Read ngakarimojong Ŋikis. 33 Bible Online

Ŋikis. 33 - ngakarimojong bible

Ŋikis. 33

¹Erae nu ŋakiro ŋuna abu Moses ŋolo arae ituŋanan ŋini ka Akuj kiterereŋio Ŋisirael eriŋa iŋes nyetwana

²Abu iŋes kirwor ŋakiro nu: Abu Ekapolon bu alo Sinai, totakanu neni yok alo Seir, tocau alomoru Paran. Arukito iŋes ka ŋikasegak ŋalipyo ka ŋalipyo, ayakasi teten keŋ ŋajorei keŋ.

³Okoe iyoŋ ŋolo ikiminasi ŋituŋa daadaŋ, iyoki iyoŋ ŋituŋa daadaŋ ŋulu asegak, ilipete ikes neni kon, iwuapito ikes ŋakiro ŋuna ilimokini iyoŋ ikes.

⁴Abu Ekapolon ikiinak iwon ŋikisila, abu iŋes kituruwo ŋituŋa a Yakob ŋulu keŋ.

⁵Abu Ekapolon bu toruwor erwosit a Ŋisirael apaki ŋina acunakinotor ŋikarikok a ŋikabilae a Ŋisirael daadaŋ.

⁶Elipi torubakis ŋiletok a Ruben eyakasi, nyirikar, tari daŋ kekudyoko ŋiletok keŋ.

⁷Abu Moses kirwor ŋakiro nu aŋuna a ŋituŋa a ekabila a Yuda: Okoe Ekapolon, kiira ŋakiro a ŋituŋa a ekabila a Yuda ka kinyaku ikes lotuŋa kec, kiŋarak ikes anakitiji ŋimoe kec.

⁸Abu Moses kirwor ŋakiro nu aŋuna a ŋituŋa a ekabila a Lepi: Inak ŋiletok a Lepi ibore ŋini enyaritae Sumim, [5] inak daŋ ikes ibore ŋini isileereununui ŋakiro ŋini enyaritae Urim, [6] ŋiletok a Lepi ŋulu ibu iyoŋ kikatak alo Masa, ŋulu ibu iyoŋ apaki ŋina ayakatar neni aya ŋakipi ŋuna a Meriba,

⁹ŋulu apotu temasi neni atapapa kec ka atatoto kec, “Nyikimisitae isua iyes.” Apotu ikes nyemitakis ŋiyeneta kec ka toŋero ŋidwe kec, anerae ericito ikes ŋakiro kon ka ericito Acamunet kon.

¹⁰Itatamete ŋilepi ŋituŋa a Yakob ŋakiciketa kon ka itatamete Ŋisirael ŋikisila kon. Eyaununeete ikes ekinyate kiŋaren kon ka eyaununeete ŋainakineta ŋuna epeyo Namuroet kon.

¹¹Okoe Ekapolon, kiterereŋ apiiryanut kec ka tocamu ŋiticisyo kec, toreu ŋimoe kec daadaŋ, ikotere nyepotu nabo akitijiore ikes.

¹²Abu Moses kirwor ŋakiro nu aŋuna a ŋituŋa a ekabila a Benjamin: “Erae ŋiletok a Benjamin ŋituŋa ŋulu emina Ekapolon, iyoki Ekapolon ikes apaaran jwi, iboiyete ikes aneni a Ekapolon emam ŋace.”

¹³Abu Moses kirwor ŋakiro nu aŋuna a ŋituŋa a ekabila a Yosepu: “Elipi kiterereŋ Ekapolon akwap kec a akiru a ŋina itemokino ka ŋakipi ŋuna eitunito alokwap

¹⁴Elipi kiterereŋ Ekapolon akwap kec a ŋaraito a ŋuna ajokak a ŋuna itokoniunit akoloŋ ejok ka ŋaraito ŋuna alalak alotooma ŋololap.

¹⁵Elipi kiterereŋ Ekapolon akwap a Yosepu a ŋiboro a ŋulu ajokak a ŋulu alomoru a ŋuluruba ka a ŋaraito a ŋuna ajokak a ŋuna alokamukumukui a ŋulu a ŋikaru ka ŋikaru; kiterereŋ Ekapolon ikes a ŋiboro a daadaŋ a ŋulu ka akwap a ŋulu ajokak ka a ajokis a Akuj a ŋina iboi alo Sinai.

