Read ngakarimojong Ŋikis. 7 Bible Online

Ŋikis. 7 - ngakarimojong bible

Ŋikis. 7

¹Ani ikiyauni iyes Ekapolon Akuj kus nakwap ŋina eapi iyes alomar ka akituruwor ŋina iboiyoto iyes, ido kirita ŋituŋa a ŋakwapin alokiŋaren kus, kirita Ŋiitaiti, Ŋigiragasi, Ŋiamori, Ŋikanaani, Ŋiperisi, Ŋiipi ka Ŋiyebusi, ŋituŋa a ŋakwapin a ŋakanikaarei ŋulu egogoŋ ka elalak akilo iyes

²ka ani ikipotokini iyes Ekapolon Akuj kus ikes, ido kilout iyes ikes, emaikina iyes tomunyasi ikes jik. Nyicamunosi ka ikes ka nyisyonioto ikes.

³Nyiitanakinosi ka ikes; nyiinanakis ŋidwe kus ŋulupesur toruworos ŋaberu a ŋidwe kec a ŋulusapa, kori nyiitanakis ŋidwe kus ŋulusapa ŋidwe kec ŋulupesur,

⁴anerae epedorete ŋun akiteŋer ŋidwe kus akiwuapit ŋakiro kaŋ, tosodi kitiyanakis ŋakujo ŋace. Ebuni nai Ekapolon aŋoikin iyes nooi, ido ikimunyari iŋes iyes atipei.

⁵Nai emaikina iyes kitiyata nu neni kec: Toritaanasi ŋamuroeta kec, tobwaŋabwaŋaasi ŋipirin kec, kiteleteloosi ŋapuŋurei ŋuna a ŋitalyo kec ka kicunyasi ka akim ŋitorubei a ŋakujo kec;

⁶anerae irae iyes ŋituŋa ŋulu asegak aneni ke Ekapolon Akuj kus, irae iyes ŋituŋa ŋulu ikiseu Ekapolon Akuj kus alotuŋa a ŋakwapin a daadaŋ anakwap aruwor ŋituŋa keŋ a alope, ŋituŋa keŋ ŋulu emina iŋes nooi.

⁷Pa arae aŋuna ilalakyata iyes akilo ŋituŋa ŋuluce iŋes ikiminakinia iyes Ekapolon, ikiseu iyes, anerae kire jik, ikudyoko iyes akilo ŋituŋa ŋuluce daadaŋ.

⁸Nai arae aŋuna ikiminar Ekapolon iyes ka aŋuna ewuapitor akiikinet ŋina abu iŋes kikoŋ neni atapapaa kus, ŋakiro ŋun ikes ikiyaunia Ekapolon iyes ka apedor keŋ a ŋina etiron ka ikilaku iyes anakwap a ŋina ka apitoonut, anapedor a Parao a erwosit a Ijipit.

⁹Aŋun, toyenutu atemar erae Ekapolon Akuj kus Akuj, erae iŋes Akuj ŋina ikinyoma, ŋina iricit jik acamunet keŋ akitodol ŋanyameta aliput ka ŋituŋa ŋulu eminasi iŋes ka kiwuapito ŋakiciketa keŋ

¹⁰ka erae iŋes. Akuj ŋina inyaŋari ŋuna a ŋulu eŋerete iŋes anakisican ikes. Nyedidi iŋes akinyaŋar ŋakiro a ŋulu eŋerete iŋes.

¹¹Aŋun, kiwuapa ejok ŋakiciketa, ŋakiro ŋuna etubunitoe ka ŋikisila, ŋakiro ŋuna ekecik ayoŋ iyes nakoloŋit na.

¹²Ani kiwuapa iyes ŋikisila ŋul ka kitiyata iwuapito ikes ejok, erubakini Ekapolon Akuj kus iricit jik acamunet ŋina ka amina keŋ, ŋina abu iŋes kikoŋ neni atapapaa kus;

¹³ikiminakini iŋes iyes, ikiterereŋi iŋes iyes ka ikitipituni iŋes iyes; iterereŋi iŋes ŋidwe kus ka ŋinyomen a ŋimanikorin kus lu: Ŋikinyom, epiini ka akimyet; ikiterereŋi iŋes iyes ikitabar a ŋaatuk ka ŋamesekin anakwap a ŋina abu iŋes kikoŋ neni a atapapaa kus atemar ikiinakini iyes.

