Read ngakarimojong Ŋikis. 32 Bible Online

Ŋikis. 32 - ngakarimojong bible

Ŋikis. 32

¹Okoe kidiama, topupok, ido erwor ayoŋ, okoe akwap kiira ŋakiro ŋuna erworo ayoŋ.

²Elipi ayoŋ pena ŋakiro kaŋ lotuŋa lopite ŋolo ilimya akiru, pena lotai a ŋituŋa lopite ŋolo epeniata ŋakopi lonya, lopite ŋolo edoo elimilim lonya lopite ŋolo edoo elimilim lonya ŋulu alibunak;

³anerae eserae ayoŋ ekiro ŋolo ke Ekapolon, kitopoloosi iyes Akuj yok.

⁴Erae Akuj agogoŋu, ejok etic keŋ ka iyookino ŋakiro keŋ. Erae iŋes Akuj ŋina ikinyoma nyemodiyana, iyookino iŋes ka itiyae ŋuna iyookino.

⁵Nai etiyata ŋidwe keŋ ŋulu esyaak ŋuna nyejokak neni keŋ, erae ikes anyamet ŋina aronon ka ŋina enyasan.

⁶Okoe ŋituŋa ŋulu emam aosou, epite mono ŋol itiyaata iyes neni a Ekapolon a? Meere mono iŋes papa kus ŋolo ikisubuni iyes, ŋolo ikituruwori iyes ŋituŋa ka apei akwap a?

⁷Totamutu ŋirwa ŋulukoloŋ, totamatamata ŋuna a ŋikaru a ŋulu alunyarosi, kiŋit ŋinituŋanan papa keŋ kiteyenik iŋes, kiŋita ŋikasikou kus ikilimokinete ikes iyes.

⁸Apaki ŋina akorya Akuj ŋina alokidiama nooi akwap a Ŋisirael, apaki ŋina atyakatyakaa iŋes Ŋisirael, abu kiwuak ŋikukorin a ŋakwapin a Ŋisirael iwuapit ekimar a ŋidwe a ŋulusapa a ŋulu a Isirael.

⁹Erae ŋituŋa a Isirael ŋulu keŋ, eturuwo iŋes ŋiletok a Yakob ŋulu keŋ.

¹⁰Abu kitan ikes analoŋisat a ŋina asilon ka a ŋinacaryoit, abu toiu ikes ka kidar ikes, lopite ŋolo iyokitor iŋes ecopot a akoŋu keŋ.

¹¹Ikwaŋina irimirimokinia egole akai keŋ epori alokidiama ŋicwi keŋ; apaki ŋina epetarya iŋes ŋabebenuk keŋ todaka ikes kidiama igaŋit ikes a ŋabebenuk keŋ.

¹²Ikoŋinapei, abu Ekapolon kiyok Ŋisirael, mam akuj ace ŋinagela ŋina abu kiŋarak ikes.

¹³Abu Ekapolon inak ikes kipukata anakibois a ŋina aoyan, kitanu ikes a ŋikinyom a ŋimanikorin, kitopolou ikes a ao a ŋina ayai natabab ka a akimyet a ŋina a ayai natabab ŋuna idokok.

¹⁴Abu Ekapolon kitanu Ŋisirael a elabo a ŋakile a ŋaatuk ka a ŋakile a ŋuna a ŋakinei, a asepwae a ŋikaalei a ŋulumesekin ka a ŋina a ŋimesekin, a ŋimoŋin ka a ŋikora a akwap a Basan ka a ŋakirya a ŋaganoi a ŋuna ajokak, ido ipotu iyes tomata epiini ŋolo ajokan ŋolo acuunio anaraito a epiini.

¹⁵Apotu ŋituŋa a Yakob kimuja kimwoko, totum Yesurum tobolyak, ipotu iyes totuma, tomalimala ka toburyoto. Apotu Ŋisirael toŋero Akuj kec ŋina asubuni ikes. tojamuwasi akaiunan kec ŋina etiron.

¹⁶Inakis iŋes tolilik ŋakujo ŋunagelae, kitoŋoa iŋes a ŋakiro a ŋuna eŋerit iŋes.

