Read ngakarimojong Yoa. 14 Bible Online

Yoa. 14 - ngakarimojong bible

Yoa. 14

¹“Nyiyaloloŋo, tonupa Akuj, tonupae ayoŋ daŋ.

²Elalak ŋagulei alotooma akai a Papa kaŋ. Kerae nyikote neni, pa kakalimokinit ayoŋ iyes atemar alosi ayoŋ akitemokin akibois aŋuna kus.

³Ani kalot ayoŋ akitemokin akibois aŋuna kus, aboŋuni nai ayoŋ okocuna iyes neni kaŋ, ikotere kiboiyoto iyes daŋ aneni ayai ayoŋ.

⁴Iyenete iyes erot ŋolo elosi neni alosi ayoŋ.”

⁵Kiŋit Tomas Yesu tema, “Ekapolon, nyikiyeni isua neni ilosi iyoŋ, ikianyuni nai isua erot ŋol ikwaani?”

⁶Tolimok Yesu Tomas tema, “Arae Ayoŋ erot, Arae ŋuna a kire ka Arae akiyar; nyepedori ituŋanan abunore neni a Papa, mati kitoru neni kaŋ.

⁷Ikwaŋina tokona ikiyeniata iyes ayoŋ, iyenunete Papa kaŋ daŋ; ameun tokona, iyenete iyes iŋes ka ianyut daŋ.”

⁸Tolimok Pilipo Yesu tema, “Ekapolon, kitoodikinae isua Papa, ido kimwonikinetei nai isua.”

⁹Tolimok Yesu iŋes tema, “Pilipo, ikirukit iyoŋ ka ayoŋ ŋinapei, nai eriŋa iyoŋ nyeyenuna ayoŋ a? Ŋini adau aanyun ayoŋ, aanyu Papa kaŋ daŋ, kaanukiro nai ibaakar iyoŋ, ‘Kitoodikinae isua Papa?’

¹⁰Nyinupit iyoŋ atemar ayai ayoŋ tooma Papa ka eyai iŋes tooma kaŋ a? Ŋuna daadaŋ erworo ayoŋ nyerworo ka apedor kaŋ bon, nai Papa ŋolo iboi alotooma kaŋ, iŋes itiyae ŋiticisyo keŋ.

¹¹Tonupae ayoŋ atemar ayai ayoŋ tooma Papa ka eyai Papa tooma kaŋ. Ani kemam, tonupae ayoŋ aŋuna a ŋiticisyo a ŋulu etiyae ayoŋ.

¹²Akalimokini ayoŋ iyes kire atemar, ŋini akanupi ayoŋ, itiyae daŋ ŋiticisyo ŋulu etiyae ayoŋ; itiyae iŋes ŋiticisyo ŋulu iloito tari ŋulu kaŋ, anerae aboŋori ayoŋ neni a Papa.

¹³Ŋinibore daadaŋ iŋisete iyes alokiro kaŋ, etiyakini ayoŋ, ikotere kitopolooroe Papa aneni a Lokoku.

¹⁴Ŋinibore ikiŋisete iyes ayoŋ alokiro kaŋ, etiyakini ayoŋ.

¹⁵“Ani kikiminasi iyes ayoŋ, iricakinete ŋakiciketa kaŋ.

¹⁶Elipi ayoŋ Papa, ikiinakini iŋes iyes ekeŋarakiniton ece ŋolo irukyoto iyes jik.

¹⁷Erae iŋes Etau ŋolo irworo ŋuna a kire ŋuna ka Akuj. Nyepedori akwap akijaun iŋes, anerae nyite akwap iŋes, kori nyeyeni iŋes. Iyenete iyes iŋes, anerae iboiyuni iŋes neni kus ka eyakaun iŋes tooma kus.

¹⁸“Nyakaesikini ayoŋ iyes make ikokiyanito, aboŋuni ayoŋ neni kus.

¹⁹Apaki adio cicinyekeŋolikinete nabo ayoŋ ŋituŋa ŋulu ka akwap a na, nai ikiŋolikinete iyes ayoŋ ka aŋuna ayarya ayoŋ, iyarete iyes daŋ.

²⁰Akoloŋit ŋin, ipote iyes aanyun atemar ayai ayoŋ tooma Papa kaŋ, iyakasi iyes tooma kaŋ ka ayai ayoŋ tooma kus.

²¹“Ŋini ecamunit ŋakiciketa kaŋ, kiricakinite, iŋes akamina ayoŋ. Ŋini akamina ayoŋ, iŋes eminakini Papa kaŋ; aminakini ayoŋ daŋ iŋes ka esileereun neni keŋ.”

²²Abu Yuda (meere Yuda Isikariot) kiŋit Yesu tema, “Ekapolon, ikokini iyoŋ isileereun neni kosi, nai meere lotuŋa ŋulu ka akwap ai?”

²³Toboŋok Yesu iŋes tema, “Ŋinituŋanan akamina ayoŋ, iricakini ŋakiro kaŋ. Eminakini Papa kaŋ iŋes ka ikiponi isua neni keŋ, eboiyoto ka iŋes.

²⁴Ituŋanan daadaŋ ŋini nyakamina ayoŋ, nyiricakini ŋakiro kaŋ. Ŋakiro daadaŋ ŋuna ipupete iyes, meere ŋuna kaŋ, nai erae ŋuna a Papa a ŋolo ekeyakuunit ayoŋ.

²⁵“Akalimok ayoŋ iyes ŋakiro ŋun, eriŋa ayoŋ ikirukit ka iyes.

²⁶Ebuni nai ekeŋarakiniton, Etau ŋolo Asegan, ŋolo iyakuuni Papa alokiro kaŋ, ikitatam iyes ŋakiro daadaŋ ka ikitatamunite iyes ŋuna daadaŋ adau ayoŋ alimokin iyes.

²⁷“Ekemyekinia ayoŋ iyes ekisil; ekisil kaŋ iŋes akainakini iyes, nyikoni iŋes ekisil ŋolo ka akwap. Nyiyaloloŋo kori nyikibul!

²⁸Iirasi iyes ŋuna akalimokini ayoŋ iyes atemar, ‘Alosi ayoŋ, nai aboŋuni neni kus.’ Kerae itominasi iyes ayoŋ kire, kilelyana, anerae alosi ayoŋ neni a Papa a ŋolo epol akilo ayoŋ.

²⁹Akalimok tokona ayoŋ iyes ŋakiro nu, eriŋa ikes nyetakanuna, ikotere ani ŋina etakanuniata, tonupa.

³⁰Nyikirworo ayoŋ ka iyes ekaoyan, anerae ebunit ekepukan ŋolo ka akwap a na. Nyeyakar iŋes apedor ŋina ekepukaa ayoŋ,

³¹nai etiyae ayoŋ ikwaŋina ekecikakinitor Papa, ikotere eyenuniata ŋituŋa ŋulu ka akwap atemar amina ayoŋ Papa. Tonyoutu, oloto a ne.