Read ngakarimojong Yoa. 12 Bible Online

Yoa. 12 - ngakarimojong bible

Yoa. 12

¹Ani idoŋit ŋirwa ŋikanikapei todol Paska, bu Yesu Betania neni ayai Lasaro, ŋolo kebu Yesu kiteyaru alokatwak.

²Kipokinoe iŋes akimuj ŋina ke eboŋ; arae Marita akori akimuj ka arae Lasaro epei a ŋulu aya lomesa kaapei ka Yesu.

³Tolemu Maria akimyet ŋina akukunyon ŋina anyaritae Narido ŋina apol egyelit, kiwos ŋakejen a Yesu, ido kisuta a ŋitim keŋ; torebuwa akukunyu keŋ akai daadaŋ.

⁴Nai abu Yuda Isikariot, epei alokasyomak a Yesu (ŋolo abu toruwor ekalukinon keŋ) tema,

⁵“Nyo pa agyelarere akimyet ŋina akukunyon na a ŋidinari a ŋamiae a ŋauni ka inakinae lokulyak?”

⁶Pa alimunit iŋes ŋun aŋuna esyonitotor iŋes ŋikulyak, nai aŋuna araakar ekokolan. Eŋadae iŋes ecwee ŋolo a ŋisiliŋa ka alemanari ŋisiliŋa ŋulu ewuakinitae tooma keŋ.

⁷Tolimu Yesu tema, “Kimyekisi aberu na bon; etiyae iŋes nu ka aŋuna ka akoloŋit a ŋina akanukere ayoŋ.

⁸Irukito iyes ka ŋikulyak jwi jwi, nai nyikiruki ayoŋ ka iyes jwi jwi.”

⁹Ani eyenuni asepic ŋina a Ŋiyudayan atemar eyai Yesu Betania, potu ikes daadaŋ nen. Pa alosete ikes inaa aanyun Yesu bon, nai eitanito aanyun tari Lasaro ŋolo kebu Yesu kiteyaru alokatwak.

¹⁰Aŋun, totukut ŋisacaradotin ŋulu apolok akiar Lasaro daŋ,

¹¹anerae ŋakiro ŋuna ka ayarun a Lasaro ikes aŋeritotor Ŋiyudayan ŋulu alalak ŋisacaradotin, ido apotu tonupa neni a Yesu.

¹²Ani taparacu keŋ, kiira asepic ŋina a ŋituŋa a ŋulu aponito nasuban ŋuna a Paska atemar ebunit Yesu Yerusalem.

¹³Apotu kigyenyut ŋaten ŋuna ke ekiŋol, toloto akisiryam iŋes ecelasi ebasi, “Osanna! Erereŋ ŋolo ebunit alokiro ke Ekapolon! Erereŋ Erwosit ŋolo a Isirael!”

¹⁴Toryamu Yesu isigirya, todokak, ikwapei igiritere Nakigireta ebe,

¹⁵“Nyikuryaketa ŋituŋa a Sion! Kiŋolikisi, ebunit Erwosit neni kus edokit itaok ŋini ka asigirya!”

¹⁶Apaki ŋin, nyeyenut ŋikasyomak keŋ apolou ŋina a ŋakiro a nu, nai ani itopolooryo Yesu anayarun keŋ, totamut ikes atemar kigiritae ŋun Nakigireta aŋuna keŋ ka keponi kitiyakinae neni keŋ.

¹⁷Aris ŋituŋa ŋulu arukito ka Yesu apaki ŋina anyaraa iŋes Lasaro analyal kiteyaru alokatwak, kiteyenut ŋakiro ŋuna apotu kitiyakin.

¹⁸Arae ŋakiro ŋun ikes aponiata ŋituŋa toloto akisiryam Yesu, anerae aris kiirasi atemar etiya iŋes akujuwuanut.

¹⁹Kirworikinos nai Ŋiparisayon make temasi, “Toanyuwasi tokona, emam idiobore ŋini ikipedori iwon akitiyakin. Kiŋolikisi! Ewuapakis ŋituŋa daadaŋ iŋes!”

²⁰Alotooma ŋituŋa ŋulu alosito akilip Yerusalem nasuban ŋuna apolok, ayakasi Ŋigirik daŋ ŋidi.

²¹Toloto ikes neni a Pilipo (a ŋolo abunit alo Betesaida, anakwap a Galileya), tolimokis iŋes temasi, “Ekapolon, ikicamit isua aanyun Yesu!”

²²Tolot Pilipo tolimok Anderia ŋakiro ŋun, torukosi nai ikes kaapei tolimokis Yesu.

²³Tolimok Yesu ikes tema, “Adolu tokona apaki ŋina itopoloorere Lokoku a Ituŋanan.

²⁴Akalimokini ayoŋ iyes kire atemar, erubakini ekinyomit ŋolo ke emomwae erae epei, mati kedupakin nalup totwan; ani ketwana, torup nai tolalata.

²⁵Ituŋanan ŋini emina akiyar keŋ, itotwaniyari, nai ŋini ejali akiyar keŋ anakwap a na, eiuni ikotere akiyar ŋina nyedaun.

