Read ngakarimojong Ŋikis. 9 Bible Online

Ŋikis. 9 - ngakarimojong bible

Ŋikis. 9

¹Kiirasi, okoe Ŋisirael! Aapuu iyes adokar ekekwaye Yorodan nakoloŋit na aŋuna ka alomar nakwap ŋina a Kanaan, kiritasi ŋituŋa a ŋakwapin ŋulu elalak ka egogoŋ akilo iyes, ŋulu iboiyete alotaunio a ŋulu apolok a ŋulu edukitoe ŋaduketa ŋunajiet ŋuna aoyak nooi,

²ŋituŋa ŋulu egogoŋ tooyak, ŋiletok ka Anakim ŋulu iyenete iyes. Iirarito iyes irworoe aŋuna kec ebe, “Ŋae epedori akitijikin Ŋianakim?”

³Toyenutu nai nakoloŋit na atemar Ekapolon Akuj kus iŋes edokari ekekwaye ikiŋarenik iyes eryenyaana esibit akim ŋina enomi akwap, emunyari iŋes ikes, ido ilouni ikes alokiŋaren kus, ikotere iyes iritarete ikes ka imunyarete ikes atipei, lopite ŋolo ikiikinia Ekapolon iyes.

⁴Ani iritari Ekapolon Akuj kus ikes alokiŋaren kus, nyetema ituŋanan ebe, “Erae aŋuna ka akiyookino kaŋ iŋes akaunia ayoŋ Ekapolon nakwap na akituruwor ŋina kaŋ” Nai toyenete atemar erae aŋuna ka aronis a ŋituŋa a ŋakwapin a ŋun, iŋes eritarya Ekapolon ikes alokiŋaren kus.

⁵Meere aŋuna ka akiyookino kus, kori aŋuna ka akiyookino a ŋitai kus iŋes ilosyoto iyes akituruwor akwap kec ŋina kus, nai erae aŋuna ka aronis a ŋituŋa a ŋakwapin a ŋun, iŋes eritarya Ekapolon ikes alokiŋaren kus, ikotere isiyookinio akiikinet ŋina abu iŋes kikoŋ neni atapapaa kus Aburaam ka Isaka ta Yakob.

⁶Toyenutu nai kire atemar nyikiinakinit Ekapolon Akuj kus iyes akwap ŋina ajokan aŋuna ka akiyookino kus kiboiyoto iyes, anerae irae iyes ŋituŋa ŋulu egogoŋ ŋakyes.

⁷Totamunito ka nyikimuryak iyes epite ŋolo itoŋoitotor iyes Ekapolon Akuj kus analoŋisat, irubakinete iyes iŋereneneete Ekapolon ameun anakoloŋit a ŋina ilomuniata iyes alo Ijipit akitodol akoloŋit ŋina idolunioto iyes nakibois na.

⁸Tari alo Oreb ipotu iyes kitoŋoa Ekapolon kitunyunyura, ido abu Ekapolon toŋoo nooi aŋuna kus tocamu amunyar iyes.

⁹Apaki ŋina alosyo ayoŋ moru akijaun ŋamoru ŋunaarei ŋunadapal, ŋamoru ŋuna egiritae Acamunet ŋina icamunotor iyes ka Ekapolon, abu ayoŋ eboi alomoru ŋapaarasya ŋatomoniomwon ka ŋakuwarisya ŋatomoniomwon; nyimuja ayoŋ akimuj adio, kori nyemata ayoŋ ŋakipi ŋadi.

¹⁰Abu nai Ekapolon okoinak ayoŋ ŋamoru ŋunaarei ŋunadapal, ŋuna egirit Akuj alope, egiritae namoru ŋun ŋakiro daadaŋ ŋuna aris Ekapolon kirwor neni kus alomoru eyai narira akoloŋit ŋina iyakatar iyes iwapei nakeju a emoru.

¹¹Ani elunyar ŋapaarasya ŋatomoniomwon ka ŋakuwarisya ŋatomoniomwon, abu Ekapolon okoinak ayoŋ ŋamoru ŋunaarei ŋunadapal, ŋuna ka Acamunet.

¹²Tema nai Ekapolon neni kaŋ, “Tonyou, kionyak atipei totiyaar kwap, anerae adaut ŋituŋa kon ŋulu ibu iyoŋ yau alo Ijipit akitiya ŋuna aronok. Emyekis ikes atipei ŋuna abu ayoŋ ecikit ikes akiwuap, ido itiyaut aŋuna kec etorube a akuj.”