¹⁷Apotu ikes inanakis ŋamuronisya neni a ŋipyan meere neni ka Akuj, neni a ŋakujo a ŋuna sek pa ayenunito, neni a ŋakujo a ŋunakitet a ŋuna ariŋa eyaunio neni kec, ŋakujo ŋuna pa etopoloorito atapapaa kus.

¹⁸Ipotu iyes nyimitakis Akuj ŋina erae papa kus, abu ikimuryak iyes Akuj ŋina ikisubuni iyes.

¹⁹Abu Ekapolon kiŋolik ŋakiro ŋun, ido tolili, toŋer ŋidwe keŋ ŋulusapa ka ŋulupesur.

²⁰Kirwor tema, “Ewuai ayoŋ ereet kaŋ aneni kec, eteuni ayoŋ eŋolik epite ŋolo emunyarotor ikes, anerae erae ikes anyamet ŋina aronon, ŋidwe ŋulu emam akikinyoma.

²¹Apotu ikes eketililikis ayoŋ ibore ŋini nyerae akuj, eketoŋoa ayoŋ a ŋitorubei kec a ŋulu a ŋakujo. Aŋun, ainakini ayoŋ ikes tolilikis ibore ŋini nyerae ituŋanan, kitoŋoa ŋituŋa ŋulu abaŋaaka ikes.

²²Enokuni aŋoit kaŋ esibit akim, todol aŋoit kaŋ tari nakibois a ŋikatwak, emwana esibit akim emunyari aŋoit kaŋ akwap ka ibore daadaŋ ŋini eyai nakwap edoli aŋoit kaŋ tari nakisyakinet a ŋimoru.

²³“Atokokini ayoŋ ŋican neni kec, agumakini ayoŋ ikes ŋikaleŋeleŋe kaŋ daadaŋ,

²⁴ididiyari akoro ikes, emunyarete ŋidekesyo ŋulu aryabak ikes. Eyakikini ayoŋ ikes ŋityaŋ ŋulu anyamak ŋituŋa, eyakikini ayoŋ ikes ŋimuno ŋulu aarak.

²⁵Emunyari ekileŋ ŋituŋa alorotin a ŋitaunio, eyakaun ekabule lorerya, earyo ŋisorok ka ŋasorok kaapei, earyo ŋiŋwea ka ŋituŋa ŋulu emojoŋito.

²⁶Abu ayoŋ otamu akielar ikes ekisa ikes anatameta a ŋituŋa,

²⁷nai abu ayoŋ nyacamak kiturokinos ŋimoe, anerae acepaki etemarete ikes, ‘Eloun isua ikes, meere Ekapolon etiyae ŋun.’

²⁸“Erae ikes ŋituŋa ŋulu emam aosou, mam ayenut eyakatar ikes.

²⁹Ani kerae toosok ikes, keyenunito ŋakiro ŋun, keyenunito ŋuna itiyakinosi neni kec ekaku.

³⁰Ikokini ituŋanan ipei ilouni ŋituŋa aliput ai? Ikokinete ŋituŋa ŋiarei ebwaŋete ŋituŋa ŋalipyo ka ŋalipyo ai? Mati ejalit ikes ekaiunan kec, mati ipotorit ikes Ekapolon kec.

³¹Kire nyikwaan ekaiunan kec ka ŋolo yok, ebaŋaaka ŋimoe yok.

³²Eyaunitae ŋakito a epiini kec alokito a epiini a ŋulu alo Sodoma, alomanikorin a ŋikito a epiini a ŋulu alo Gomora, erae ŋaraito a epiini kec ŋaraito ŋuna ikiarete inyami, edwarak ŋitunene a ŋaraito kec,

³³ikwaan epiini kec ka akisorit a emun, ikwaan ka akisorit a akipom.

³⁴Nyedyasit mono ayoŋ ŋakiro ŋun ka nyeyakasi lotau kaŋ a?

³⁵Erae akinyaŋanar ŋina kaŋ ka ayoŋ esicani ikes apaki ŋina eseciata, anerae eapi akoloŋit ŋina a ŋican kec, edoluni amunyaro kec atipei.

³⁶“Kire jik, ituruwori Ekapolon ŋituŋa keŋ ŋulu iyookino, isyoni Ekapolon ŋiketiyak keŋ apaki ŋina eyenunia iŋes atemar adaun agogoŋu kec, ŋina idoŋioto ŋulu eenitae ka ŋulu nyeenitae.

