ŋikamukumukui a ŋina a Gilead kaapei ka ŋitaunio a akwap a ŋin.

¹³Tosodi abu oinak atutubet apei ŋina a ekabila a Manase akwap a Gilead nenice daadaŋ ka Basan daadaŋ, akwap ŋina sek epukat Og. (Akwap ŋina ka Arigob daadaŋ anakwap a Basan arae koloŋ sek akwap a Ŋirepaim.

¹⁴Abu Yair lopapait a Manase toryamu akwap ŋina ka Arigob daadaŋ tari lokukorin a Ŋigesuri ka Ŋimaakasi, tonyara Yair akwap ŋin a ekiro keŋ, aŋun, tari tokona enyaritae Basan Apos-Yair.)

¹⁵Abu ayoŋ oinak neni a Makir akwap a Gilead

¹⁶ka abu oinak neni a Ŋirubeni ka Ŋigadi akwap ŋina a Gilead akitodol nayonae Arinon, torae kidiŋ ayonae ekukoru kec, adolit akwap kec nayonae Yabok, ayonae iŋes arae ekukoru kec ka Ŋiamoni;

¹⁷akwap kec iŋes Araba daŋ kaapei ka Yorodan ta ŋikipetetyo keŋ ameun alo Kineres [1] totiyaar Nanam ŋina ka Araba, Nanam ŋina Atwan ta nadipoe a Pisiga alowae a ŋolo alo Kide.

¹⁸Apaki ŋin, abu ayoŋ ekecik iyes otema, “Tari daŋ kikiinit iyes Ekapolon Akuj kus akwap ŋin toruwor ŋina kus, emaikina ŋasigarya kus totuboros ekekwaye Yorodan etiŋito ŋiboro ŋulu ke ejie, kiŋarenikis ŋiyeneta kus Ŋisirael ŋuluce.

¹⁹Ŋaberu kus bon ka ŋidwe kus ta ŋibaren kus idoŋete lotaunio ŋulu adau ayoŋ ainakin iyes, ayeni ayoŋ atemar iyakatar iyes ŋibaren ŋulu alalak.

²⁰Ani isieŋuni Ekapolon ŋiyeneta kus ka toryamut ikes daŋ akwap ŋina eruwor ŋina kec ikwapei iyes, akwap ŋina einakini Ekapolon ikes alokekwaye Yorodan, epedori ŋinituŋanan kus aboŋun nakwap ŋina adau ayoŋ ainakin iyes.”

²¹Abu nabo ayoŋ ecik Yosua daŋ apaki ŋin otema, “Idau iyoŋ elope akiŋolikin ŋakiro daadaŋ ŋuna adau Ekapolon Akuj kon akitiya neni a ŋirwosi a ŋuluarei, aŋun, itiyakini Ekapolon ŋunapei neni a ŋapukasinei aŋuna eapi iyes alomar.

²²Nyikuryaniar aŋuna kec, anerae Ekapolon Akuj kon iŋes eji aŋuna kon.”

²³Apaki daŋ ŋin abu ayoŋ odyek Ekapolon otema,

²⁴“Okoe Ekapolon Akuj, isyak iyoŋ akitoodikin ayoŋ eketiyan kon apolou ka apedor kon. Akuj ani ŋina alokidiama, kori alokwap epedori akitiya ŋiticisyo ŋulu ka apedor a ŋina apolon lopite ŋolo itiyaa iyoŋ?

²⁵Kimyekinae ayoŋ otubor ekekwaye eŋolik akwap ŋina ajokan ŋina alokekwaye Yorodan, akwap ŋina ajokan ŋin ŋina a ŋikamukumukui ka Lebanon.”

²⁶Nai abu Ekapolon okoŋoik ayoŋ aŋuna kus, ido towou apupokin ŋakiro kaŋ. Kirwor Ekapolon neni kaŋ tema, “Akaupa ayoŋ ŋakiro kon! Nyirwor neni kaŋ ŋakiro ŋun nabo!

²⁷Tolot kidiama emoru Pisiga, kiŋoliya aina lowaetin kon daadaŋ, To, Kuju, Kwap ka Kide. Kiŋolik ŋiwaetin ŋul ejok, anerae nyitubor iyoŋ ekekwaye Yorodan.

²⁸Nai kicik Yosua, kisimukek iŋes ka kitogogoŋ etau keŋ, anerae iŋes etubor ekekwaye iŋarenikinit ŋituŋa lu, iŋes eryamikini ikes akwap ŋina ibuni iyoŋ akiŋolikin.”

²⁹Aŋun, aponi isua kiboi anakadipaalat a ŋina eteosi ka Bes-Peor.