¹³Torubak Ekapolon irworo neni kaŋ ebala, “Adau ayoŋ aanyun atemar erae kire jik ŋituŋa lu ŋulu egogoŋ ŋakyes.

¹⁴Kimyekinae ayoŋ, ikotere amunyari ikes, etoŋopiya ekiro kec anakwap, ido eketuruwo iyoŋ papa a ŋituŋa a ŋulu agogoŋok ka alalak akilo ikes.”

¹⁵Aŋun, abu ayoŋ otiyaun alomoru ka anoki akim alomoru apaki ŋin; atiŋit ayoŋ anakan kaŋ ŋamoru ŋunaarei ŋunadapal ŋuna egiritae Acamunet.

¹⁶Abu ayoŋ eŋolik kire jik atemar kipotu iyes toseca neni ke Ekapolon Akuj kus, aŋuna iponiata kitiyaut aŋuna kus etorube a itaok, kipotu iyes kimyekis atipei akiwuap ŋuna abu Ekapolon ikicik iyes akiwuap.

¹⁷Aŋun, abu ayoŋ emasak kwap ŋamoru ŋunaarei ŋunadapal obwaŋabwaŋaiya iteete iyes.

¹⁸Ekaku abu ayoŋ aramakin kwap elip neni a Ekapolon lopite ŋolopei sek etiyator ŋapaarasya ŋatomoniomwon ka ŋakuwarisya ŋatomoniomwon, abu ayoŋ nyemuj adio kimuj, kori nyamat ŋadikipi aŋuna a ŋasecisya a daadaŋ aŋuna ipotu iyes kitiyata, kitoŋoa Ekapolon aŋuna itiyaata ŋuna aronok neni keŋ.

¹⁹Akuryana ayoŋ aŋuna ka aŋoit ke Ekapolon a ŋina enyunyurar iŋes ka eyakar apedor ŋinamunyaret iyes. Nai abu Ekapolon kiira adyekitoi kaŋ apaki ŋin daŋ.

²⁰Abu Ekapolon toŋoo nooi neni ka Aron tocamu akiar iŋes, nai abu ayoŋ odyek Ekapolon aŋuna keŋ apaki ŋinapei ŋin.

²¹Abu nai ayoŋ olemu ibore kus ŋin ŋini etesecan, iŋes etorube a itaok, ecuny ka akim, ido obwaŋabwaŋaiya iŋes jik ka eryaa jik tari ŋina aruworor apuwa, eelak apuwa ŋin na ŋolol ŋina alele kwap emoru.

²²Alo Tebera daŋ ka alo Masor ta alo Kibiros-Ataapa, ipotu iyes kitoŋoa Ekapolon.

²³Nabo ani ikitowotokini iyes Ekapolon alo Kades-Berinea ebala, “Kitipeiyosi kituruwosi akwap ŋina akainakinit ayoŋ iyes ŋina kus,” ipotu iyes toŋero ŋakiro ŋuna ikilimokinit Ekapolon Akuj kus iyes, ipotu iyes nyikinyoma, kori nyicamut akiwuap ŋakiro keŋ.

²⁴Iŋereneneete iyes Ekapolon ŋinapei koloŋ akayenunia ayoŋ iyes.

²⁵Ŋapaarasya ŋatomoniomwon ka ŋakuwarisya ŋatomoniomwon ŋuna aperyo ayoŋ alokwap adyekit Ekapolon aŋuna kus, anerae aris iŋes ketubu amunyar iyes,

²⁶abu ayoŋ elip Ekapolon otema, “Ekapolon Akuj, nyimunya kareca ŋituŋa ŋulu erae ŋulu kon ŋulu, ibu iyoŋ tolaku a apolou kon, ŋulu ibu iyoŋ yau alo Ijipit a apedor kon a ŋina etiron.

²⁷Totamu ŋiketiyak kon Aburaam, Isaka ka Yakob, nyimitak agogoŋu a ŋakyes a ŋituŋa a lu, nyimitak aronis kec ka asecit kec,

²⁸anerae acepaki etemarete ŋituŋa a akwap a ŋina ikiyaunia iyoŋ isua ebe, ‘Aŋuna pa apedorya Ekapolon akiya ikes nakwap ŋina sek eikinit ikes ka aŋuna emanitor iŋes ikes, ayau iŋes ikes, ikotere eari ikes analoŋisat.’

²⁹Erae ikes ŋituŋa ŋulu kon a elope ŋulu ibu iyoŋ iyau ka apedor kon a ŋina apolon ka agogoŋu kon.”