³⁷Etemari nai iŋes neni kec, ‘Ai eya ŋakujo kus, ai eya ŋakujo ŋuna sek arae ŋakaiunak kus,

³⁸ŋuna sek anyamete asepwae a ŋamuronisya kus ka amasete epiini ŋolo ibukonokinete iyes namuroeta kus? Kimyekisi ikes potu ikiŋarakis iyes, kimyekisi ikes ikiuryasi iyes!’

³⁹Toyenutu tokona atemar ayoŋ arae Akuj, emam Akuj ace mati ayoŋ, aari ayoŋ ka eteyari, awani ayoŋ ka etaŋaleuni, emam ituŋanan elakuni ituŋanan anapedor kaŋ,

⁴⁰anerae ekyaari ayoŋ ŋakan kaŋ kidiama, ekoŋ otema, ‘Ikwapei ayarya ayoŋ ŋikaru ka ŋikaru,

⁴¹ani epenari ayoŋ ekileŋ kaŋ ŋolo imilya, otubok ŋituŋa, enyaŋi ayoŋ ŋakiro a ŋimoe kaŋ, ido esican ŋulu akaremokino ayoŋ.

⁴²Elelearete ŋaokot alokaleŋeleŋe kaŋ, ido eari ekileŋ kaŋ ŋimoe kaŋ, nyemyekini ayoŋ tari epei a ŋulu eketijiete ayoŋ etwakete tari ŋulu ewanan ka ŋulu eenitae.’

⁴³“Okoe ŋituŋa a ŋakwapin, kitopoloosi ŋituŋa a Ekapolon kilipa neni keŋ iyes ŋakujo daadaŋ, anerae inyaŋi iŋes ŋaokot a ŋiketiyak keŋ, inyaŋi ŋakiro a ŋimoe keŋ, isicani ŋulu eremokino iŋes, tolema aronis anakwap a ŋituŋa keŋ.”

⁴⁴Abu Moses, tolimu ŋakiro a eete a ŋol daadaŋ epupete ŋituŋa, arukito iŋes ka Yosua lokoku a Nun.

⁴⁵Ani kedau Moses akirwor ŋakiro ŋun daadaŋ neni a Ŋisirael a daadaŋ,

⁴⁶tolimok ikes tema, “Kirica alotai kus ŋakiro daadaŋ ŋuna akalimok ayoŋ iyes nakoloŋit na akisuuda ŋakiro kus; tolimokisi ikes erae akiciket neni a ŋidwe kus ikotere iwuapyata ikes ejok ŋakiro daadaŋ ŋuna a ŋikisila.

⁴⁷Nyerae ŋakiro ŋun ŋakoŋinae, erae ŋakiro ŋuna ka akiyar kus, ŋakiro ŋun iŋes ipedoryata iyes akiyar apaki ŋina aoyan anakwap a ŋina idokarete iyes alokekwaye a ŋolol Yorodan akituruwor ŋina kus.”

⁴⁸Akoloŋit ŋinapei, kirwor Ekapolon neni a Moses tema,

⁴⁹“Kitipeiyo lomoru ŋulu ka Abarim, todoka lomoru Nebo ŋolo eyai nakwap a Moab ŋolo iteosi ka Yeriko, torou akwap a Kanaan ŋina abuni ayoŋ ainakin neni a Ŋisirael aruwor ŋina kec,

⁵⁰itwani iyoŋ ikwapei atapapaa kon alokidiama emoru ŋolo idokari iyoŋ, lopite ŋolo atwana lokaato kon Aron alomoru Or ikwapei atapapaa keŋ.

⁵¹anerae ipotu iyes daadaŋ ŋiarei nyikikinyoma ayoŋ alotuŋa a Isirael apaki ŋina iyakatar neni aya ŋakipi ŋuna a Meribas-Kades analoŋisat a Sin ka aŋuna pa itoodiuniata iyes asegis kaŋ alokiŋaren Ŋisirael.

⁵²Tari kiŋolik iyoŋ akwap ŋin aneni alwanan, nyilomari iyoŋ nakwap ŋina abuni ayoŋ ainakin Ŋisirael.”