¹⁴Iruworosi iyes ŋituŋa ŋulu ikiterereŋitoe akilo ŋituŋa daadaŋ, mam ituŋanan ekolupani alotuŋa kus, kori mam ibarasit ekolupani alobaren kus.

¹⁵Itiri Ekapolon aneni kus ŋidekesyo daadaŋ, ŋidekesyo daadaŋ ŋulu etubulok ŋulu ipotu iyes kiŋolikis alo Ijipit, nai imyekini iŋes ŋidekesyo ŋul pena neni a ŋituŋa a ŋulu ikitidiŋito iyes.

¹⁶Imunyarete iyes ŋituŋa daadaŋ ŋulu ikipotok Ekapolon iyes, nyisyoniyete iyes ikes nyitiyanakis ŋakujo kec, anerae eruwor ŋun ibore ŋini ikiteŋeri iyes akiwuap ŋakiro ŋuna ka Akuj.

¹⁷Ani kitemasi iyes ebe, “Elalak ŋituŋa a ŋakwapin a nu akilo isua, ikikokini nai isua ikiritari ikes ai?”

¹⁸Nyikuryaketa aŋuna kec. Nai totamunito ŋuna abu Ekapolon Akuj kus kitiya neni a Parao ka nakwap a Ijipit daadaŋ,

¹⁹totamunito ŋakikatanakineta ŋuna apolok, ŋuna ipotu iyes kiŋolikis a ŋakonyen kus, totamunito ŋakujuwuanisya ŋaumonokineta ka apedor keŋ ŋina etiron ta agogoŋu keŋ ŋina abunio Ekapolon Akuj kus ikiyaunia iyes alo Ijipit. Itiyae Ekapolon Akuj kus ŋunapei neni a ŋituŋa a daadaŋ a ŋulu ikuryaka iyes aŋuna kec.

²⁰Nabo daŋ, iyakikini Ekapolon Akuj kus ikes ŋidekesyo akitodol ŋina amunyarotor tari ŋipiya ŋulu apotu tosiwa aneni kus.

²¹Nyikibul aŋuna kec, anerae Ekapolon Akuj kus ŋina irukitotor iyes, erae Akuj ŋina etubulon.

²²Iritari Ekapolon Akuj kus ŋituŋa a ŋakwapin aŋun alokiŋaren kus iwadio iwadio; nyipedorete iyes akiloun ikes atipei, ani kitiyata iyes ŋun elalaketa ŋityaŋ ŋulu adedeŋak anakwap kus.

²³Nai ipotokini Ekapolon Akuj kus ikes neni kus, itubuli ikes nooi akitodol ŋina emunyarere ikes.

²⁴Ipotokini Ekapolon ŋirwosi kec neni kus, ido itoŋopiyarete iyes ŋirorwa kec anakwap, mam ŋini ikitijikini iyes, imunyarete iyes ikes daadaŋ.

²⁵Icunyarete iyes ŋitorubei a ŋakujo kec. Nyikinira iyes esilipa, kori egolid ŋolo idelesikinitae lotorubei ŋul, ido iyaasi aŋuna kus, anerae anakiwuapit ŋakiro ka Akuj; epedorete ŋiboro ŋul akitooliyor iyes anerae eŋerit Ekapolon Akuj kus iyes akitiya ŋun.

²⁶Nyiyaut ŋiboro ŋulu eŋerit Akuj nakais kus, kitiyata iyes ŋun, ikityakaryo iyes daŋ toruworos ŋulu ikimunyaryo ikwa ikes. Emaikina iyes toŋerito jik ka tojamuwarito ikes, anerae erae ikes ŋulu etyakaritae aŋuna ka akinyasuno.