²⁶Ŋini itiyae etic kaŋ, itemokino ekewuapak ayoŋ; neni ayai ayoŋ, itemokino toyai iŋes daŋ; ŋini eruwor eketiyan kaŋ, ebuni Papa akitopoloor iŋes.

²⁷“Eryeba ekaatau iyaloloŋi nooi. Okoe, atemari ayoŋ ai? Atemari, Papa toiunae ayoŋ anapaki a na a? Nai arae aŋuna ka apaki a na abunio ayoŋ, ikotere onaikinia ŋican ŋulu ka apaki a na.

²⁸Papa, kitopoloo ekiro kon!” Kirworik nai etoil anakuj ebala, “Etopoloo ayoŋ iŋes ka etopoloori iŋes nabo.”

²⁹Apotu ŋituŋa ŋulu awuasi alodiye keŋ kiirasi etoil, temasi ŋice kori agirokinet, temasi ŋice, “Erwor emalaika neni keŋ!”

³⁰Tolimok Yesu ikes tema, “Nyirworo etoil ŋol aŋuna kaŋ, nai erwor aŋuna kus.

³¹Adol tokona apaki ŋina etubere ŋakiro ŋuna ka akwap a na; imasaryo tokona ekepukan ŋolo ka akwap a na.

³²Ani kedaun akikyaar ayoŋ kidiama anakwap, eriuni ŋituŋa daadaŋ neni kaŋ.”

³³(Alimuni iŋes ŋun akitoodiunia epite ŋolo etwania iŋes.)

³⁴Toboŋokis ŋituŋa temasi, “Igiritae Lokisila atemar, eropari Kristo jik. Ikokini nai iyoŋ ibala, itemokino Lokoku a Ituŋanan kikyaarae ai? Ŋae mono Lokoku a Ituŋanan ŋol?”

³⁵Toboŋok Yesu tema, “Eyakaun akica ka iyes adiouriyen. Torubakisi ilosete eriŋa akica eyai, ikotere nyedolu akiryonut neni kus. Ituŋanan ŋini elosi anakiryonut, nyeyeni neni elosi.

³⁶Ani eriŋa iyakatar akica, tonupa akica, ikotere toruworos iyes ŋituŋa ŋulu ka akica.” Kedau Yesu erwor ŋun, toesik ikes, toŋop aneni kec.

³⁷Ani tari kitiya iŋes ŋakujuwuanisya ŋuna alalak iteete ikes, nyenupa ikes iŋes.

³⁸Apotu nu kitiyakin, kiyookinotor ŋakiro ŋuna egirit Isaya ekadwaran ebala, “Ekapolon, ŋae idio ŋini abu tonup ŋakosikiro? Neni a ŋae abu Ekapolon kitoodik apedor keŋ?”

³⁹Aŋun, nyepedosi ikes akinup, anerae egirit nabo Isaya ebala,

⁴⁰“Etumudukan Akuj ŋakecekonyen ka etabaŋaan ikes, ikotere nyiŋolikis a ŋakonyen kec ka nyeyenut ŋatameta kec, nyeboŋut neni kaŋ, tosodi etaŋaleu ayoŋ ikes.”

⁴¹Alimuni Isaya ŋakiro ŋun, anerae abu kiŋolik apolou a Yesu, kisyak nai akirwor aŋuna keŋ.

⁴²Tari kikote neni, apotu tari ŋikapolok ŋulu a Ŋiyudayan ŋulu alalak tonupa Yesu. Nai aŋuna akeritotor ikes Ŋiparisayon, nyelimut ikes ŋakiro ŋun epupete ŋituŋa, ikotere nyiritar ikes alosinagoga.

⁴³Aminasi ikes akitopolooro alotuŋa akilo akitopolooro aneni ka Akuj.

⁴⁴Tocelu Yesu nooi tema, “Ŋini akanupi ayoŋ, anup iŋes tari ŋolo ekeyakuunit ayoŋ, meere ayoŋ bon.

⁴⁵Ŋini ekeŋolik ayoŋ, eŋolik iŋes tari ŋolo ekeyakuunit ayoŋ.

⁴⁶Abu ayoŋ nakwap na arae akica, ikotere ŋini akanupi ayoŋ, nyidoŋ nakiryonut.

⁴⁷Ani kiira ituŋanan ŋakiro kaŋ nyiwuapak, nyatubokini ayoŋ iŋes. Pa abuni ayoŋ atubonokin ŋituŋa ŋulu ka akwap, nai aiun ikes.

⁴⁸Ŋinituŋanan akaŋeri ayoŋ, nyecamu ŋakiro kaŋ, eyakar iŋes ekatubon. Ŋakiro ŋuna erworo ayoŋ, ikes eruworosi ekatubon keŋ Akoloŋit ŋina esidyon.

⁴⁹Anerae nyerworo ayoŋ aŋuna ka apedor kaŋ bon, erae Papa ŋolo ekeyakuunit ayoŋ, iŋes ekecikakinit ŋakiro ŋuna itemokino olimu ka erwor.

⁵⁰Ayeni ayoŋ atemar akiciket keŋ iŋes eyauni lotuŋa akiyar ŋina nyedaun. Ŋuna alimuni ayoŋ, alimuni alopite a ŋolo akalimokinitor Papa.”