Read ngakarimojong Ŋikis. 8 Bible Online

Ŋikis. 8 - ngakarimojong bible

Ŋikis. 8

¹Emaikina iyes kiwuapa ŋakiciketa daadaŋ ŋuna ekecik ayoŋ iyes nakoloŋit na, ikotere iyes iyarete ka topitut, tolomasi ka kiboikinos nakwap ŋina abu Ekapolon kiik anakikoŋ ainakin neni atapapaa kus.

²Totamunito erot ŋolo aoyan ŋolo abu Ekapolon Akuj kus ikirikyo iyes analoŋisat ŋikaru ŋatomoniomwon lu, ikotere itiditeunosi iyes make ka ikikatanak iyes aŋuna ka ayenunia ŋakiro ŋuna aya lotai kus ka ayenunia erae kipedorete akiwuap ŋakiciketa keŋ, kori mam.

³Abu iŋes ikitapatanu iyes ikitanyam akoro, nai abu ikiinak iyes Manna, akimuj ŋina sek pa iyenete iyes, kori atapapaa kus, ikotere ikiteyenikinia iyes atemar nyeyari ituŋanan a akimuj bon, nai ka akirot a daadaŋ a ŋina elimuni Ekapolon.

⁴Alotooma ŋikaru ŋatomoniomwon lu, apotu ŋilowi kus nyenyamun ka nyebuuno ŋakejen kus.

⁵Toyena nai alotai kus atemar, ikwaŋina edaya ekauruunan ikoku keŋ, ikidai Ekapolon daŋ iyes lopite ŋolo pei.

⁶Aŋun, kiwuapa ŋakiciketa a Ekapolon Akuj kus, anakitiya ŋuna ecamit iŋes ka akitopoloorit iŋes,

⁷anerae ikiyau Ekapolon Akuj kus iyes tooma nakwap ŋina ajokan, ŋina elelyaata ŋayona, ŋina eya ŋilelyan ka ŋakipi ŋuna eya kwap ŋalup ŋuna elelyaata nakadipaalae ka lokamukumukui,

⁸akwap ŋina a ŋaganoi ka ŋikinyom ŋulu esibito erau, akwap ŋina a ŋikito a epiini, a ŋiboboryo ka ŋikito ŋulu esibito ŋikacikiciki; [3] akwap ŋina a ŋikito ka olipa ka ao,

⁹akwap ŋina imujata iyes emam akicanakin akimuj, neni emam ibore icanakinosi iyes, akwap ŋina erae ŋamoru keŋ ŋasuwa ka alokamukumukui a akwap ŋin ibokunete iyes ŋasuwa ŋuna nyaŋayek.

¹⁰Imujete iyes kimwoko, ido tolakaros neni a Ekapolon Akuj kus aŋuna ka akwap a ŋina ajokan a ŋina ikiinak iŋes iyes.

¹¹Tocoito nai nyikimuryak Ekapolon Akuj kus, anakimyekin akiwuap ŋakiciketa keŋ, ŋikisila ka ŋakiro keŋ ŋuna etubunit iŋes ŋuna akalimok ayoŋ iyes nakoloŋit na.

¹²Ani imujete iyes kimwoko ka toduko ŋakais ŋuna ajokak, ido kiboikinos tooma kec

¹³ka ani epitunete ŋaatuk kus ka ŋamesekin kus ka elalauni esilipa ka egolid kus ka elalauni ibore daadaŋ ŋini iyakatar iyes,

¹⁴nyiturokinosi aŋun, ikimuryak Ekapolon Akuj kus, ŋina ikiyauni iyes anakwap a Ijipit a ŋina iraakatar iyes ŋipi,

¹⁵nyikimuryak Ekapolon ŋolo abu ikirik iyes analoŋisat a ŋina apolon nooi ka a ŋina a ŋican a ŋulu apolok a ŋina eleleba ŋimuno ka ŋitwania ŋulu aarak. Abu Ekapolon kiteleleu ŋakipi aŋuna kus anataaba a ŋinasulut

¹⁶ka ikisimuj iyes analoŋisat a akimuj a ŋina anyaritae Manna, akimuj ŋina pa ayenete atapapaa kus; abu Ekapolon kitiya ŋun akitiditeunia ka akikatakinia iyes, ikotere ekaku kitiya ŋuna ajokak neni kus.

¹⁷Nyetema ituŋanan ebe, “Erae agogoŋu ka apedor kaŋ a ilope iŋes aryamunia ayoŋ abaru na.”

¹⁸Nai totamunito Ekapolon Akuj kus, iŋes ikiinakini iyes agogoŋu ŋina iryamuniata abaru, ikotere isiyookini iŋes Acamunet keŋ ŋina abu iŋes kikoŋ neni a atapapaa kus, ido lopite ŋolo esiyookinio iŋes nakoloŋit na.

¹⁹Ani kikimuryak iyes Ekapolon Akuj kus, ido kiwuapa ŋakujo ŋace ka kitiyanakis ikes ka kilipa neni kec, akalimokini ayoŋ iyes nakoloŋit na atemar, kire jik imunyarosi iyes!

²⁰Imunyarosi iyes lopite ŋolo amunyarotor ŋituŋa a ŋakwapin ŋulu amunyari Ekapolon alokiŋaren kus, anerae nyiwuapa iyes ŋuna alimu Ekapolon Akuj kus.