¹⁶Elipi toyakaun ŋarereŋisyo ŋun daadaŋ neni a ŋiletok a Yosepu, a ŋolo abu Ekapolon toseu apolokin ŋikaitotoi keŋ.

¹⁷Anagogoŋu kec, ikwaan ŋiletok a Yosepu ka emaanik ŋolo apolon ŋolo adedeŋan ikwaan ikes egogoŋ ka ŋamomwar a emaanik a ŋolo ajion. A agogoŋu a ŋin, itijiete ŋiletok a Yosepu ŋituŋa a ŋakwapin, kirita tari nakisaleta a akwap, ŋiletok a Yosepu ŋul ikes ŋituŋa a ekabila a Epuraim ŋulu erae ŋalipyo ka ŋalipyo ka ŋituŋa a ekabila a Manase ŋulu erae ŋalipyo ka ŋalipyo.”

¹⁸Kirwor Moses ŋakiro nu aŋuna a ŋituŋa a ŋikabilae a Sebulon ka Isakar: Tolelyana ŋiletok a Sebulon ilosete akigyel ŋiboro kus. Tolakara ŋiletok a Isakar iyakasi loeemae kus.

¹⁹Inyaraunete iyes ŋituŋa lomoru, neni einakiniata ikes ŋamuronisya ŋuna iyookino, anerae iryamunito iyes ajokis daadaŋ ananamyo ka abaru ŋina eyai nasinyon.

²⁰Kirwor Moses ŋakiro nu aŋuna a ŋituŋa a ekabila a Gad: Kipuroe Akuj ŋina abu inak ŋituŋa a ekabila a Gad akwap ŋina alalan. Eperete ŋiletok a Gad a nen, ikwa eŋatuny, inyasete a nen ŋimoe kec.

²¹Apotu ŋituŋa a ekabila a Gad toryamut akwap ŋina ajokan aŋuna kec aponi tokorakinae ikes atutubet ŋina a ŋikarikok, apotu ŋituŋa a ekabila a Gad torukut ka ŋikapilak, apotu ikes kitiyata ŋuna eyookino aneni Ekapolon, apotu inakis Ŋisirael akiwuap ŋikisila a Ekapolon.

²²Kirwor Moses ŋakiro nu aŋuna a ŋituŋa a ekabila a Dan: Ikwaan ŋiletok a Dan ka itaok a eŋatuny, esutunete ikes alo Basan.

²³Aŋuna a ŋituŋa a ekabila a Naputali abu Moses kirwor ŋakiro nu. Okoe ŋituŋa a ekabila a Naputali, iyakatar iyes ajokis daadaŋ, Elalak ŋarereŋisyo ŋuna ke Ekapolon aneni kus, kituruwosi akwap ŋina alo To ka ŋina alo Kwap ŋina kus.

²⁴Kirwor Moses ŋakiro nu aŋuna a ŋituŋa a ekabila ka Aser: Iterereŋitoe ŋituŋa a ekabila ka Aser akilo ŋituŋa a ŋikabilae a ŋuluce a daadaŋ. Elipi tominakis ŋikaitotoi keŋ daadaŋ ikes, elipi kiboi iŋes alobari ka analelyanu.

²⁵Elipi toruworos ŋikekya ŋulu egolere ŋitaunio kec ŋulu itiyaunitae a ŋasuwa ka eburonis, ka elipi torubak agogoŋu kec ŋirwa daadaŋ ŋulu ka akiyar kec.

²⁶Okoe Ŋisirael, mam ice ikwaan ka Akuj kus, Akuj ŋina ebunit alokidiama aiun iyes, eyai iŋes anailiil keŋ lodouwon.

²⁷Akuj ŋinaruba iŋes erae akaiunan kus, abu iŋes tomunya anakwap ŋajorei ŋunakoloŋ, abu kirita ŋimoe kus alokiŋaren kus, ido tema, “Tomunyasi!”

²⁸Aŋun, iboiyete Ŋisirael eiuna, mam ŋican eryamunito ŋiletok a Yakob anakibois kec a ŋina eya ŋikinyom ka epiini anakwap a ŋina etepi akiru.

²⁹Irereŋ iyes, okoe Ŋisirael, alutuŋa ikwaanatar iyes? Irae iyes ŋituŋa ŋulu ikiiunit Ekapolon ŋolo erae ekaiunan kus ka ekeŋarakinan kus, iŋes ikiinakini iyes akiloun ŋimoe kus. Epote ŋimoe kus akirworo alyokonu neni kus, ido imunaarete iyes ŋaduketa kec ŋuna ka apukan.